Read Imbabura Highland Quichua NÚMEROS 20 Bible Online

NÚMEROS 20 - Imbabura Highland Quichua bible

NÚMEROS 20

¹Tandanajushca tucui israelcunaca, huatapaj callari punda quillapimi, Zin nishca jichushca pambaman tucuicuna chayamurca. Chaiman chayamushpaca, Cades shuti pueblopimi unaicaman causanajurca. Chaipimi, Moisespaj pani Mariaca huañurca. Paitaca chaipillatami pambarca.

²Chaipica, tandanajushca israelcunapaj yacu na tiajpimi Moisestapash, Aarondapash fiñashpa rimangapaj tandanajurca.

³Chaipimi israelcunaca, Moisesta fiñashpa, cashna nishpa rimanajurca: —Mandaj Diospaj ñaupajpi ñucanchi huauquicuna huañushca horallata ñucanchipash huañushpachari, ali canchiman carca.

⁴Mandaj Diospajlla tandanajushca israelcunataca, ¿imashpata cai jichushca pambaman pushamurcangui? ¿Ñucanchipash, ñucanchi animalcunapash huañuchunllachu pushamurcangui?

⁵¿Imashpata ñucanchitaca Egiptomanda llujchishpa, cai nali pushtuman vichai pushamurcangui? Caipica jigoscunata, uvascunata, granadillacunata tarpungapajpash na alichu. Ufiangapaj yacullapash na tianllu— ninajurcami.

⁶Chashna rimajpimi Moisespash, Aaronbash chai tandanajushca israelcunapaj ñaupajmanda anchurishpa, Dioshuan tuparina jatun carpa punguman rinajurca. Chaiman ña chayashpaca cungurishpami, alpaman chayajta cumurinajurca. Chaipimi Mandaj Diosca, paicunapaj jahuapi punchapamba ricurirca.

⁷Chaipimi Mandaj Diosca, Moisesman cashna nishpa villarca:

⁸—Cambaj vara caspita japi. Chai jipaca, cambaj huauqui Aaronhuan ishcai tucushpa, tucuilla israelcunata tandachimushpa, paicunapaj ñaupajpi chai jaca rumita rimai. Shina rimajpimi chai rumimandaca, ashtaca yacu llujshinga. Chai jaca rumimanda yacuta llujchishpami, tandanajushca israelcunamambash, paicunapaj animalcunamambash ufiachun carangui— nircami.

⁹Shina nijpimi Moisesca, Mandaj Diospaj ñaupajmanda vara caspitaca, Dios mandashcashnallata japirca.

¹⁰Chai jipami, tandanajushca israelcunataca Moisespash, Aaronbash, chai jaca rumi ñaupajman tandachishpa cashna nirca: —¡Na cazuj gentecuna, cunanga uyaichi! ¿Cai jaca rumimandachu, yacuta llujchina canchi?— nircami.

¹¹Shina nishpami Moisesca, paipaj maquita alsashpa chai jaca rumitaca, paipaj vara caspihuan ishcaicaman huactarca. Shina huactajpimi, yacuca ashtaca llujshijurca. Shina llujshijujpimi tandanajushca israelcunapash, paicunapaj animalcunapash yacuta ufianajurca.

¹²Chaipimi Mandaj Diosca Moisestapash, Aarondapash cashna nirca: —Cangunaca, ñucata na crishpami, ñuca jucha illaj cajtaca, israelcunapaj ñaupajpi na ricuchircanguichi. Chaimandami tandanajushca cai israelcunataca, ñuca carashca llactaman na chayachi ushanguichi— nircami.

¹³Caicunaca, fiñanajui nishca yacucunami. Chai yacucunamandami israelcunaca, Mandaj Dioshuan fiñanajurca. Diosca paicuna purapica, jucha illaj cajtami ricuchirca.

¹⁴Cades shuti pueblomandapachami Moisesca, paipaj randi rimajcunata Edom shuti llactata jatun mandajta cashna nichun cacharca: “Cambaj huauqui israelcunaca, candaca cashnami ninajun: ‘Tucui llaquicunata ñucanchi charijtaca, canllata alimi yachangui.

¹⁵Ñucanchi taitacuna Egiptoman urai rishcamandami ñucanchica, Egiptopillata unai huatacunata causarcanchi. Chaipimi, Egiptopi causajcunaca ñucanchitapash, ñucanchi taitacunatashnallata ninanda llaquichinajurca.

¹⁶Shinamandami ñucanchica, Mandaj Diosta caparishpa mañanajurcanchi. Ñucanchi mañanajujpi Mandaj Dios uyashpami, paipaj angelta cachamushpa, Egiptomanda llujchimurca. Ricui cunanga, cambaj llacta lindero ladollacunapi tiaj Cades shuti pueblopimi canchi.

¹⁷Shina cashcamanda cambaj llactata yalingapaj cambaj ñanda mañachihuai nipanchimi. Cangunapaj tarpushca chagracunatapash, uvas chagracunatapash na yalipashunllu. Canguna yacuta llujchingapaj allashca jatun utujucunamanda, yacutapash na ufiapashunllu. Cambaj llactata yalingacaman ali ladomambash, lluqui ladomambash na llujshishpami, jatun mandajpaj ñandalla yalipashun’ ninajunmi” nichunmi cacharca.

¹⁸Shina nijpimi shuti llactata jatun mandajca, cashna nishpa tigrachirca: —Ñuca llactataca, napacha yalinguichu. Na uyashpa yalingapaj munajpica, macanajunacunahuan alichirishpami, canhuan macanajungapaj llujshisha— nircami.

¹⁹Shina nijpimi israelcunaca, cashna ninajurca: —Ñucanchica, jatun ñandallamari ripashun. Ñucanchipash, ñucanchi animalcunapash, cambaj yacucunata ufiashpaca, chai yacumandaca mashna cajpipash cupashunllami. Chaquilla yalingapajlla saquihuai. Chaica, imapash na cangachu— ninajurcami.

²⁰Ashtahuangarin Edom shuti llactata jatun mandajca: —Caitaca napacha yalinguichu— nishpami tigrachirca. Shina nishpami Edom llactata jatun mandajca, Moisesta fiñashpa, ninan shinlli, ashtaca soldadocunandi macanajungapaj llujshirca.

²¹Edom llactata mandajca, paipaj llactata israelcuna yalinajuchun saquingapaca na munarcachu. Chaimandami israelcunaca, chai llactamanda anchurinajurca.

²²Israelcuna, Cades shuti pueblomanda llujshishpaca, tucui chai tandanajushca gentecunami, Hor shuti urcuman shamunajurca.

²³Mandaj Diosca, Hor shuti urcupi, Edom shuti llacta linderopimi Moisesmambash, Aaronmambash, cashna nishpa villarca:

²⁴“Aaronga huañushpami, paipaj gentecunahuan tandanajunga. Paica, israelcunaman ñuca carashca llactaman na yaicungachu. Fiñanajui nishca yacu ladopi canguna ñuca mandashcata na cazushcamandami, na yaicunga.

²⁵Canga Aarondapash, paipaj churi Eleazartapash japishpa, Hor shuti urcuman pushashpa vichai ringui.

²⁶Chaipica, Aarón cura churajushcata surcuchishpa, chai churajunataca paipaj churi Eleazarman churachingui. Aaronga chaipi huañushpami, paipaj gentecunahuan tandanajunga” nircami.

²⁷Mandaj Dios mandashcashnallatami, Moisesca rurarca. Chaimandami, tandanajushca tucuilla israelcuna ricujta Hor shuti urcuman vichai rinajurca.

²⁸Chaiman chayashpami Moisesca, Aarón churajushcacunata surcuchishpa, Aaronbaj churi Eleazarman churachirca. Aaronga, chai urcu jahuapimi huañurca. Moiseshuan, Eleazarhuanga chai urcumanda urai shamurcallami.

²⁹Aarón huañushcata tucuilla tandanajushca israelcuna yachashpaca, tucuilla Israel familiacunami quimsa chunga punllacunacaman, ninanda llaquirinajurca.