Read Imbabura Highland Quichua NÚMEROS 2 Bible Online

NÚMEROS 2 - Imbabura Highland Quichua bible

NÚMEROS 2

¹Mandaj Diosca Moisesmambash, Aaronmambash cashna nishpami villajurca:

²“Israelcunaca, tucuicunami paicunapaj bandera ladocunapi carpacunata shayachishpa tianajunga. Paicunapaj ñaupa taitacunapaj mirai familiacuna imashna tandanajushcata ricuchijuj ucupimi, chashna tianajunga. Ñucahuan tuparina jatun carpa muyundicunapimi, chashna tianajunga.

³Indi llujshimuj ladoman carpacunapica, caicunami tianajunga: Judá shuti aillupaj carpacunapica, soldadocuna imashna tandanajushcapimi, banderahuan tianajunga. Judá runapaj miraicunata mandajca, Aminadab shuti runapaj churi Naasón shuti runami canga.

⁴Tucuilla soldadocunata cuentashcashnallata, 74.600 soldadocunami.

⁵Judá aillupaj ladopica, Isacar aillu runacunami carpacunapi tianajunga. Isacarpaj miraicunata mandajca, Zuar shuti runapaj churi Natanaelmi canga.

⁶Tucuilla soldadocunata cuentashcashnallata, 54.400 soldadocunami.

⁷Zabulón aillu soldadocunapashmi, caishuj ladoman tianajunga. Zabulonbaj miraicunata mandajca, Helón shuti runapaj churi Eliabmi canga.

⁸Tucuilla soldadocunata cuentashcashnallata, 57.400 soldadocunami.

⁹Judá aillu soldadocunapaj carpacunapi cuentashcashnallata, 186.400 soldadocunami. Paicunami, soldadocuna imashna tandanajushcapimi, ñaupashpa rinajunga.

¹⁰Rubén aillupaj carpacunapica, soldadocuna imashna tandanajushcapimi, banderahuan ura ladoman tianajunga. Rubenbaj miraicunata mandajca, Sedeur shuti runapaj churi Elisurmi canga.

¹¹Tucuilla soldadocunata cuentashcashnallata, 46.500 soldadocunami.

¹²Simeón aillu soldadocunapashmi, caishuj ladoman tianajunga. Rubenbaj miraicunata mandajca, Zurisadai shuti runapaj churi Selumielmi canga.

¹³Tucuilla soldadocunata cuentashcashnallata, 59.300 soldadocunami.

¹⁴Gad shuti aillu soldadocunapashmi, chaishuj ladoman tianajunga. Gadpaj miraicunata mandajca, Reuel shuti runapaj churi Eliasafmi canga.

¹⁵Tucuilla soldadocunata cuentashcashnallata, 45.650 soldadocunami.

¹⁶Rubén aillu soldadocunapaj carpacunapi cuentashcashnallata, 151.450 soldadocunami. Paicunapaj soldadocuna imashna tandanajushcapimi, catishpa rinajunga.

¹⁷Chaipaj catipica, ñucahuan tuparina jatun carpata apajcunami, levitacunapaj carpacunata apajcunapaj chaupipi rinajunga. Imashna carpacunapi tianajushcashnallatami, carpacunata apajcunapaj chaupipi rinajunga. Shinami, tucuicuna paicunapaj banderahuan rinajunga.

¹⁸Efraín aillupaj carpacunapica, soldadocuna imashna tandanajushcapimi, indi huashajuj ladoman banderahuan tianajunga. Efrainbaj miraicunata mandajca, Amiud shuti runapaj churi Elisamami canga.

¹⁹Tucuilla soldadocunata cuentashcashnallata, 40.500 soldadocunami.

²⁰Manasés aillu soldadocunapashmi, chaishuj ladoman tianajunga. Manasespaj miraicunata mandajca, Pedasur shuti runapaj churi Gamalielmi canga.

²¹Tucuilla soldadocunata cuentashcashnallata, 32.200 soldadocunami.

²²Benjamín aillu soldadocunapashmi, chaishuj ladoman tianajunga. Benjaminbaj miraicunata mandajca, Gedeoni shuti runapaj churi Abidán shuti runami canga.

²³Tucuilla soldadocunata cuentashcashnallata, 35.400 soldadocunami.

²⁴Efraín aillu soldadocunapaj carpacunapi cuentashcashnallata, 108.100 soldadocunami. Paicunapaj soldadocuna imashna tandanajushcapimi, ishcai aillupaj huashapi catinajunga.

²⁵Dan shuti aillupaj carpacunapica, soldadocuna imashna tandanajushcapimi, jahua ladoman banderahuan tianajunga. Dan aillupaj miraicunata mandajca, Amisadai shuti runapaj churi Ahiezer shuti runami canga.

²⁶Tucuilla soldadocunata cuentashcashnallata, 62.700 soldadocunami.

²⁷Aser shuti aillu soldadocunapashmi, chaishuj ladoman tianajunga. Aser aillupaj miraicunata mandajca, Ocrán shuti runapaj churi Pagiel shuti runami canga.

²⁸Tucuilla soldadocunata cuentashcashnallata, 41.500 soldadocunami.

²⁹Neftalí aillu soldadocunapashmi, caishuj ladoman tianajunga. Neftalipaj miraicunata mandajca, Enán shuti runapaj churi Ahira shuti runami canga.

³⁰Tucuilla soldadocunata cuentashcashnallata, 53.400 soldadocunami.

³¹Dan aillu soldadocunapaj carpacunapi cuentashcashnallata, 157.600 soldadocunami. Paicunami, tucuilla soldadocunapaj banderacunata catishpa rinajunga” nijurcami.

³²Paicunapaj ñaupa taitacunapaj huasi ucu puracuna imashna tandanajushcapi cuentai tucushca israelcunaca, caicunami: Carpacunapi imashna tianajushcashnallata, soldadocuna imashna tandanajushcapi tucuillata cuentajpica, 603.550 soldadocunami.

³³Ashtahuangarin Mandaj Dios imashna Moisesta mandashcashnallatami levitacunaca, Israel puracunapica na cuentai tucunajurca.

³⁴Israelcunaca, tucuitami Mandaj Dios imashna Moisesta mandashcashnallata ruranajurca. Chashnami, paicunapaj bandera ladocunapi, paicunapaj carpacunapi tianajurca. Paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapimi, tucuicuna rinajurca.