Read Imbabura Highland Quichua NÚMEROS 32 Bible Online

NÚMEROS 32 - Imbabura Highland Quichua bible

NÚMEROS 32

¹Rubenbaj, Gadpaj miraicunaca, ninan ashtaca ashtaca animalcunatami charirca. Paicunaca, Jazer shuti, Galaad shuti llactacunapica, animalcunata charingapaj alipacha cajtami ricunajurca.

²Chaimandami Gadpaj, Rubenbaj miraicuna shamushpaca Moisestapash, Eleazar curatapash, tandanajushca israelcunata mandajcunatapash cashna ninajurca:

³—Atarot, Dibón, Jazer, Nimra, Hesbón, Eleale, Sebam, Nebo, Beón shuti pueblocunataca,

⁴tandanajushca israelcunapaj ñaupajpi, Mandaj Dios tucuchishca llactami. Chai llactapica, animalcunata charingapaj alipachami. Canda servijcunaca, animalcunata charipanchimari— ninajurcami.

⁵Shinallata cashnatapashmi ninajurca: —Cambaj ñaupajpi ñucanchi ali ricurishca cajpica, cai llactataca canda servij ñucanchipaj cachun cushpami ali canman. Shina cujpica ñucanchitaca, cai Jordán yacuta na chimbachinachu capangui— ninajurcami.

⁶Moisesca, Gadpaj, Rubenbaj aillucunataca, cashna nishpami tigrachirca: —Cangunapaj huauquicuna jatun macanajuiman rijpica cangunaca, ¿caipillatachu quedagringuichi?

⁷¿Imashpata cangunaca, Mandaj Dios carashca llactaman israelcuna ama chimbachun, nali yuyaita cunajunguichi?

⁸Chashnallatami cangunapaj taitacunapash, Cades-barnea shuti pueblopi cashpa, llactata ricushpa tigramuchun cachashca punllacunapica jarcanajurca.

⁹Paicunaca, ninanda jatarij Escol shuti yacucaman vichai rishpami, chai llactata ricushpa tigramunajurca. Ña tigramushpami, Mandaj Dios carashca llactaman israelcuna ama yaicumuchunga, nali yuyaita cushpa jarcanajurca.

¹⁰Chaimandami, Mandaj Diosca nina japirinshna fiñarishpa, cashna nishpa juramenturca:

¹¹‘Egiptomanda vichai llujshimushca, ishcai chunga huata yalita charij runacunaca, Abrahamman, Jacoboman, Isaacman ñuca carashapachami nishpa juramentushca llactataca, napacha ricungachu. Paicuna ñucata na tucui shunguhuan catinajushcamandami, na ricunga’ nijurcami.

¹²Ricushpa tigraj puramandaca, cenezeopura Jefone shuti runapaj churi Calebhuan, Nun shuti runapaj churi Josuehuanllami, Mandaj Dios ñucata tucui shunguhuan catinajushcamanda ricunga.

¹³Mandaj Diosca nina japirinshna, israelcunahuan fiñarishpami, jichushca pambapi chuscu chunga huatata chingashca purinajuchun paicunataca saquirca. Mandaj Diospaj ñaupajpi nalita ruraj chai miraicuna tucuilla tucuringacamanmi, chashna saquirca.

¹⁴Ricuichi cangunaca, juchata rurajcunapaj miraicuna cashpami, cangunapaj taitacunapaj randi nalita ruranajunguichi. Mandaj Dios israelcunata ninanda fiñashcata ashtahuan mirachingapajmi, chashna ruranajunguichi.

¹⁵Diosta catijushcata canguna saquishpa tigrarijpica, Diospash cutinmi jichushca pambapi saquinga. Cangunallatami, tucuilla cai gentecunata tucuchinguichi— nijurcami.

¹⁶Shina nijpimi, Moisespajman shamushpa cashna ninajurca: —Ñucanchica, cai llactapica ñucanchi animalcunaman corralcunata, shinallata ñucanchi huahuacunaman pueblocunata rurangapajmi munapanchi.

¹⁷Ñucanchica, macanajunacunahuan alichirishpa, israelcunata ñaupashpa ucha rishunllami. Paicunapash, chai llactata japingacamanmi, ñucanchipash macanajushun. Ñucanchi huahuacunaca, cai llactapi causajcuna ama llaquichinajuchunmi, muyundi jarcashca pueblocunapi quedanga.

¹⁸Israelcunapash, paicunapaj cachun alpacunata tucuicuna nara japijpica ñucanchipash, ñucanchi huasicunaman napacha tigrapashunllu.

¹⁹Jordán yacu cai ladopi, indi llujshimuj ladoman tiaj cai alpata ñucanchipaj cachun ña japishpaca, Jordán yacu chimbaman tiaj alpatapash, ashtahuan chai ladoman tiaj alpatapash, paicunahuanga na ashtahuan japishunllu— ninajurcami.

²⁰Shina ninajujpimi Moisesca, cashna nishpa tigrachirca: —Shina nishcata pactachishpa, Mandaj Diospaj ñaupajpi jatun macanajuiman ringapaj shayarishpaca alimi.

²¹Cangunata fiñajcunata cangunapaj ñaupajmanda llujchishpa cachangacaman tucui canguna macanajunacunahuan alichirishpa, Mandaj Diospaj ñaupajpi Jordán yacuta chimbashpaca alimi.

²²Mandaj Diospaj ñaupajpi mishashpa japishpaca, tigramunguichilla. Shina tigramushpaca, Mandaj Diospaj ñaupajpipash, israelcunapaj ñaupajpipash ima llaquitapash na apanami canguichi. Canguna shina rurajpica, cai llactaca, Mandaj Diospaj ñaupajpipash, cangunapajmi canga.

²³Ashtahuangarin na shina rurashpaca, Mandaj Diospaj ñaupajpica, juchatami ruranguichi. Chai juchaca, cangunatallata llaquichinatami yachana canguichi.

²⁴Cangunapaj huahuacunapajpash pueblocunata ruraichilla, llamacunapajpash corralcunata ruraichilla. Shinallata cangunapaj shimihuambacha ninajushcataca pactachinapachami canguichi— nijurcami.

²⁵Shina nijpimi Gadpaj, Rubenbaj miraicunaca, Moisesman cashna nishpa villanajurca: —Canda servijcunaca, ñucanchita mandaj can mandashcashnallatami rurapashun.

²⁶Ñucanchi uchilla huahuacuna, ñucanchi huarmicuna, ñucanchi huagracuna, ñucanchipaj tucuilla animalcunami, cai Galaad llacta pueblocunapi quedanga.

²⁷Canda servijcunaca, ñucanchita mandaj can mandashcashnallatami, macanajunacunahuan alichirishpa, Mandaj Diospaj ñaupajpi macanajungapaj chimbashun— ninajurcami.

²⁸Shina ninajujpimi Moisesca, Eleazar curatapash, Nun shuti runapaj churi Josuetapash, Israel aillucunapaj taitacunata mandajcunatapash, cashna nishpa mandarca:

²⁹—Gadpaj, Rubenbaj aillu runacunapash, Jordán yacuta cangunahuan chimbashpaca, alimi canga. Paicunaca, Mandaj Diospaj ñaupajpi jatun macanajuiman ringapajmi, macanajunacunahuan alichirishca canga. Shina chimbajpi, chai llactapi causajcuna cangunapaj ñaupajpi mishai tucushca jipaca, Galaad llactataca paicunapaj cachun cunguichilla.

³⁰Ashtahuangarin macanajunacunahuan alichirishpa, cangunahuan na chimbashpaca, paicunapash cangunahuanllatami, Canaán llactata japinajunga— nijurcami.

³¹Shina nijpimi Gadpaj, Rubenbaj miraicunapash, cashna nishpa tigrachinajurca: —Canda servij ñucanchiman Mandaj Dios imata mandashcatami rurapashun.

³²Ñucanchica, macanajunacunahuan alichirishpami, Mandaj Diospaj ñaupajpi macanajungapaj, Canaán llactaman chimbapashun. Ashtahuangarin ñucanchipaj cachun japina alpacunaca, Jordán yacu cai ladopimi canga— ninajurcami.

³³Shina ninajujpimi Moisesca, Gadpaj, Rubenbaj aillucunamambash, Josepaj churi Manasespaj chaupi aillumambash, alpacunata curca. Amorreocunata jatun mandaj Sehón shuti runa mandajushca llactatapash, jatun mandaj Og shuti runa mandajushca Basán shuti llactatapash, chai llactacunapi tiaj pueblocunandi, pueblo muyundi uchilla llactacunandimi curca.

³⁴Gad shuti runapaj miraicunaca, Dibón, Atarot, Aroer shuti pueblocunatami shayachirca.

³⁵Shinallata Atarot-sofán, Jazer, Jogbeha,

³⁶Bet-nimra, Bet-arán shuti pueblocunatapashmi, muyundi pircacunahuan pueblocunata shayachirca. Shinallata llama corralcunatapashmi ruranajurca.

³⁷Rubenbaj miraicunaca, cai pueblocunatami shayachirca: Hesbón, Eleale, Quiriataim,

³⁸Nebo shuti, Baal-meón shuti pueblocunatami shayachinajurca. (Chai pueblocunatami, shuj shuticunata shutichirca). Shinallata Sibma shuti pueblotapashmi shayachirca. Paicuna shayachishca pueblocunatapashmi shutichirca.

³⁹Manasespaj churi Maquir shuti runapaj miraicunaca, Galaad llactamanmi rirca. Chaiman rishpa, chai llactapi causanajuj amorreocunata llujchishpa cachashpami, chai llactataca paicuna japirca.

⁴⁰Chaimandami Moisesca, Galaad llactataca, Manasespaj churi Maquir shuti runapaj miraicunaman cujpi, paicunaca chai llactapi causanajurca.

⁴¹Manasespaj miraipura Jair shuti runapash, chai llactaman rishpaca, chai muyundi llactacunatami japirca. Chaicunataca, Havot-jair shutitami shutichirca.

⁴²Shinallata Noba shuti runapash rishpaca, Kenat shuti pueblotami, chai pueblo muyundi uchilla llactacunandi japirca. Chai pueblotaca, Noba shutitallatami shutichirca.