Read Imbabura Highland Quichua NÚMEROS 10 Bible Online

NÚMEROS 10 - Imbabura Highland Quichua bible

NÚMEROS 10

¹Mandaj Diosca, Moisesmanmi cashna nishpa villajurca:

²“Culqui trompetacunata, ishcaita rurai. Chaicunataca, martillohuan tacashpa rurangui. Chaicunaca, tandanajushca israelcunata cayangapaj, carpacunata shujman apanata villangapajmi canga.

³Chai trompetacunata huacachijpimi, tucuilla tandanajushca israelcunaca, ñucahuan tuparina jatun carpaman yaicuna pungupi, cambaj ñaupajman tandanajunga.

⁴Ashtahuangarin shujlla trompetata huacachijpica, huaranga huaranga israelcunata mandajcunallami, cambaj ñaupajman tandanajunga.

⁵Shinllitapacha huacachij uyarijpica, indi llujshimuj lado carpacunapi causaj israelcunami jatarinajunga.

⁶Ishcaicaman shinllitapacha huacachijpica, ura lado carpacunapi causajcunami jatarinajunga. Shinallata paicuna ri callarichumbash, shinllitapachami huacachinga.

⁷Ashtahuangarin tandanajushca israelcunata tandachingapaj huacachishpaca, alilla huacachinguichi.

⁸Chai trompetacunataca, Aaronbaj churi curacunami huacachinajunga. Caitaca, cangunapaj miraicunacaman tucui causaipi pactachinajuchun ñuca cushca shimicunami.

⁹Cangunapaj llactapi ña causanajujpi, cangunata fiñajcuna cangunahuan macanajungapaj shamujpica, paicunahuan macanajungapaj ringapaca, trompetacunata shinllitapacha huacachinguichi. Chashna rurajpimi, cangunata Mandaj Taita Dios ñucapash yarisha. Cangunata fiñajcunapaj maquimandami quishpichisha.

¹⁰Jatun fiesta punllacunapi, quilla callari punllacunapipash, canguna cushijuna chai punllacunapi trompetacunata huacachinguichi. Chai punllacunapi animalcunata ñucaman cushpa tucuillata rupachinajushpa, ñucahuan ali cangapaj, animalcunata ñucaman cushpa huañuchinajushpa, chashna huacachinguichi. Chashna rurajpimi, cangunapaj Taita Dios ñucaca cangunata yariajusha. Ñucami, cangunata Mandaj Taita Dios cani” nijurcami.

¹¹Egiptomanda israelcuna llujshimushcapash, ñami shuj huata ishcai quilla tucurca. Chai quillapaj ishcai chunga punllapimi fuyuca, imashna causanata yachachishca shimicunata alichishca tiajuj jatun carpa jahuamandaca, vichai ri callarirca.

¹²Chaimandami israelcunaca, Sinaí shuti jichushca pambamandaca, imashna rina cashcashnallata, fuyuta catishpa rinajurca. Fuyuca, Parán shuti jichushca pambapimi shayarirca.

¹³Israelcunaca, Mandaj Dios mandashpa, Moiseshuan villachicashnallatami, chaira rishpa callarinajurca.

¹⁴Judá aillupaj carpacunamandami, paicunapaj banderahuan, paicunapaj soldadocuna imashna tandanajushcapi, caishuj aillucunapaj soldadocunata ñaupashpa ri callarirca. Judá aillupaj soldadocunataca, Aminadab shuti runapaj churi Naasón shuti runami mandajurca.

¹⁵Isacar aillupaj soldadocunataca, Zuar shuti runapaj churi Natanaelmi mandajurca.

¹⁶Zabulón aillupaj soldadocunataca, Helón shuti runapaj churi Eliab shuti runami mandajurca.

¹⁷Paicunapaj catica, Gersonbaj mirai, Merari shuti runapaj mirai levitacunami, Diospaj carpa pascashcata apashpa catinajurca.

¹⁸Paicunapaj catica, Rubén aillupaj soldadocunami, paicunapaj banderahuan, paicunapaj soldadocuna imashna tandanajushcapi ri callarinajurca. Chai soldadocunataca, Sedeur shuti runapaj churi Elisur shuti runami mandajurca.

¹⁹Simeón aillupaj soldadocunataca, Zurisadai shuti runapaj churi Selumiel shuti runami mandajurca.

²⁰Gad aillupaj soldadocunataca, Deuel shuti runapaj churi Eliasafmi mandajurca.

²¹Paicunapaj catica, Coat runapaj mirai levitacunami, Diospajlla huasi ucupi imalla tiashcacunata apashpa catinajurca. Paicuna chayajpica, ñaupashpa rij levitacunaca, ñami Diospaj jatun carpataca shayachishca carca.

²²Paicunapaj catica, Efraín aillupaj soldadocunami, paicunapaj banderahuan, paicunapaj soldadocuna imashna tandanajushcapi ri callarinajurca. Chai soldadocunataca, Amiud shuti runapaj churi Elisama shuti runami mandajurca.

²³Manasés aillupaj soldadocunataca, Pedasur shuti runapaj churi Gamaliel runami mandajurca.

²⁴Benjamín aillupaj soldadocunataca, Gedeoni runapaj churi Abidán shuti runami mandajurca.

²⁵Chaicunapaj catica, Dan shuti aillupaj soldadocunami, paicunapaj banderahuan, paicunapaj soldadocuna imashna tandanajushcapi catinajurca. Paicunaca cuidashpami, tucuicunapaj huashata catinajurca. Chai soldadocunataca, Amisadai shuti runapaj churi Ahiezer shuti runami mandajurca.

²⁶Aser shuti aillupaj soldadocunataca, Ocrán shuti runapaj churi Pagiel shuti runami mandajurca.

²⁷Neftalí aillupaj soldadocunataca, Enán shuti runapaj churi Ahira shuti runami mandajurca.

²⁸Chashnami israelcunaca, paicuna tianajuj pushtumanda shuj ladoman rina chayajpica, paicunapaj soldadocuna imashna tandanajushcapi rinajurca.

²⁹Moisespaj huarmipaj taitaca, madianitapura Rag:uel shutimi carca. Chai taitapaj churi Hobab shuti runatami, Moisesca cashna nirca: —Ñucanchica, Mandaj Dios carashapacha nishca llactamanmi rinajunchi. Mandaj Diosmi, ñucanchi israelcunaman alita rurasha nirca. Ñucanchihuan jaculla, ñucanchipash canman alita rurashunmi— nircami.

³⁰Shina nijpimi chai runaca, Moisesman cashna nishpa tigrachirca: —Ñucaca na rishachu. Ashtahuangarin ñuca llactapi ñuca familiacunapajmanmi rigrini— nircami.

³¹Shina nijpipash Moisesca, cashnami nijurca: —Ama ñucanchita saquishpa ripaichu. Cai jichushca pambapi, maipi carpacunata shayachishpa ali tiarinatapash canmari, aliguta rijsipangui. Canmari, ñucanchi maitalla rinatapash ricuchingui.

³²Can ñucanchihuan rijpica, ima horas Mandaj Dios ñucanchiman alicunata rurajpica, ñucanchipashmi canman alita rurashun— nijurcami.

³³Chashnami israelcunaca, Mandaj Diospaj urcumandaca, quimsa punllata ña rinajurca. Mandaj Dioshuan ari ninajushpa escribishcata alichishca arcahuanga, quimsa punllata rina carutami paicunata ñaupashpa rinajurca. Paicunaca, maipi samanata mascashpami rinajurca.

³⁴Mandaj Diospaj fuyupash punllandimi, paicunapaj jahuata rijurca.

³⁵Mandaj Diospaj arcahuan ña ri callarijpica, Moisesca cashnami nirca: “Mandaj Dioslla, jataripairi. Canda fiñajcunataca, caita chaita cachapairi. Canda millanayachij runacunatapash, cambaj ñaupajmanda calpachipairi” nircami.

³⁶Diospaj arcahuan shayarijpica Moisesca, cashnami nirca: “Mandaj Dioslla, cai huaranga huaranga israelcunataca tigrarishpa ricupairi” nircami.