Read Imbabura Highland Quichua NÚMEROS 14 Bible Online

NÚMEROS 14 - Imbabura Highland Quichua bible

NÚMEROS 14

¹Shina villajpimi, tandanajushca tucuilla israelcunaca, chai tutaca ninanda caparishpa huacanajurca.

²Chaipimi israelcunaca, Moisestapash, Aarondapash fiñashpa rimanajurca. Tucui tandanajushca gentecunami, cashna ninajurca: “¡Egipto llactapillata huañushpachari, ali canchiman carca! ¡Na cashpaca, cai jichushca pambapi huañushpami ali canchiman!

³¿Imashpata Mandaj Diosca ñucanchitaca, cai llactapi espadahuan huañuchi tucunajuchun pushamujun? Ñucanchi huarmicunata, huahuacunatapash, prezu japichunmi pushamushca. Chaipaj randica, Egiptoman tigrashpachari, ali canchiman” ninajurcami.

⁴Shina nishpami, caishuj chaishuj cashna ninajurca: “Cunanga, ñucanchi puramanda shuj mandajta churashpa, Egiptoman tigrashunchi” ninajurcami.

⁵Shina ninajujpimi Moisespash, Aaronbash ashtacapacha tandanajushca tucuilla israelcunapaj ñaupajpi cungurishpa, alpaman chayajta cumurinajurca.

⁶Shinallata Canaán llactata rijsishpa tigramushca puramanda, Nun shuti runapaj churi Josuehuan, Jefone shuti runapaj churi Caleb shuti runahuanga, paicuna churajushcatami liquinajurca.

⁷Chai ishcai runacunaca, tandanajushca tucuilla israelcunatami cashna ninajurca: —Ñucanchi risigrishca llactaca, juyailla alipacha llactami.

⁸Mandaj Diosllata ñucanchita alicachishpaca, paillata ñucanchitaca, chai llactaman pushangallami. Lechepash, balun mishquipash, ashtacapacha tiaj llactataca, paimi ñucanchiman caranga.

⁹Shinamandami Mandaj Diostaca, na jariyana canguichi. Chai llactapi causajcunatapash, na manllanachu canguichi. Paicunataca, tandata micunshnami tucuchishun. Paicunata ayudajca, pipash illanmi. Ashtahuangarin Mandaj Diosca ñucanchihuanmi. Paicunataca, napacha manllanachu canguichi— ninajurcami.

¹⁰Shina nijpimi tucuilla gentecunaca, rumicunahuan huañuchishunchi nishpa parlarinajurca. Ashtahuangarin Mandaj Diospaj punchapambami, paihuan tuparina jatun carpapi tucuilla israelcunaman ricurirca.

¹¹Chaipimi Mandaj Diosca, Moisesta cashna nirca: —Cai gentecunaca, ¿ima punllacamanda ñucataca fiñachigrihuanyari? Paicunapaj chaupipi cai tucui rurashcacunata ricuchijujpipash, ¿ima punllacamanda ñucataca na crishpa causanajunyari?

¹²Paicunataca, huañuchij ung:uita cachamushpami tucuchisha. Candami, paicunata ashtahuan yali ninan jatun shinlli gentecunata mandachun churasha— nircami.

¹³Ashtahuangarin Moisesca cashna nishpami, Mandaj Diosman tigrachirca: —Cai israelcunataca, cambaj jatun ushaihuanmi, Egiptomanda llujchimurcangui. Paicunata tucuchishcataca, Egiptopi causajcunaca uyangamari.

¹⁴Chashna uyashpaca, cai llactapi causajcunaman villangamari. Paicunaca, can Mandaj Diostaca cai israelcunahuan cajta, can Mandaj Diosca ñavi ñavi ricurin cajtami uyashca. Shinallata cambaj fuyupash, paicunapaj jahuapi cajta, punllapica pilarshnalla fuyupi, tutaca pilarshnalla ninapi paicunata ñaupashpa can shamushcatapashmi uyashca.

¹⁵Cai israelcunataca, shujlla runata huañuchinshna can huañuchishcatapashmi yachanajunga. Can imatalla rurashcacunata uyashca llactacunaca, cashnami ninajunga:

¹⁶‘Mandaj Diosca, pai carashami nishpa juramentushca llactamanga, israelcunataca na pushai ushashcachu. Shinamandami, jichushca pambapillata huañuchishca’ ninajungami.

¹⁷Chaimanda cunanga, Jatun Dioslla, cambaj ushaica jatun cajta ricuchihuai nipanimi. Canllatamari, cashna nircangui:

¹⁸‘Mandaj Dios ñucaca, na ucha fiñarishpa, ninanda llaquijmi cani. Na cazushpa nalita rurajpipash, chai nalitaca cunganillami. Shina cashpapash ashtahuangarin nalita rurashcamandaca, ima nalita na rurashcatashnaca, na ricushachu. Taitacunapaj juchamandaca, churicunatami quimsa miraicaman, na cashpaca chuscu miraicunacaman llaquichij Dios cani’ nircanguimi.

¹⁹Shina ninanda llaquij cashcashnallata cunanga, cai israelcuna nalita rurashcataca cungapairi. Cai gentecunata Egiptomanda llujchimushpa, caicaman pushamushpa, paicunapaj juchacunata cungashcashnallata cungapairi— nijurcami.

²⁰Shina nijpimi Mandaj Diosca, cashna nijurca: —Ñucami paicunataca, can mañashcashnallata juchata anchuchishcani.

²¹Ashtahuangarin ñucami, causaj Diospacha cani. Chaimandami ñuca punchapambaguca, tucui cai pachapi jundan.

²²Ñuca punchapambagu cajta, shinallata Egiptopipash, jichushca pambapipash imatalla rurashpa ricuchishcata tucuilla ricushcacunallatami, paicuna munashcata rurachun, ña chungacaman mañahuashca. Chaimandami ñuca rimashcataca, napacha uyanajushca.

²³Paicunaca, paicunapaj ñaupa taitacunaman ñuca carashami nishpa juramentushca llactataca na ricungachu. Ñucata ninanda fiñachijcunaca, napacha shujllapash ricungachu.

²⁴Ashtahuangarin ñucata servij Caleb shuti runataca, paipaj shungupi shuj ali espirituta charishpa ñucata catingapaj munashcamandami, pai yaicushca llactaman pushasha. Shinamandami paipaj miraicunapash, chai llactataca paicunapaj cachun japinajunga.

²⁵Cunanga amalecita nishca, cananeo nishca gentecunaca, pugru pambapimi causanajun. Cayapaj tigramushpaca, Puca Cucha ñan ladoman tiaj jichushca pambaman ringuichilla— nijurcami.

²⁶Mandaj Diosca Moisesmambash, Aaronmambash, cashna nishpami villajurca:

²⁷—Cai nali ashtaca gentecuna ñucata fiñashpa nalicachishpa rimanajujtaca, ¿ima punllacamanda uyajushallairi? Israelcuna ñucata juchachishpa, aij nishpa rimanajujtaca, ¿ima punllacamanda uyajushallairi?

²⁸Chaimanda paicunataca, cashna ningui: ‘Mandaj Dios ñucaca, causajunipachami ninimi. Ñuca uyajta canguna imata ninajushcashnallatami, cangunahuanga ñucapash rurasha.

²⁹Canguna puramanda ñucata nalicachishpa rimajcunaca, ishcai chunga huatata charijmanda vichaiman cuentai tucushcacunapash, tucuillami huañunga. Paicunapaj cuerpocunaca, cai jichushca pambapimi sirinajunga.

³⁰Cangunaman carashami nishpa ñuca maquita alsashpa juramentushca llactapi causangapaca, napacha yaicui ushanachu canguichi. Jefone shuti runapaj churi Caleb shuti runahuan, Nun shuti runapaj churi Josuehuanllami, chai llactaman yaicunga.

³¹Cangunaca: Ñucanchi huahuacunataca, ñucanchita fiñajcunami prezu japinga ninajurcanguichimi. Ashtahuangarin paicunatami, canguna nalicachishca llactaman pushasha. Paicunami, chai llactataca rijsinajunga.

³²Ashtahuangarin cangunapaj cuerpocunaca, cai jichushca pambapimi siringa.

³³Cangunapaj huahuacunaca, chuscu chunga huatacamanmi, cai jichushca pambapi michishpa purinajunga. Canguna jariyashpa causashcamandaca, paicunami llaquita apanajunga. Cangunapaj cuerpocunapash cai jichushca pambapi tucuringacamanmi, llaquita apanajunga.

³⁴Imashnami cangunaca, chuscu chunga punllacunacaman llactata rijsishpa tigramurcanguichi. Shinallatami, chuscu chunga punllamandaca, chuscu chunga huatacunata canguna nalita rurashcamandaca, cada punllamanda shuj huatata llaquichi tucunguichi. Chashnami, ñuca llaquichijtaca yachanguichi’ ningui.

³⁵Mandaj Dios ñucallatami villajurcani. Jatun nalita ruraj, cai tucui gentecuna tandanajushpa ñucata rimajcunataca, chashnami llaquichishapachami. Paicunaca, cai jichushca pambapi tucuchi tucunajurca. Chaipimi paicunaca huañunajunga— nijurcami.

³⁶Chai llactata rijsichun Moisés cachashca runacuna tigramushpami, chai llactaca nalichu nishpa, tandanajushca tucuilla israelcunaman villanajurca. Shina villashpami, Moisesta ninanda nalicachishpa rimachirca.

³⁷Chai llactata nalicachishpa rimaj runacunaca, huañuchij ung:uihuanmi, Mandaj Diospaj ñaupajpi huañunajurca.

³⁸Ashtahuangarin chai llactata rijsingapaj rij puramanda, Nun shuti runapaj churi Josuehuan, Jefone shuti runapaj churi Caleb shuti runahuanllami na huañurca.

³⁹Dios imatalla nishcacunata Moisés tucuilla israelcunaman villajpica, ninandapachami llaquirinajurca.

⁴⁰Paicunaca, cayandi tutamanda ucha jatarishpami, urcu pundaman rishpa cashna ninajurca: —Cunanga, Mandaj Dios carasha nishca llactaman vichai ringapaj, ñami caipi capanchi. Ñucanchica juchatami rurapashcanchi— ninajurcami.

⁴¹Shina ninajujpimi Moisesca, cashna nirca: —¿Imashpata Mandaj Dios mandashcataca, na cazungapaj munanguichiyari? Chaiman rijpipash, imapash nali llujshingachu.

⁴²Mandaj Diosca, na cangunapaj chaupipichu. Chaimandami, na chaiman vichai rina canguichi. Chaiman rishpara, cangunata fiñajcunapaj ñaupajpi huañuchi tucunguichiman.

⁴³Chaipica amalecita nishca, cananeo nishca gentecunami cangunata ñaupashpa shuyanajun. Shinamandami, espadahuan huañuchi tucunguichi. Cangunallata Mandaj Diosta napacha catishunllu nishcamandami, Mandaj Diosca na cangunahuan canga— nircami.

⁴⁴Shina nijpipash israelcunaca na uyashpami, urcu pundaman rinajurca. Ashtahuangarin Mandaj Dioshuan ari ninajushpa escribishcata alichishca arcapash, Moisespash, carpacunapaj chaupimandaca na maimambash llujshircachu.

⁴⁵Chai urcupi causaj amalecita nishca, cananeo nishca gentecuna urai shamushpa, Horma shuti pueblocaman catishpa chugrichishpami, israelcunataca misharca.