Read Imbabura Highland Quichua NÚMEROS 3 Bible Online

NÚMEROS 3 - Imbabura Highland Quichua bible

NÚMEROS 3

¹Sinaí urcupi Moisesman, Mandaj Dios parlanajui punllacunapica, Moisespaj miraicuna, Aaronbaj miraicunaca, caicunami tiarca:

²Aaronbaj churicunapaj shuticunaca, caicunami carca: Punda churica, Nadab shutimi carca. Cati churicunaca: Abiú, Eleazar, Itamar shuticunami carca.

³Paicunaca, Aaronbaj churicunami carca. Paicunataca, aceiteta talichishpa javishpami, Diosta servij curacuna cachun shicanyachirca.

⁴Shina cashpapash Nadab shuti, Abiú shuti curacunaca, Sinaí shuti jichushca pambapi cashpami, napash rupachina ninahuan inciensota Mandaj Diosman cushpa rupachinajurca. Chashna ruranajushpami paicunaca, Mandaj Diospaj ñaupajpi huañurca. Paicunaca, huahuacunata na charircachu. Paicuna huañujpica Eleazarhuan, Itamarhuanmi curacuna imatalla ruranataca, paicunapaj taita Aarón mandajpi ruranajurca.

⁵Mandaj Diosca, Moisesmanmi cashna nishpa villajurca:

⁶“Leví aillu runacunataca, Aarón cura imatalla mandashcacunata rurashpa paita servinajuchun, paipaj ñaupajman pushamui.

⁷Paicunaca, Aarón imatalla mandashcacunata, tucuilla tandanajushca israelcuna imata mandashcacunatapash, ñucahuan tuparina jatun carpa ñaupajpi ruranajuchun, shinallata ñuca jatun carpapi ñucapajta ruranapi servinajuchun pushamui.

⁸Ñucahuan tuparina jatun carpapi tucui imalla tiajcunatapash, israelcuna tucui imatalla paicunaman mingashcatapash, paicunami cuidanajunga. Shinallata jatun carpapipash, paicunami ñucapajta rurashpa servinajunga.

⁹Levitacunaca, Israel puracunamandaca shicanyachi tucushcacunami. Chaimandami paicunataca, Aaronman paipaj churicunaman cungui.

¹⁰Curacuna imatalla ruranacunapi rurai callarichunga Aarondapash, paipaj churicunatapash churangui. Maijambash na rijsishca runa chaita rurangapaj yaicushpaca, huañungapachami” nijurcami.

¹¹Cashnatapashmi Mandaj Diosca, Moisesman cashna nishpa villajurca:

¹²“Israelcunapaj punda ungushca churicunaca, tucuilla ñucapajmi. Ricuichi, israelcunapaj punda churicunata ñuca japinapaj randica, levitacunatami ñucapaj cachun japircani.

¹³Egipto llactapi causajcunapaj punda tucuilla churicunata huañuchijushpallatami, israelcunapaj tucuilla punda churicunataca, ñucapajlla cachun agllashpa na huañuchircani. Chaimandami, israelcunapaj punda huacharishca tucuilla jari huahuacunatapash, punda huacharishca tucuilla animalcunatapash, ñucapajlla cachun agllarcani. Ñucami, Mandaj Dios cani” nijurcami.

¹⁴Mandaj Diosca, Sinaí shuti jichushca pambapimi, Moisesman cashna nishpa villarca:

¹⁵“Levipaj miraicunataca, shuj quillata charijmanda callarishpa, tucuilla jari huahuacunata cuentangui. Paicunapaj ñaupa taitacunapaj huasi ucu puracuna, paicunapaj familiacuna imashna tandanajushcapi cuentangui” nircami.

¹⁶Shina nijpimi Moisesca, Mandaj Dios villashcashnallata cuentanajurca. Paita imashna mandashcashnallatami cuentajurca.

¹⁷Levipaj churicunapaj shuticunata imashna cuentashcashnallata, caicunami. Paicunaca: Gersón, Coat, Merari shuticunami carca.

¹⁸Gersonbaj churicunapaj shuticunaca, paicunapaj familiacuna imashna tandanajushcapi, Libni shuti, Simei shutimi carca.

¹⁹Coat shuti runapaj churicunapaj familiacuna imashna tandanajushcapi, caicunami: Amram, Izhar, Hebrón, Uziel shuticunami carca.

²⁰Merari shuti runapaj churicunapaj familiacuna imashna tandanajushcapash, caicunami: Mahli shuti, Musi shuticunami carca. Paicunami, paicunapaj ñaupa taitacunapaj huasi ucu puracuna imashna tandanajushcashnallata, Levipaj familiacuna carca.

²¹Gersonbaj mirai familiacunaca: Libni shuti, Simei shuticunami carca. Paicunami, Gersonbaj familiacuna carca.

²²Paicuna puramandaca, shuj quillata charij huahuamanda callarishpa tucuilla jaricunata imashna cuentashcashnallata, canchis huaranga picha patsaj jaricunami carca.

²³Gersonbaj mirai familiacunaca, Diospaj jatun carpa huasha ladopimi, indi huashajuj ladoman carpacunata shayachishpa tianajunga.

²⁴Gersonita nishca miraicunata mandajca, Lael shuti runapaj churi Eliasafmi canga.

²⁵Gersonbaj miraicunaca, Dioshuan tuparina jatun carpapica, Diospaj jatun carpata, carpata jatariajuj carata, Dioshuan tuparina jatun carpaman yaicuna pungupi cortinatami cuidanajunga.

²⁶Shinallata jatun carpa patiota jarcashpa muyushca cortinacunatapash, carpa patioman yaicuna pungu cortinatapash, Diospaj carpa ladopi altarta jarcashpa muyushca cortinatapash, chai cortinacunatallata huatana cabiacunatapash paicunallatami cuidanajunga.

²⁷Coat shuti runapaj miraicunaca: Amramita, izharita, hebronita, uzielita nishca familiacunami. Paicunami, coatita nishca familiacuna carca.

²⁸Diospajlla huasita cuidana jaricunata, shuj quillata charij huahuamanda callarishpa tucuillata cuentajpica, pusaj huaranga sucta patsaj jaricunami carca.

²⁹Coat runapaj churicunapaj mirai familiacunaca, Diospaj jatun carpa ura ladomanmi, carpacunata shayachishpa tianajunga.

³⁰Coat runapaj mirai familiacunata mandajca, Uziel shuti runapaj churi Elizafanmi canga.

³¹Paicunaca, Diospaj arcata, mezata, candelerota, altarcunata, Diospajlla huasipi Diospajta rurangapaj tucui imalla tiajcunata, jarcariajuj telata, chaipi tucui imalla tiajcunatapashmi cuidanajunga.

³²Levitacunata mandajcunata mandajca, Aarón curapaj churi Eleazarmi canga. Paica, Diospajlla huasita cuidajcunata mandajmi canga.

³³Merari shuti runapaj miraicunaca: Mahlita nishca, musita nishca familiacunami. Paicunami, Merari runapaj familiacuna carca.

³⁴Paicuna puramandaca, shuj quillata charij huahuamanda callarishpa tucuilla jaricunata imashna cuentashcashnallata, sucta huaranga ishcai patsaj jaricunami carca.

³⁵Merari shuti runapaj mirai familiacunata mandajca, Abihail shuti runapaj churi Zurielmi canga. Paicunaca, Diospaj jatun carpa jahua ladomanmi carpacunata shayachishpa tianajunga.

³⁶Merari shuti runapaj miraicunaca, Diospaj jatun carpapaj tablacunata, caspicunata, pilarcunata, pilarcunata shayachina bazacunata, chaipi tucui ima tiajcunatapashmi cuidanajunga.

³⁷Shinallata carpa patio muyundipi tianajuj pilarcunatapash, chai pilarcunapaj bazacunatapash, estacacunatapash, chai estacacunapi huatana cabiacunatapashmi, paicunallata cuidanajunga.

³⁸Moiseshuan, Aaronhuan, Aaronbaj churicunahuanga, Dioshuan tuparina jatun carpa ñaupa ladomanmi, carpacunata shayachishpa tianajunga. Paicunaca, indi llujshimuj ladoman tiarishpami, Diospajlla huasitaca israelcunapaj randi cuidanajunga. Na rijsishca runa chaiman chayashpaca, huañungapachami.

³⁹Moiseshuan, Aaronhuanga imashna Mandaj Dios mandashcashnallatami, levitacunapaj familiacuna imashna tandanajushcapi, shuj quillata charijmanda callarishpa cuentanajurca. Chai cuentashcacunaca, ishcai chunga ishcai huaranga jaricunami carca.

⁴⁰Mandaj Diosca, Moisestaca cashnami nijurca: “Israel puracunapi tucuilla punda churicunataca, shuj quillata charijmanda callarishpa cuentangui. Paicunataca, paicunapaj shuticunata imashna japinajushcanallata cuentangui.

⁴¹Israel puracunapaj tucuilla punda churicunapaj randica, levitacunata ñucapajlla cachun shicanyachingui. Israelcunapaj animalcunamanda punda huacharishca tucui animalcunapaj randica, levitacunapaj animalcunamanda punda huacharishcacunata, ñucapajlla cachun shicanyachingui. Ñucami, Mandaj Dios cani” nijurcami.

⁴²Moisesca, Mandaj Dios mandashcashnami, Israel puracunapi tucuilla punda churicunataca cuentarca.

⁴³Punda huacharishca tucui jaricunataca, paicunata cuentashpa shuticunata imashna japinajushcashnallata cuentangui. Shuj quillata charijmanda callarishpa cuentajpica, 22.273mi carca.

⁴⁴Chai jipami Mandaj Diosca, Moisesman cashna nishpa villajurca:

⁴⁵“Israel puracunapi tucuilla punda churicunapaj randica, levitacunata ñucapajlla cachun japi. Israelcunapaj animalcunamanda punda huacharishca animalcunapaj randica, levitacunapaj animalcunamanda punda huacharishca animalcunata ñucapajlla cachun japi. Levitacunaca ñucapajmi, ñucami Mandaj Dios cani.

⁴⁶Israel puracunapi punda huacharishca churicunaca, ashtacacunami. Chaimandami levitacunataca, ishcai patsaj canchis chunga quimsa jaricunahuan yalin. Shina cashcamanda paicuna cacharishca quedachunga,

⁴⁷cada jarimandami picha chunga canchis gramota pezaj culquita japina cangui. Chai culquitaca, ñucapajlla huasipi tiaj culquita imashna pezashcashnatallatami japina cangui. Shuj siclo culquica, ishcai chunga gera nishcacunatami charin.

⁴⁸Chai yalilla tiashca jaricuna cacharishca quedachun japina culquitaca, Aaronmambash, paipaj churicunamambash cungui” nijurcami.

⁴⁹Shina nijpimi Moisesca, levitacuna cacharichishcamanda ashtahuan yali tiashca jaricuna cacharichi tucuchunga, culquita japirca.

⁵⁰Israel puracunapi punda churicuna cacharishca quedachunga, chunga picha kilo chaupi yalita pezashca culquitami, Diospajlla huasipi tiaj culquita imashna pezashcashnallata japinajurca.

⁵¹Cacharishca quedachun cushca culquita Moisés japishpaca, Mandaj Dios mandashcashnallatami Aaronmambash, paipaj churicunamambash curca. Mandaj Dios imashna Moisesta mandashcashnallatami curca.