Read Imbabura Highland Quichua NÚMEROS 34 Bible Online

NÚMEROS 34 - Imbabura Highland Quichua bible

NÚMEROS 34

¹Mandaj Diosca, Moisestaca cashnami nijurca:

²“Israelcunaman, cashna nishpa villangui: ‘Canguna Canaán llactaman yaicujpica, cai llactami cangunapaj canga. Canaán llactaca, chai llactapaj linderocuna imashna canashnallata cashnami canga:

³Urai ladotaca, Zin nishca jichushca pambamandaca, Edom llacta linderocamanmi japinguichi. Janaj lado linderoca, Cachi tiaj Cucha manñamandaca, indi llujshimuj ladocamanmi japinguichi.

⁴Cai linderoca, urai ladota muyushpami, Acrabim nishca lomaman vichai rinacaman canga. Chaimandaca, Zin nishca jichushca pambacamanmi yalinga. Urai ladomandaca, Cades-barnea shuti pueblocamanmi ringa. Chaimandaca, Hasar-adar shuti pueblocaman rishpami, Asmón shuti pueblocaman yalinga.

⁵Chai linderoca, Asmón shuti pueblomandaca ninanda jatarij Egipto llacta huaicu yacucamanmi muyunga. Chai linderoca, indi huashajuj ladomanmi tucuringa.

⁶Indi huashajuj lado linderoca, Jatun Mama Cuchami canga. Chai linderoca, indi huashajuj ladoman linderomi canga.

⁷Vichai lado linderoca, cashnami canga: Jatun Mama Cuchamandaca, Hor shuti urcucaman señalashpa, mujungunata churanguichi.

⁸Hor shuti urcumandaca, Hamat shuti puebloman yaicunacaman señalashpa, mujungunata churanguichi. Chai linderoca, Zedad shuti pueblocamanmi ringa.

⁹Chai linderoca, Zifrón shuti pueblota yalishpami, Hazar-enán shuti pueblopi tucuringa. Chaimi, vichai lado lindero canga.

¹⁰Indi llujshimuj lado linderotaca, Hazar-enán shuti pueblomanda, Sefam shuti pueblocaman señalashpa, mujungunata churanguichi.

¹¹Chai linderoca, Sefam shuti pueblomandaca, indi llujshimuj ladoman tiaj Aín shuti pueblocamanmi urai ringa. Chai lindero urai rishpami, indi llujshimuj ladocaman tiaj Cineret shuti mama cucha manñacaman chayanga.

¹²Chaimandaca, Jordán yacu manñacaman urai rishpami, Cachi tiaj Cuchapi tucuringa. Cangunapaj llactaca, chashna muyundi linderocunahuanmi canga’ nishpa villangui” nijurcami.

¹³Moisesca, israelcunataca cashna nishpami mandajurca: “Chai llactatami suerteta rurashpa, cangunapaj cachun chaupishpa cuna. Mandaj Diosmi, cai llactataca iscun aillucunaman, shuj chaupi aillumambash cuchun mandarca.

¹⁴Rubenbaj, Gadpaj aillucunahuan, Manasespaj chaupi ailluhuanga, paicunapaj taitacunapaj huasi ucu puracuna mashna cashcashnallatami, alpacunata paicunapaj cachun ña japinajurca.

¹⁵Chai ishcai aillucunahuan, chai chaupi ailluhuanga, Jericó pueblo chimbapura llactatami, Jordán yacu manñapi, indi llujshimuj ladoman ña japinajurca” nijurcami.

¹⁶Mandaj Diosca, Moisesmanmi cashna nishpa villajurca:

¹⁷“Chai alpacunata chaupishpa cuna runacunapaj shuticunaca, caicunami: Eleazar shuti curahuan, Nun shuti runapaj churi Josuehuanmi chaupinajunga.

¹⁸Chai alpacunata chaupishpa ayudachunga, tucui aillucunamanda shuj mandajta agllanguichi.

¹⁹Chai mandajcunapaj shuticunaca, caicunami: Judá aillumandaca, Jefone shuti runapaj churi Caleb shuti runata agllanguichi.

²⁰Simeonbaj mirai ailluamandaca, Amiud shuti runapaj churi Semuel shuti runata agllanguichi.

²¹Benjamín aillumandaca, Quislón shuti runapaj churi Elidad shuti runata agllanguichi.

²²Dan shuti runapaj mirai aillumandaca, Jogli shuti runapaj churi Buqui shuti mandajta agllanguichi.

²³Josepaj churicunamanda, Manasespaj mirai aillumandaca, Efod shuti runapaj churi Haniel shuti mandajta agllanguichi.

²⁴Efrainbaj mirai aillumandaca, Siftán shuti runapaj churi Kemuel shuti mandajta agllanguichi.

²⁵Zabulón shuti runapaj mirai aillumandaca, Parnac shuti runapaj churi Elizafán shuti mandajta agllanguichi.

²⁶Isacarpaj mirai aillumandaca, Azán shuti runapaj churi Paltiel shuti mandajta agllanguichi.

²⁷Aser shuti runapaj mirai aillumandaca, Selomi shuti runapaj churi Ahiud shuti mandajta agllanguichi.

²⁸Neftalipaj mirai aillumandaca, Amiud shuti runapaj churi Pedael shuti mandajta agllanguichi” nijurcami.

²⁹Chai runacunatami Mandaj Diosca, Canaán llactata israelcunaman chaupishpa cuchun mandarca.