Read Imbabura Highland Quichua NÚMEROS 33 Bible Online

NÚMEROS 33 - Imbabura Highland Quichua bible

NÚMEROS 33

¹Israelcunaca, cashnami asha asha shamunajurca: Paicuna Egipto llactamanda llujshimushpaca, soldadocunashna shican shican tandanajushpami Moiseshuan, Aaronhuan pushamujpi shamunajurca.

²Maimanda israelcuna llujshishpapash, Mandaj Dios mandajpi imashna asha asha shamunajushcatami, Moisesca escribijurca. Israelcuna maimandalla llujshimushpa, asha asha shamushcacunaca cashnami:

³Israelcunaca, Egiptopi tiaj Ramesés shuti pueblomandaca, huata callari punda quillapimi, chunga picha punllapi llujshimurca. Pascua punlla micuita rurashca cayandi punllapica, paicunaca ninan shinllicunami, Egiptopi causajcuna ricujta llujshinajurca.

⁴Israelcuna shina llujshinajujpica, Egiptopi causajcunaca, punda ungushca paicunapaj jari huahuacunata, Mandaj Dios huañuchishcatami pambanajurca. Mandaj Diosca, paicunapaj dioscunatapashmi llaquichishca carca.

⁵Israelcunaca, Ramesés shuti pueblomanda llujshishpaca, Sucot shuti pushtupimi carpacunata shayachishpa tianajurca.

⁶Sucot shuti pushtumanda llujshishpaca, jichushca pamba callaripi tiaj Etam shuti pushtupimi, carpacunata shayachishpa tianajurca.

⁷Etam shuti pushtumanda llujshishpaca, Baal-zefón shuti pushtu chimba purapi tiaj Pi-hahirot shuti pushtu ladomanmi muyunajurca. Chaipica, Migdol shuti pushtu chimba purapimi, carpacunata shayachishpa tianajurca.

⁸Pi-hahirot shuti pushtumanda llujshishpaca, Puca Cuchata chimbashpami, jichushca pambaman chayarca. Etam shuti jichushca pambataca, quimsa punllata rishpami, Mara shuti pushtupi carpacunata shayachishpa tianajurca.

⁹Mara shuti pushtumanda llujshishpaca, chunga ishcai pugyucuna, canchis chunga palmera quirucuna tiaj Elim shuti pushtuman chayashpami, carpacunata chaipi shayachishpa tianajurca.

¹⁰Elim shuti pushtumanda llujshishpaca, Puca Cucha ladopimi carpacunata shayachishpa tianajurca.

¹¹Puca Cucha ladomanda llujshishpaca, Sin nishca jichushca pambapimi, carpacunata shayachishpa tianajurca.

¹²Sin nishca jichushca pambamanda llujshishpaca, Dofca shuti pushtupimi, carpacunata shayachishpa tianajurca.

¹³Dofca shuti pushtumanda llujshishpaca, Alús shuti pushtupimi, carpacunata shayachishpa tianajurca.

¹⁴Alús shuti pushtumanda llujshishpaca, Refidim shuti pushtupimi, carpacunata shayachishpa tianajurca. Chaipica, gentecuna yacuta ufiangapaca na charircachu.

¹⁵Refidim shuti pushtumanda llujshishpaca, Sinaí shuti jichushca pambapimi, carpacunata shayachishpa tianajurca.

¹⁶Sinaí shuti jichushca pambamanda llujshishpaca, Kibrot-hataava shuti pushtupimi, carpacunata shayachishpa tianajurca.

¹⁷Kibrot-hataava shuti pushtumanda llujshishpaca, Hazerot shuti pushtupimi, carpacunata shayachishpa tianajurca.

¹⁸Hazerot shuti pushtumanda llujshishpaca, Ritma shuti pushtupimi, carpacunata shayachishpa tianajurca.

¹⁹Ritma shuti pushtumanda llujshishpaca, Rimón-peres shuti pambapimi, carpacunata shayachishpa tianajurca.

²⁰Rimón-peres shuti pushtumanda llujshishpaca, Libna shuti pushtupimi, carpacunata shayachishpa tianajurca.

²¹Libna shuti pushtumanda llujshishpaca, Rissa shuti pushtupimi, carpacunata shayachishpa tianajurca.

²²Rissa shuti pushtumanda llujshishpaca, Ceelata shuti pushtupimi, carpacunata shayachishpa tianajurca.

²³Ceelata shuti pushtumanda llujshishpaca, Sefer shuti urcupimi, carpacunata shayachishpa tianajurca.

²⁴Sefer shuti urcumanda llujshishpaca, Harada shuti pushtupimi, carpacunata shayachishpa tianajurca.

²⁵Harada shuti pushtumanda llujshishpaca, Macelot shuti pushtupimi, carpacunata shayachishpa tianajurca.

²⁶Macelot shuti pushtumanda llujshishpaca, Tahat shuti pushtupimi, carpacunata shayachishpa tianajurca.

²⁷Tahat shuti pushtumanda llujshishpaca, Tara shuti pushtupimi, carpacunata shayachishpa tianajurca.

²⁸Tara shuti pushtumanda llujshishpaca, Mitca shuti pushtupimi, carpacunata shayachishpa tianajurca.

²⁹Mitca shuti pushtumanda llujshishpaca, Hasmona shuti pushtupimi, carpacunata shayachishpa tianajurca.

³⁰Hasmona shuti pushtumanda llujshishpaca, Moserot shuti pushtupimi, carpacunata shayachishpa tianajurca.

³¹Moserot shuti pushtumanda llujshishpaca, Bene-jaacan shuti pushtupimi, carpacunata shayachishpa tianajurca.

³²Bene-jaacan shuti pushtumanda llujshishpaca, Gidgad shuti urcupimi, carpacunata shayachishpa tianajurca.

³³Gidgad shuti urcumanda llujshishpaca, Jotbata shuti pushtupimi, carpacunata shayachishpa tianajurca.

³⁴Jotbata shuti pushtumanda llujshishpaca, Abrona shuti pushtupimi, carpacunata shayachishpa tianajurca.

³⁵Abrona shuti pushtumanda llujshishpaca, Ezión-geber shuti pushtupimi, carpacunata shayachishpa tianajurca.

³⁶Ezión-geber shuti pushtumanda llujshishpaca, Zin nishca jichushca pambapi tiaj Cades shuti pueblopimi, chai pueblo ladopi carpacunata shayachishpa tianajurca.

³⁷Cades shuti pueblomanda llujshishpaca, Edom llactaman chimbanapi tiaj Hor shuti urcu ladopimi, carpacunata shayachishpa tianajurca.

³⁸Chaipi cashpami Aarón shuti curaguca, Mandaj Dios mandashcashnallata, Hor shuti urcuman vichai llujshishpa chaipi huañurca. Israelcuna Egipto llactamanda llujshimushcapash, ña chuscu chunga huata tucujpimi, chai huatapaj picha quilla, callari punllapi paica huañurca.

³⁹Aaronga, patsaj ishcai chunga quimsa huatata charishpami, Hor shuti urcupi huañurca.

⁴⁰Canaán llactapi tiajuj Neguev llactapi tiaj Arad shuti pueblota jatun mandajca, israelcuna shamushcatami uyarca.

⁴¹Hor shuti urcumanda llujshishpaca, Zalmona shuti pushtupimi, carpacunata shayachishpa tianajurca.

⁴²Zalmona shuti pushtumanda llujshishpaca, Punón shuti pushtupimi, carpacunata shayachishpa tianajurca.

⁴³Punón shuti pushtumanda llujshishpaca, Obot shuti pushtupimi, carpacunata shayachishpa tianajurca.

⁴⁴Obot shuti pushtumanda llujshishpaca, Ije-abarim shuti pushtupimi, carpacunata shayachishpa tianajurca.

⁴⁵Ije-abarim shuti pushtumanda llujshishpaca, Dibón-gad shuti pushtupimi, Moab llacta lindero ladopi carpacunata shayachishpa tianajurca.

⁴⁶Dibón-gad shuti pushtumanda llujshishpaca, Almón-diblataim shuti pushtupimi, carpacunata shayachishpa tianajurca.

⁴⁷Almón-diblataim shuti pushtumanda llujshishpaca, Nebo shuti urcumanda indi llujshimuj ladoman tiaj Abarim shuti urcucunapimi, carpacunata shayachishpa tianajurca.

⁴⁸Abarim shuti urcucunamanda llujshishpaca, Moab llactapi tiaj pambapimi, carpacunata shayachishpa tianajurca. Chaica, Jordán yacu manñapi tiaj Jericó shuti pueblo chimba purapimi.

⁴⁹Ña tucuripica, Jordán yacu ladopimi, Bet-jesimot pueblomandaca, Abel-sitim shuti pueblocaman, Moab llacta pambacunapi carpacunata shayachishpa tianajurca.

⁵⁰Jordán yacu ladopi Jericó pueblo chimba purapi tiaj Moab llacta pambacunapimi Mandaj Diosca, Moisesta cashna nijurca:

⁵¹“Israelcunaman, cashna nishpa villangui: ‘Jordán yacuta chimbashpa, Canaán llactaman yaicunguichi.

⁵²Chaiman yaicushpaca, chai llactapi causajcunataca, cangunapaj ñaupajmanda tucuillata llujchishpa cachanguichi. Shinallata rumita rurashca, yanga dioscunata, jirruta yacuyachishpa imamambash rijchajta rurashca dioscunataca, tucuillata tucuchinguichi. Lomacunapi tiaj paicunapaj altarcunatapash, tucuillata tucuchinguichi.

⁵³Chai llactapi causajcunata llujchishpa cachashpaca, chai llactapi causanguichilla. Chai llactataca, cangunapajpacha cachunmi cararcani.

⁵⁴Alpacunataca, cangunapaj familiacuna mashna cashcashnallata, suerteta rurashpa chaupinguichi. Aillu purapi ashtacacuna cajpica, alpatapash ashtacata cunguichi. Ashalla aillu cajpica, ashatallata cunguichi. Maipi suerte urmajpipash, chaipimi alpata japinajunga. Paicunapaj ñaupa taitacuna mashna cashcashnallatami japinajunga.

⁵⁵Chai llactapi causajcunata, cangunapaj ñaupajmanda na tucuillata llujchijpica, ñavipi ujsha yaicushcashna, vijsa quinraipi casha tujsijunshnami canga. Paicunami, canguna causanajuj llactapica cangunata llaquichinajunga.

⁵⁶Shinallata paicunata imashna rurangapaj ñuca munashcashnallatami, cangunataca rurasha’ nishpa villangui” nijurcami.