Read Imbabura Highland Quichua NÚMEROS 22 Bible Online

NÚMEROS 22 - Imbabura Highland Quichua bible

NÚMEROS 22

¹Israelcuna chaimanda rishpaca, Jordán yacu ladopi, Jericó shuti pueblo chimba purapi tiaj Moab llacta pambacunapimi, carpacunata shayachishpa tianajurca.

²Zipor shuti runapaj churi Balac shuti runaca, israelcuna amorreocunata imatalla rurashcatami, tucuita ricurca.

³Moab shuti llactapi causajcunaca, ashtaca israelcuna tiajta ricushpami, ninanda manllanajurca. Israelcunata manllashpami, Moab llactapi causajcunaca ninanda llaquirinajurca.

⁴Chaimandami Moab llactapi causajcunaca, Madián shuti llactata mandaj rucucunata cashna ninajurca: “Ricuichi, cunanmi cai tucuilla israelcunaca, ñucanchi muyundipi causajcunataca, pambapi jihuata huagra lambishpa micunshna tucuchinga” ninajurcami. Chai punllacunapica, Moab llactataca, Zipor shuti runapaj churi Balac shuti runami mandajurca.

⁵Shinamandami, Beor shuti runapaj churi Balaam shuti runata cayachun villaj runacunata cacharca. Balaam shuti runaca, paipaj llacta puracuna causanajuj jatun yacu ladopi tiaj Petor shuti pueblopimi causajurca. Chai llactamanmi Balac shuti runaca, Balaam shuti runata cashna nishpa cayachun, paipaj runacunata cacharca: “Egiptomandami ashta gentecacuna llujshimushpa, tucuilla cai llactacunapi jundamunajun. Paicunaca, ñuca ñaupajpillatami causanajun.

⁶Shina cashcamanda cunanga cai gentecunataca, ima llaquipash japishpachari ali canman ningapaj shamupai. Can shina rurajpica, paicunata huañuchitapash, cai llactamanda llujchishpa cachaitapash ushashapashchari. Maijandapash can alicachi tucushca cachun nijpica, alicachi tucunllami. Maijandapash can ima llaquipash japishpami ali canman nijpica, shina tucungallami. Chaitaca yachapanimi” nishpa cayachunmi cacharca.

⁷Shina nijpimi, Moab llactata mandaj rucucunapash, Madián shuti llactata mandaj rucucunapash, yachajcunaman caranacunata apashpa rinajurca. Balaam shuti runapajman chayashpaca, Balac shuti runa imatalla nishcatami villanajurca.

⁸Shina villajpimi, paicunataca cashna nirca: —Cunan tutaca, caipi samaichilla. Shina cajpimi, Mandaj Dios imatalla ñucaman villashcashnallata cangunaman villasha— nircami. Shina nijpimi Moab llactata mandajcunaca, Balaam shuti runapaj huasipi pacarinajurca.

⁹Shinamandami Taita Diosca, Balaam shuti runapajman shamushpa: —¿Canhuan caipi tianajuj runacunaca, picunata?— nishpa tapurca.

¹⁰Shina nijpimi Balaam shuti runaca, Taita Diosman cashna nishpa tigrachirca: —Moab llactamanda Zipor shuti runapaj churi jatun mandaj Balac shuti runami, ñucata cashna nichun cachamushca:

¹¹‘Ricui, Egiptomanda llujshimushca cai gentecunami, tucui cai llactapi ninanda jundashpa causanajun. Shina cashcamanda cunanga paicunataca, ima llaquipash japishpami ali canman ningapaj shamupai. Can shina rurajpica, paicunataca macanajushpa mishashpa, cai llactamanda llujchishpa cachai ushashapashchari’ nichunmi cachamushca— nijurcami.

¹²Shina nijpimi Taita Diosca, Balaam shuti runataca cashna nirca: —Chai runacunahuanga, ama richu. Chai gentecunatapash, ima llaquipash japishpami ali canman ningapaca, ama richu. Paicunaca bendiciai tucushcacunami— nircami.

¹³Shina nijpimi Balaam shuti runaca tutamandata jatarishpa, Balac shuti runa cachamushca mandajcunataca, cashna nirca: —Cangunapaj llactaman tigraichilla. Mandaj Diosmi ñucataca, cangunahuan richun saquingapaca na munan— nircami.

¹⁴Shina nijpimi, Moab llactata mandajcuna jatarishpa, Balac shuti runapajman tigramushpaca: —Balaam shuti runaca, ñucanchihuan shamungapaca na munarcachu— ninajurca.

¹⁵Jatun mandaj Balac shuti runaca, cutinmi ashtahuan shuj mandajcunata cacharca. Paicunaca, caishujcunata ashtahuan yali alicachi tucushcacunami carca.

¹⁶Paicunapash Balaam shuti runapajman shamushpami, cashna ninajurca: —Zipor shuti runapaj churi Balac shuti runaca, cashnami nin: ‘Ñucapajman shamunataca, ama saquipaichu nipanimi.

¹⁷Na llullashpami nini. Candaca ninandami alicachisha. Can imata mañajpipash, cupashallami. Shina cashcamanda cunanga cai gentecunataca, ima llaquipash japishpami ali canman ningapaj shamupailla’ ninmi— ninajurcami.

¹⁸Shina nijpimi Balaam shuti runaca, Balac shuti runata servijcunataca cashna nijurca: —Jatun mandaj Balac shuti runapaj huasi ucu junda orota, culquita cujpipash, na cazui ushapanichu. Ñucata Mandaj Taita Dios, ama ruranguichu nishcataca, ashalla cajpipash, ashtaca cajpipash, na rurai ushapanichu.

¹⁹Chaimanda cunan tutaca, caipi samapaichilla nipanimi. Mandaj Dios ñucaman cunan tuta cutin imata nijta yachasharami— nijurcami.

²⁰Mandaj Diosca chai tutami, Balaam shuti runapajman shamushpa cashna nirca: —Chai runacuna canda pushangapaj shamushca cajpica, jatarishpa paicunahuan rilla. Shina cajpipash ñuca imata rurai nishcatalla rurangui— nircami.

²¹Chashnami Balaam shuti runaca, tutamandata jatarishpa, paipaj burropi tiarinata churashpa chaipi tiarishpa, Moab llactata mandajcunahuan rirca.

²²Balaam shuti runa rijujpimi Taita Diosca, nina japirinshna ninanda fiñarirca. Chaimandami Mandaj Diospaj angelca, paita na ricunayachij runashna ñambi jarcashpa shayarirca. Paica, paipaj burropi tiarishpami rijurca. Paihuanga, paita servij ishcai runacunapashmi rinajurca.

²³Balaam shuti runa tiarishca rijuj burroca, Mandaj Diospaj angeltaca, espadata chaririaj chaupi ñambi shayajujtami ricurca. Chaita ricushpami burroca, ñanmanda llujshishpa pambata rirca. Shinamandami Balaam shuti runaca, burrotaca ñanman tigrachingapaj astijurca.

²⁴Ashtahuangarin Mandaj Diospaj angelca, ishcandi ladoman pircashca uvas chagra chaupita rina chaqui ñambimi shayarirca.

²⁵Burroca, Mandaj Diospaj angelta ricushpami, pirca ladoman quimirishpa, Balaam shuti runapaj chaquita pircapi llapirca. Chaimandami Balaam runaca, burrotaca cutin asti callarirca.

²⁶Mandaj Diospaj angelca, ashtahuan chai ladomanmi rirca. Shina rishpaca, ali ladomambash, lluqui ladomambash anchuringapaj ñan illaj quichiji ñambimi shayarigrirca.

²⁷Burroca, Mandaj Diospaj angelta ricushpami, na yali ushashpa Balaam shuti runa tiajujpillata, alpapi siririrca. Chaimandami Balaam shuti runaca, ninanda fiñarishpa, burrotaca caspihuan astijurca.

²⁸Chaipimi Mandaj Diosllata rimachijpi chai burroca, Balaam shuti runataca cashna nirca: —Caihuanga, ña quimsacaman astingapaca, ¿candaca imatata rurarcani?— nircami.

²⁹Shina nijpimi Balaam shuti runaca, burroman cashna nishpa tigrachirca: —¿Imashpata ñucata na cazuhuangui? ¡Espadata ñuca maquipi charijushcaiman, cunanllatami candaca huañuchiman!— nircami.

³⁰Shina nijpimi burroca, Balaam shuti runataca cashna nirca: —Ñucaca, ¿nachu cambaj burro cani? Canga, ñucata charishca punllamanda cunangamanmi, maimambash ñucapi tiarishpa purijungui. Ashtahuangarin candaca, ¿chashna na cazunata yachashcanichu?— nircami. Shina nijpimi, Balaam shuti runaca: —Na chashna rurashcanguichu— nishpa tigrachirca.

³¹Balaam shuti runapaj ñavita pascanshna, Mandaj Dios ricuchijpimi, Mandaj Diospaj angeltaca, espadata chaririaj chaupi ñambi shayajujta ricurca. Chashna ricushpami, Balaam shuti runaca cungurishpa, alpaman chayajta cumurirca.

³²Chaipimi Mandaj Diospaj angelca, Balaam shuti runataca cashna nirca: —Cambaj burrotaca, ¿imashpata quimsacaman astingui? Ricui canga, ñuca ñaupajpi jatun nalita rurangapaj rijujpimi, jarcangapaj shamurcani.

³³Burroca, ñucata ricushpami ñuca ñaupajmandaca, quimsacaman anchurirca. Burro na anchurijpica, ñucapashmi candaca cunanda huañuchishpa, paitaca causajta saquiman carcani— nircami.

³⁴Shina nijpimi Balaam shuti runaca, Mandaj Diospaj angeltaca cashna nirca: —Ñucaca juchatami rurapashcani. Cai ñambi shayarishpa, ñuca ñaupajpi can jarcajujtaca, na yachapashcanichu. Ashtahuangarin cunanga, ñuca chaiman rina cambi nali cajpica, tigrapashallami— nircami.

³⁵Shina nijpimi Mandaj Diospaj angelca, Balaam shuti runataca cashna nirca: —Chai runacunahuan rilla. Shina cajpipash, ñuca imata rimai nishcatallami rimana cangui— nircami. Shina nijpimi Balaam shuti runaca, Balac shuti runa cachashca mandajcunahuan rirca.

³⁶Balaam shuti runaca, ñami chayamujun nijta uyashpami Balac shuti runaca, Moab llactapi tiaj shuj pueblopi tuparingapaj llujshirca. Chai puebloca, Moab llacta lindero, Arnón shuti yacu ladollapimi carca. Chai yacuca, Moab llacta manñapimi.

³⁷Chaipi tuparishpami Balac shuti runaca, Balaam shuti runataca cashna nirca: —¿Nachu candaca ñuca cayachun cacharcani? ¿Imashpata ñucapajman na shamungapaj munarcangui? ¿Nachu candaca, alicachinapi churai ushani?— nircami.

³⁸Shina nijpimi Balaam shuti runaca, Balac shuti runaman cashna nishpa tigrachirca: —Ricui, ñucaca ñami cambajman shamuni. Ashtahuangarin cunanga, ¿imatallapash parlai ushashacha imashi? Ñuca shimihuanga, Taita Dios imata rimachun nishcatallami rimai ushani— nircami.

³⁹Chai jipami Balaam shuti runapash, Balac shuti runapash, Quiriat-huzot shuti puebloman shamunajurca.

⁴⁰Chai pueblopimi Balac shuti runaca, huagracunata, llamacunata huañuchinajuchun mandarca. Shina huañuchishpami Balaam shuti runamambash, pushangapaj rishca mandajcunamambash carachun cacharca.

⁴¹Chai cayandi punllami Balac shuti runaca, Bamot-baal shuti urcu jahuaman, Balaam shuti runata vichai pusharca. Chai urcu jahuamandami, ashtahuan ladolla tianajuj gentecunata ricurca.