Read Imbabura Highland Quichua NÚMEROS 23 Bible Online

NÚMEROS 23 - Imbabura Highland Quichua bible

NÚMEROS 23

¹Chaipimi Balaam shuti runaca, Balac shuti runataca cashna nirca: —Canchis altarta ñucaman caipi rurapai. Shinallata canchis shicutapash, canchis jari llamatapash huañuchishpa, caipi churapai— nircami.

²Balac shuti runaca, Balaam shuti runa nishcashnallatami rurarca. Balaac shuti runaca, Balaam shuti runahuan ishcai tucushpami, shuj shicuhuan, shuj jari llamahuan cada altarpi churashpa rupachinajurca.

³Chai jipami Balaam shuti runaca, Balac shuti runataca cashna nirca: —Canga, animalcunata Diosman cushpa tucuillata rupachijuj ladopi shuyailla. Mandaj Diosca, ñucata tuparingapaj shamungapashchari, ñucaca rigrinimi. Pai imata ñucaman ricuchijpipash, canman villashallami— nishpami, imapash illaj jichushca urcuman rirca.

⁴Taita Diosca, chaipi Balaam shuti runahuan tuparingapaj shamujpimi, Balaam shuti runaca cashna nirca: —Ñami canchis altarta rurashpa, chai altarcunapica, cada altarpi shuj shicuhuan, shuj jari llamahuan rupachircani— nircami.

⁵Shina nijpimi Mandaj Diosca, paipaj shimita rimachun Balaam shuti runaman yuyaita cushpa: —Balac shuti runapajman tigrashpa, cashna ningui— nirca.

⁶Shina nijpimi Balac shuti runapajman tigrarca. Balac shuti runaca, Moab llactamanda tucuilla mandajcunandimi, Diosman animalta cushpa tucuillata rupachijuj ladopi shuyajurca.

⁷Chaiman chayashpami Balaam shuti runaca, pai yarichina shimicunahuan cashna nijurca: “Aram shuti llactapi, indi llujshimuj ladoman tiaj urcucunapi cajpimi, Moab llactata jatun mandaj Balac shuti runaca pushamuhuarca. Jacobopaj mirai israelcunata, ima llaquipash japishpaca alimi canman ningapaj shamupai. Llaquichi tucushpapachami ali canman ningapaj shamupai pushamuhuarca.

⁸Ashtahuangarin Taita Diospash na llaquichishcataca, ¿imashpata ñucaca ima llaquipash japishpaca, alimi canman nijushayari? Mandaj Diospash na llaquichishcataca, ¿imashpata ñucaca llaquichi tucushpapachami ali canman nijushayari?

⁹Ashtahuangarin cai jaca rumi jahuacunamandami, israelcunataca ricusha. Lomacunamandami ricusha. Ricui, cai gentecunaca imatapash na manllashpami causanajunga. Paicunaca, shuj llactacunahuanga na chapuringachu.

¹⁰Ñutu alpashna mirashca Jacobopaj miraicunataca, ¿pita cuentangayari? Na cashpaca, chuscupi chaupishpa shicanyachishcacuna mashna cajtaca, ¿pita cuentangayari? Ñucapash, aligutalla ruraj runacunashnallata huañushcaiman. Ñuca causana punllacunapash, paicunapaj punllacunashnallata cashcanman” nijurcami.

¹¹Shina nijpimi Balac shuti runaca, Balaam shuti runataca cashna nirca: —Canga, ¿imatata rurahuashcanguiyari? Ñucata fiñajcunata nalicachishpa, ima llaquipash japishpaca alimi canman nichunmari, candaca pushamurcani. Ricui, ashtahuangarin ninanda bendiciai tucuntallami villashcangui— nircami.

¹²Shina nijpimi Balaam shuti runaca, cashna nishpa tigrachirca: —¿Nachu Mandaj Dios imatalla ñuca shimipi rimachishcatalla rimana cani?— nircami.

¹³Shina nijpimi Balac shuti runaca, cashna nirca: —Maimandami israelcunata ricunalla shuj pushtuman, ñucahuan ripashun. Chai pushtumandaca, ashtahuan ladollacunatallami ricungui. Ashtahuangarin tucuillataca, na ricunguichu. Paicunataca, chai pushtumandapachami ima llaquipash japishpaca alimi canman nipangui— nircami.

¹⁴Shina nishpami Balaam shuti runataca, Pisga nishca urcu jahuapi tiaj Zofim shuti pambaman pusharca. Chaipimi, canchis altarta rurashpa, cada altarpi shuj shicuhuan, shuj jari llamahuan cushpa rupachinajurca.

¹⁵Chaipimi Balaam runaca, Balac runataca cashna nirca: —Canga, animalcunata Diosman cushpa tucuillata can rupachijuj cai ladopi shuyajuilla. Ñucaca, Taita Dioshuan chaipi tuparingapajmi risha— nircami.

¹⁶Mandaj Diosca, Balaam shuti runahuan tuparingapaj llujshishpami, imatalla rimana shimita Balaam shuti runapaj shimipi churashpa, cashna nirca: —Balac shuti runapajman tigrailla. Chaiman chayashpaca, ñuca imata nishcatalla ningui— nircami.

¹⁷Shina nijpimi, Balac shuti runapajman tigrarca. Shina tigrajpimi Balaac shuti runaca, Moab llactamanda mandajcunandi, Diosman animalta cushpa tucuillata rupachijuj ladopillata shuyajurca. Chaipimi, Balac shuti runaca: —¿Mandaj Diosca, ima nipanda?— nishpa tapurca.

¹⁸Shina tapujpimi Balaam shuti runaca, pai yarichina shimicunahuan cashna nishpa rimajurca: “Zipor shuti runapaj churi Balac runa, ñuca rimashca shimicunata jatarishpa aliguta uyai.

¹⁹Taita Diosca, llullangapaca na runachu. Llaquiringapaca, huañuna aichayu runapash na canllu. Pai rurasha nishcataca, ¿nachu ruranga? Imata rurasha nishcatapash, ¿nachu pactachinga?

²⁰Ricui, bendiciachun mandashca shimitami japircani. Pai bendiciashcata shujman tigrachitaca, na ushanichu.

²¹Jacobopaj mirai israelcunapica, ima juchatapash na ricushcachu. Ima jatun nalitallapash na ricushcachu. Paicunata Mandaj Taita Diosca paicunahuanmi. Pai Jatun Mandaj cajpimi, ninanda cushijushpa caparijunajun.

²²Taita Diosmi paicunataca, Egiptomanda llujchimurca. Paica, búfalo nishca huagrapaj ushaitashnami charin.

²³Jacobopaj mirai israelcunata llaquichingapaca, ima brujopash na tianllu. Paicunata llaquichingapaca, yachajpash na tianllu. Jacobopaj mirai israelcunataca cunanga: ‘¡Taita Diosca, imagutapash alicunatami rurashca!’ ninajungami.

²⁴Ricuichi, cai gentecunaca, leonshnami jataringa. Paicunaca, leonshnami millayashpa shayaringa. Paicunaca, animalta japishpa micushpa tucuchinshna tucuchingacaman, huañushcacunapaj yahuarta ufiangacaman na samangachu” nijurcami.

²⁵Shina nijpimi Balac shuti runaca, Balaam shuti runataca cashna nirca: —Shina cashpaca paicunata ima llaquipash japishpaca alimi canman nita na ushashpaca, bendiciai tucushca cachun nitapash ama nichuyari— nircami.

²⁶Shina nijpimi Balaam shuti runaca, Balac shuti runaman cashna nishpa tigrachirca: —¿Nachu ñucaca, Mandaj Dios tucui imata nishcatapash, chaitallami rurasha nircani?— nircami.

²⁷Shina nijpimi Balac shuti runaca, Balaam shuti runataca cashna nirca: —Ñucahuan shamupai nipanimi. Ñucami cutin shuj pushtuman pushasha. Taita Diospaj ñaupajpi imamandapash ali ricurijpica, chai pushtumandapacha ima llaquipash japishpaca alimi canman nipangui— nijurcami.

²⁸Shina nishpami Balac shuti runaca, Balaam shuti runataca, jichushca pamba chimba purapi tiaj Peor shuti urcu jahuaman pusharca.

²⁹Chaipimi Balaam shuti runaca, Balac shuti runataca cashna nirca: —Canchis altarta ñucaman rurai. Shinallata canchis shicutapash, canchis jari llamatapash huañuchishpa caipi churai— nircami.

³⁰Balac shuti runaca, imashna Balaam shuti runa nishcashnallatami rurarca. Balac shuti runaca, shuj shicuhuan, shuj jari llamahuan cada altarpi churachishpami rupachijurca.