Read Imbabura Highland Quichua NÚMEROS 25 Bible Online

NÚMEROS 25 - Imbabura Highland Quichua bible

NÚMEROS 25

¹Israelcunaca, Sitim shuti pushtupimi causanajurca. Chaimandami israelcunaca, Moab shuti llactapi causanajuj huarmicunahuan huainayai callarinajurca.

²Chai huarmicunaca, paicunapaj dioscunaman animalcunata cushpa huañuchingapajmi, israelcunatapash cayan carca. Israelcunaca, chaiman rishpa micushpami, paicunapash chai gentecunapaj dioscunata cungurinajurca.

³Chashnami israelcunaca, Baal-peor shuti diosta mañanajurca. Chaimandami Mandaj Diosca, israelcunahuanga nina japirinshna fiñarirca.

⁴Shina fiñarishpami Mandaj Diosca, Moisesta cashna nirca: —Israelcunata tucui mandajcunata tandachishpa, Mandaj Dios ñuca ñaupajpi, indi chimba purapi, cungapi sipishpa huarcushpa huañuchi. Shina rurajpimi, israelcunamandaca nina japirinshna Mandaj Dios ñuca fiñarishcapash anchuringa— nircami.

⁵Shina nijpimi Moisesca, israelcunapaj juezcunataca cashna nirca: —Canguna puramanda, Baal-peor shuti diosta mañajcunataca, cangunaca tucuicunami japishpa huañuchina canguichi— nircami.

⁶Chaipimi, Israelpura shuj runaca, Moisespash, tandanajushca tucui israelcunapash ricujta, madianitapura shuj huarmita pushashpa, paipaj huauquicunapajman tigramurca. Paicunaca, Dioshuan tuparina jatun carpa ñaupajpimi huacanajurca.

⁷Aarón curapaj churi Eleazar runapaj churi Finees shuti runaca chaita ricushpami, tandanajushca chaupimanda jatarishpa, shuj lanzata japirca.

⁸Paica, chai Israel runata paipaj carpaman catishpa rishpami, chai Israel runatapash, chai huarmitapash ishcandita vijsapi lanzahuan satishpa huañuchirca. Chashna rurajpimi, israelcunata huañuchijuj ung:uica jarcarirca.

⁹Chai huañuipica, ishcai chunga chuscu huaranga israelcunami huañurca.

¹⁰Chaipimi Mandaj Diosca, Moisesman cashna nishpa villajurca:

¹¹—Aarón curapaj churi Eleazar runapaj churi Finees shuti runami, israelcunata ñuca ninanda fiñashcataca anchuchishca. Finees shuti runaca, ñucapajlla cashcanman yashpa ñuca fiñashcata paicuna puramanda anchuchishpami, chashna rurashca. Chaimandami israelcunataca, ñucapajlla cashcanman yashpa fiñarishca cashpapash, na tucuchircani.

¹²Chaimanda paitaca, cashna nigri: ‘Ricui ñucami, casilla ali causai tiachun, paihuan ari nishpa callarichigrini.

¹³Paipash, paipaj jipa miraicunapash, paicunapaj tucui causaipi cura cachun ari nishcatami pactachisha. Paica, paipaj Taita Diospajlla cashcanman yashpa fiñarishpami, israelcunapaj juchata anchuchijuchun, chai runata huañuchishca’ nijunmi nigri— nijurcami.

¹⁴Madianitapura huarmindi huañuchi tucushca Israel runaca, Simeón aillupura shuj familiata mandaj Salum shuti runapaj churi Zimri shutimi carca.

¹⁵Huañuchi tucushca chai madianita huarmica, chai llactapi causaj gentecunata mandaj Zur shuti runapaj ushi Cozbi shutimi carca. Zur shuti runaca, Madián llactapi causajcunapaj familiata mandaj taitami carca.

¹⁶Mandaj Diosca, Moisesmanmi cashna nishpa villajurca:

¹⁷—Madianitacunahuan ninanda macanajugrishpa, paicunata chugrichigrichi.

¹⁸Paicunaca, umachinata ali yachajcuna cashpami cangunataca, Baal-peor shuti dioshuan umachishpa llaquichinajurca. Madián shuti llactata mandajpaj ushi Cozbi shuti huarmica paicunapura cashpami, Baal-peor shuti diosta mañanajushcamanda ñuca huañuchijui punllapi huañuchi tucurca— nijurcami.