Read Imbabura Highland Quichua NÚMEROS 17 Bible Online

NÚMEROS 17 - Imbabura Highland Quichua bible

NÚMEROS 17

¹Chai jipami Mandaj Diosca, Moisesman cashna nishpa villajurca:

²“Israelcunata rimagri. Chai jipaca, paicuna puramandaca, paicunapaj taitacunapaj cada huasi ucu puramanda shuj vara caspita japingui. Paicunapaj taitacunapaj huasi ucu puracuna mashnacuna cashcashnallata, paicunata tucui mandajcunamandalla chunga ishcai vara caspicunata japingui. Chai vara caspicunapica, paicunapaj shuticunata escribingui.

³Levipaj miraicunapaj varapica, Aaronbaj shutita escribingui. Paicunapaj taitacunapaj mirai familiacunata mandajcunaca, tucuicunami vara caspita charinajunga.

⁴Chaicunataca, imashna causanata ñuca yachachishca shimicuna tiajuj ñaupajpi, ñucahuan tuparina jatun carpapi churangui. Chaipimi, ñucaca cangunaman ricurisha.

⁵Chaipillatami, ñucata servichun maijanda ñuca agllashca runapaj vara caspica sisanga. Shina rurashpami israelcuna, ñuca ñaupajpi aij nishpa ninanda nalicachishpa rimanajujtaca tucuchisha” nijurcami.

⁶Shina nijpimi Moisesca, israelcunataca chashnallata nigrirca. Chaimandami paicunata tucuilla mandajcunaca, vara caspicunata Moisesman cunajurca. Paicunapaj taitacunapaj huasi ucu puracunata tucui mandajcunami, chunga ishcai varacunata cunajurca. Aaronbaj vara caspica, caishujcunapaj varacunapaj chaupipimi carca.

⁷Moisesca, imashna causanata Dios yachachishcacuna tiajuj carpapimi, Mandaj Diospaj ñaupajpi chai varacunataca churarca.

⁸Cayandi tutamandami, cashna tucurca: Moisesca, imashna causanata Dios yachachishca shimicunata alichishca tiajuj jatun carpamanmi shamurca. Chaipimi, Levipaj huasi ucupura Aaronbaj varapica, verdeyashpa, sisashpa retoñashca carca. Shinallata almendra nishca muyucunapashmi fucushca carca.

⁹Shina sisashcata ricushpami Moisesca, tucuilla varacunata Mandaj Diospaj ñaupajmanda tucuilla israelcunapajman llujchimurca. Shinata ricushpami, paicunapaj varataca tucuicuna japinajurca.

¹⁰Mandaj Diosca, Moisestaca cashnami nirca: “Aaronbaj varataca, imashna causanata ñuca yachachishca shimicuna tiajuj ñaupajpillata churagri. Chai varataca, israelcuna ñucata na cazushcata yarichina cachun alichigri. Chashnami, paicuna ama huañuchunga, ñuca ñaupajpi aij nishpa ñucata nalicachinajujtaca saquichingui” nircami.

¹¹Shina nijpimi Moisesca, Mandaj Dios mandashcashnallata rurarca. Chashnatapachami rurarca.

¹²Shina rurajpimi israelcunaca, Moisestaca cashna ninajurca: “Ricui, ñucanchica huañushcamari canchi. Ñucanchica chingashcamari canchi. Ñucanchica, tucuillamari chingashca canchi.

¹³Mandaj Diospaj jatun carpaman maijambash shamushpa quimirishpaca, huañungallami. ¿Ñucanchica, tucuillachu huañushpa tucurishun?” ninajurcami.