Read Imbabura Highland Quichua NÚMEROS 27 Bible Online

NÚMEROS 27 - Imbabura Highland Quichua bible

NÚMEROS 27

¹Zelofehad shuti runaca, Hefer shuti runapaj churimi carca. Hefer shuti runaca, Galaad shuti runapaj churimi carca. Galaad shuti runaca, Maquir shuti runapaj churimi carca. Maquir shuti runaca, Manasés runapaj churimi carca. Manasesca, Josepaj churimi carca. Zelofehad shuti runapaj: Maala, Noa, Hogla, Milca, Tirsa shuti ushicunami shamurca.

²Paicunaca Moisespaj, Eleazar curapaj, tandanajushca israelcunata mandajcunapaj ñaupajmanmi shamunajurca. Mandaj Dioshuan tuparina jatun carpa punguman shamushpami, cashna ninajurca:

³“Ñucanchi taitaca, jichushca pambapimi huañuparca. Paica, Mandaj Diosta fiñashpa, Coré shuti runahuan tandanajujcunahuanga, na tandanajurcachu. Ashtahuangarin paillata rurashca juchamandami huañurca. Paica, churicunatapash na chariparcachu.

⁴¿Imashpata ñucanchi taitapaj shutica, churita na charishcamandalla, paipaj familia puramanda chinganga? Ñucanchi taitapaj familia purapica, ñucanchimambash alpata chaupishpa caraichiyari” ninajurcami.

⁵Paicuna chashna mañashcamandami Moisesca, Mandaj Diosta tapurca.

⁶Mandaj Diosca, cashna nishpami Moisesman tigrachirca:

⁷“Zelofehad shuti runapaj ushicunaca, paicuna japinatallatami mañanajun. Paicunapaj taitacunapaj familia purapi, paicunamambash alpata chaupishpa cuilla. Chaitaca, paicunapaj taitapaj alpamanda chaupishpami, chai huarmicunaman cuna cangui.

⁸Shinallata israelcunataca, cashna ningui: ‘Maijambash jari huahuata na charishpa huañujpica, imatalla charishcacunaca ushipajmi canga.

⁹Ushitapash na charishpa huañujpica, huañuj runa imatalla charishcacunataca, paipaj huauquicuna japichun cunguichi.

¹⁰Huauquicunapash na tiajpica, huañuj runapaj taitapaj huauquicuna chai charishcacunataca japichun cunguichi.

¹¹Paipaj taitapaj huauquicunapash na tiajpica, paicunapaj aillu puramanda ashtahuan ladolla familiaman cunguichi. Chaicunaca paipajmi canga. Pactachinajuchun cushca cai shimicunaca, tucui israelcuna japinatallata japichun mandashcami. Canman ñuca mandashcashnallata ruranajuchun’ ningui” nijurcami.

¹²Mandaj Diosca, Moisestaca cashnami nirca: —Abarim shuti cai urcuman vichai ri. Chaiman rishpami, israelcunaman ñuca carashca llactata ricungui.

¹³Chai llactata ricushpaca, cambaj huauqui Aaronshnallata huañushpa, cambaj ñaupa taitacunahuan tandanajunguillami.

¹⁴Cangunaca, Zin nishca jichushca pambapimi, ñuca mandashcata na cazurcanguichi. Yacu illajpi tandanajushca israelcuna fiñashpa ñucata rimanajujpi, ñuca jucha illaj cajta paicunapaj ñaupajpi ricuchishpa, ñucata na jatunyachishpami, chashna na cazurcanguichi— nircami. Chai yacumandami, Cades shuti pueblo ladopi tiaj Zin nishca jichushca pambapi fiñanajurca.

¹⁵Mandaj Dios chashna nijpimi Moisesca, cashna nishpa tigrachirca:

¹⁶—Mandaj Dioslla, canmari tucui gentecunaman causaita cuj samaita caraj Taita Dios cangui. Tandanajushca israelcunata pushachun, shuj runata churapairi.

¹⁷Paica, israelcunata ñaupashca llujshijuchun, paicunata ñaupashpa yaicumuchun, maiman llujchishpapash pai pushachun, chashna churapai. Mandaj Diospaj tandanajushca israelcunaca, ama michij illaj llamacunashna purinajuchun, chashna churapairi— nircami.

¹⁸Shina nijpimi Mandaj Diosca, Moisestaca cashna nijurca: —Nun shuti runapaj churi Josuemi, ñuca Espirituta charin. Paita pushamushpa, paipaj umapi cambaj maquita churai.

¹⁹Chai jipaca, Eleazar shuti curapaj ñaupajman, tandanajushca tucuilla israelcunapaj ñaupajman pushangui. Chaipica, paicunapaj ñaupajpimi, paicunata mandaj cachun churangui.

²⁰Shinallata tandanajushca tucui israelcuna paita cazuchunga, cambaj ushaimanda shuj ashata paiman cungui.

²¹Josueman villangapaca, Eleazar curami, Urim nishcapi suerteta rurashpa, Mandaj Dios ñuca ñaupajpi tapunga. Pai mandajpimi Josuepash, tandanajushca tucuilla israelcunapash llujshishpa rinajunga. Pai mandajpimi, cutin yaicumunajunga— nijurcami.

²²Moisesca, Mandaj Dios mandashcashnallata rurashpami Josuetaca, Eleazar curapaj ñaupajman, tandanajushca tucuilla israelcunapaj ñaupajman pusharca.

²³Chaiman pushashpaca, Mandaj Dios mandashpa, paihuanllata villachishcashnallatami Moisesca, Josuepaj umapi maquita churashpa, paipaj randi israelcunata mandachun churarca.