Read Imbabura Highland Quichua NÚMEROS 21 Bible Online

NÚMEROS 21 - Imbabura Highland Quichua bible

NÚMEROS 21

¹Neguev llactapi causanajuj cananeocunata jatun mandajca, chai llactapillata tiajuj Arad shuti pueblopimi causajurca. “Atarim shuti puebloman rina ñandami, israelcuna shamunajun” nijtami paica uyarca. Chaimandami paica, israelcunahuan macanajushpa, huaquin israelcunata prezu japirca.

²Shinamandami israelcunaca pactachishumbacha nishpa, Mandaj Diostaca cashna ninajurca: “Cai gentecunata ñucanchi maquipi churajpica, paicunapaj tucuilla pueblocunandimi tucuchishun” ninajurcami.

³Israelcuna mañanajujta Mandaj Dios uyashpami cananeocunataca, paicunapaj maquipi churarca. Shina churajpimi paicunataca, paicunapaj pueblocunandi tucuchirca. Shinamandami chai llactataca, Horma shutita shutichirca.

⁴Chai jipami israelcunaca, Hor shuti urcumandaca, Edom llactata muyugringapaj, Puca Cuchaman rina ñanda rinajurca. Paicunaca, chai ñanda rinajushpallatami, na ashtahuan ringapaj munanajurca.

⁵Chaimandami gentecunaca Taita Diostapash, Moisestapash fiñashpa cashna rimanajurca: —¿Imashpata ñucanchitaca llujchimurcangui? ¿Cai jichushca pambapi huañuchunllachu, Egiptomanda vichai pushamurcangui? Caipica yacupash, micunapash na tianga. Ñucanchi shungupica cai yanga micunataca, ña amishcami canchi— ninajurcami.

⁶Shina nijpimi Mandaj Diosca, rupachinshna nanachij culebracunata, Israel puracunapajman cachamurca. Chai culebracuna canijpimi Israel purapica, ashtaca gentecuna huañunajurca.

⁷Shina tucujpimi israelcunaca, Moisespajman shamushpa cashna ninajurca: —Ñucanchica, Mandaj Diostapash, candapash fiñashpa rimashpami, juchata rurashcanchi. Cunanga, cai culebracunata ñucanchimanda anchuchipachun, Mandaj Diosta ninanda mañapai— ninajurcami. Shina nijpimi Moisesca, israelcunamanda Diosta mañarca.

⁸Shina mañajpimi Mandaj Diosca, Moisesta cashna nirca: —Rupachinshna nanachij culebrata rurashpa, banderata huarcuna caspipi churai. Maijanda cashpapash culebrapi cani tucushpaca, chai caspipi culebrata ricushpami na huañunga— nircami.

⁹Shina nijpimi Moisesca, broncemanda culebrata rurashpa, banderata huarcuna caspipi churarca. Shina churajpimi, maijanda cashpapash culebra canijpica, chai bronce culebrata ricushpa na huañurca.

¹⁰Chaimanda israelcuna rishpaca, Obot shuti pushtupi carpacunata shayachishpami tianajurca.

¹¹Obot shuti pushtumanda rishpaca, Moab shuti llacta chimba purapi tiaj Ije-abarim shuti jichushca pambapimi, carpacunata shayachishpa tianajurca. Chai pambaca, indi llujshimuj ladomanmi.

¹²Ije-abarim shuti pambamanda rishpaca, Zered shuti pugru pambapimi carpacunata shayachishpa tianajurca.

¹³Zered shuti pugru pambamanda rishpaca, Arnón shuti jatun larca yacu chimba lado jichushca pambapimi, carpacunata shayachishpa tianajurca. Chai yacuca, amorreocunapaj llactamandami llujshimujun. Arnón shuti chai jatun larca yacumi, Moab llactahuan, amorreocunapaj llactahuan lindero.

¹⁴Shinamandami, Mandaj Diospaj jatun macanajuicunamanda escribishca libropica cashna nijun: “Diosca, Puca Cuchapipash, Arnón shuti jatun larca yacu manñacunapipashmi ayudarca.

¹⁵Shinallata jatun larcacuna tandanajushpa ninanda rijuj yacu ladopipashmi ayudarca. Chai yacuca, Ar shuti pueblocaman chayashpami, Moab llacta linderopi samajun” nijunmi.

¹⁶Arnón shuti jatun yacumandaca, Beer shuti pushtumanmi shamunajurca. Yacuta llujchingapaj allashca jatun utujumanda villashpami Mandaj Diosca, Moisestaca cashna nirca: “Gentecunata tandachi. Paicunamanmi yacuta carasha” nircami.

¹⁷Shinamandami israelcunaca, cashna nishpa candanajurca: “Yacuta llujchingapaj allashca pugyulla, yacuta llujchiyari. Diosman candaichiyari.

¹⁸Yacuta llujchina chai utujutaca, mandajcunami allanajurca. Israelcunata mandajcunami allanajurca. Mandashcacunata cujcunami, paicunapaj taunacunahuan allanajurca” nishpami candanajurca. Israelcunaca, jichushca pambamandaca, Matana shuti pushtumanmi shamunajurca.

¹⁹Matana shuti pushtumandaca, Nahaliel shuti pushtumanmi shamunajurca. Nahaliel shuti pushtumandaca, Bamot shuti pushtumanmi shamunajurca.

²⁰Bamot shuti pushtumandaca, Moab pambacunapi tiaj pugru pambaman, jichushca pamba chimba purapi tiaj Pisga shuti urcu jahuamanmi shamunajurca.

²¹Shinamandami israelcunaca, amorreocunata jatun mandaj Sehón shuti runata cashna nichun, paicunapaj randi rimajcunata cacharca:

²²“Ñucanchimi, cambaj llactata yalingapaj munapanchi. Tarpushca pambacunapipash, uvas chagracunapipash na yaicupashunllu. Yacuta llujchingapaj allashca utujumanda cambaj yacutapash, na ufiapashunllu. Cambaj llactata yalingacaman, jatun mandajpaj ñandallami yalipashun” nichunmi cacharca.

²³Shina cachajpipash Sehón shuti runaca, israelcunata paipaj llactata yalichunga na saquircachu. Ashtahuangarin Sehón shuti runaca, paipaj gentecunata tucuilla tandachishpami, israelcunahuan macanajungapaj, jichushca pambaman shamurca. Paica, Jahaza shuti pueblo ladocaman shamushpami, israelcunahuan macanajurca.

²⁴Chaipimi israelcunaca, chai jatun mandajta espadahuan huañuchishpa, paipaj llactata japinajurca. Arnón shuti yacumandaca, Amón shuti llactapi tiaj Jaboc shuti jatun yacucamanmi japinajurca. Amón shuti llacta linderopica, shinllitapacha jarcashcami carca.

²⁵Israelcunaca, tucuilla cai pueblocunata japishpami, amorreocunapaj tucuilla pueblocunapi causanajurca. Shinallata Hesbón shuti pueblopipash, chai pueblo muyundi uchilla llactacunapipashmi causanajurca.

²⁶Hesbón shuti puebloca, amorreocunata jatun mandaj Sehón shuti runa causajuj pueblomi carca. Paimi pundaca, Moab llactata jatun mandajhuan jatun macanajuita charishca carca. Shina macanajushpami, pai mandajushca tucui llactataca, Arnón shuti yacucaman quichushca carca.

²⁷Chaimandami, yarichij shimicunata ali yachajcunaca, cashna ninajun: “Hesbón shuti puebloman shamuichi. Jatun mandaj Sehón shuti runapaj pueblotaca, cutin alichishpa, cutin shayachipaichi.

²⁸Hesbón shuti pueblomandaca, ninami llujshirca. Sehón shuti runapaj pueblomandaca, rupajuj nina llujshishpami, Moab llactapi tiaj Ar shuti pueblota tucuchirca. Arnón shuti yacu jahua ladocunapi causanajuj mandajcunatapashmi huañuchirca.

²⁹¡Aij Moab llactalla, imachari tucungui! Quemos shuti diosta mañashpa causajcunaca, tucurircanguichimari. Cambaj churicunaca, pacajungapajmi calpanajurca. Cambaj ushicunapash, amorreocunata jatun mandaj Sehón shuti runa prezu apajpimi rinajurca.

³⁰Ashtahuangarin paicuna mandanajuj llactataca tucuchircanchimi. Hesbón shuti pueblomandaca, Dibón shuti pueblocamanmi tucurirca. Shinallata Nofa shuti pueblocaman, Medeba shuti pueblocamambashmi tucuchircanchi” ninajunmi.

³¹Chashnami israelcunaca, amorreocunapaj llactapi causanajurca.

³²Moisesca, Jazer shuti pueblotapashmi ricugrichun cacharca. Chai pueblotapash, muyundi uchilla llactacunandi quichushpami, chaipi causanajuj amorreocunataca llujchishpa cacharca.

³³Chaimanda tigrashpami, Basán shuti llactaman rina ñanda vichai rinajurca. Chaita rinajujpimi, Basán shuti llactata jatun mandaj Og shuti runaca, israelcunahuan Edrei shuti pueblo ladopi macanajungapaj paipash, paipaj gentecunandi llujshirca.

³⁴Chaipimi Mandaj Diosca, Moisesta cashna nirca: “Ama manllaichu. Ñucami, chai jatun mandajtaca, paipaj tucuilla gentecunandi, paipaj tucuilla llactandi, cambaj maquipi churarcani. Paicunataca, amorreocunata mandashpa, Hesbón shuti pueblopi causajushca jatun mandaj Sehón shuti runata imashna rurashcashnallatami rurangui” nircami.

³⁵Shina nijpimi israelcunaca, Og shuti jatun mandajtaca, paipaj churicunandi, tucuilla paipaj gentecunandi, shujllatapash causajta na saquishpa huañuchinajurca. Shina huañuchishpami, paicunapaj llactataca japinajurca.