Read Imbabura Highland Quichua JONÁS 3 Bible Online

JONÁS 3 - Imbabura Highland Quichua bible

JONÁS 3

¹Caihuanga ishcai viajetami Mandaj Diosca, cai shimicunata cashna nishpa Jonasman villarca:

²“Jatari, chai jatun Nínive shuti pueblopi causajcunapajman ri. Ñuca imatalla villai nishcata villagri” nircami.

³Shina nijpimi, Jonasca jatarishpa, Mandaj Dios mandashcashnallata, Nínive pueblopi causajcunaman villagrirca. Nínive puebloca, quimsa punllata purinashna ninambacha jatun pueblomi carca.

⁴Jonasca, ña chai puebloman yaicushpa, shuj punllata purijushpami, cashna nishpa villajurca: “Cunanmanda chuscu chunga punllacamanga, cai Nínive puebloca tucuringami” nijurcami.

⁵Chashna villajta uyashpami, Nínive pueblopi causajcunaca, Taita Diosta crinajurca. Paicuna purapica, rucumanda callarishpa uchillacunacamanmi, cañamuta churajushpa, na micunachu nishpa villanajurca.

⁶Nínive pueblota jatun mandajpash, chashna villashcata yachashpami, pai mandashpa tiajunamanda jatarishpa, paipaj churajunata llujchirca. Paipash cañamuta churajushpami, uchufapi tiarirca.

⁷Jatun mandajca, pai churashca mandajcunandimi, Nínive pueblopi causajcunaman cashna villachun mandarca: “Maijanllapash na micunachu canguichi. Huagracunaman, llamacunaman, ima shuj animalcunamambash, imatallapash na caranachu canguichi. Yacutallapash, na ufiachinachu canguichi.

⁸Ashtahuangarin gentecunapash, animalcunapash cañamuta churajushpa, Taita Diosta ninanda caparishpa mañaichi. Ima nalicunata rurashpa, macashpa shuhuajcuna cashpapash, tucuicuna saquichi.

⁹Taita Diosca, nina japirinshna ninanda fiñarishca cashpapash, chai fiñarishcamanda pai llaquirishpa, ninanda fiñarishcata pai yalichinatapash, ¿pita yachanguichi? Fiñarishcata pai yalichijpica, napash huañuringachu” nichunmi mandarca.

¹⁰Nalita rurashpa causanajushcata saquishpa Diospajman tigrarishcatami, Taita Diosca ricurca. Chaimandami, llaquichishami nishca cashpapash llaquirishpa, na llaquichishpa saquirca.