Read Imbabura Highland Quichua NÚMEROS 36 Bible Online

NÚMEROS 36 - Imbabura Highland Quichua bible

NÚMEROS 36

¹Joseca, Manasespaj taitami carca. Manasesca, Maquir shuti runapaj taitami carca. Maquir shuti runaca, Galaad shuti runapaj taitami carca. Galaad shuti runapaj mirai familiacunapaj taitacunata mandajcunami, Moisespajmambash, israelcunapaj taitacunapaj huasi ucu puracunata mandajcunapajmambash shamushpa parlanajurca.

²Paicunaca cashnami ninajurca: —Mandaj Diosca, ñucanchita mandaj quiquin Moisestami, ñucanchi israelcunaman suerteta rurashpa, alpata chaupishpa cuchun mandarca. Shinallata ñucanchi huauqui Zelofehad shuti runa japina alpatapash, paipaj ushicunaman cuchunmi, Mandaj Diosca ñucanchita mandaj quiquin Moisesta mandarca.

³Ashtahuangarin chai huarmicuna, ñucanchi Israel purapillata caishuj aillucunahuan cazarajpica, chai huarmicuna japinajushca alpacunaca, caishuj aillu israelcunapajmi tucunga. Shina rurashpaca, ñucanchi taitamanda japinajushca alpacunatamari quichunga.

⁴Ashtahuangarin Israel puracunapaj alpacunata tigrachina huata chayajpica, chai huarmicuna japinajushca alpaca, maijan aillu purapi chai huarmi cazarashca cajpipash, chai aillupajmi tucunga. Chashnami ñucanchi taitacunapaj aillu purapi chai huarmicuna japinajushca alpacunaca tucuringa— ninajurcami.

⁵Paicuna shina nijpimi Moisesca, Mandaj Dios mandashcashnallata, israelcunata cashna nishpa mandarca: —Josepaj aillu puracunaca, chashna tucunatapachami ninajun.

⁶Mandaj Diosca, Zelofehad shuti runapaj ushicunamandaca, cashnami mandarca: Paicunapaj taitapaj aillu purahuanga, maijanhuan cashpapash paicuna munashcashna cazarachunlla.

⁷Shina rurashpaca israelcunaca, paicuna japinajushca alpacunataca, quiquin aillu purapillatami charinga. Shina rurajpimi chai alpaca, chai aillumandaca caishuj aillupajmanga na yalinga.

⁸Pipaj ushi cashpapash, israelcunapaj aillu purapi paicunapaj cachun alpacunata japina cashpaca, paipaj taitapaj aillumanda familiahuanllatami cazaranga. Israelcunaca, tucuicunallata paicunapaj taitamanda alpacunata japinajuchunmi, chashna cazaranga.

⁹Shina rurashpaca israelcunaca, paicuna japinajushca alpacunataca, shuj aillumanda caishuj ailluman na yalichinajungachu. Tucui Israel aillucunallatami, paicunapaj alpacunatallata charinga— nijurcami.

¹⁰Shina nijpimi Zelofehad shuti runapaj ushicunaca, Mandaj Dios imashna Moisesta mandashcashnallata ruranajurca.

¹¹Maala, Tirsa, Hogla, Milca, Noa shuti huarmicunaca, chashnami paicunapaj taitapaj huauquicunapaj churicunahuan cazaranajurca.

¹²Zelofehad shuti runapaj ushicunaca, paicunapaj taitapaj familia puracunapi tiaj jarihuan cazarajpimi, paicuna japinajushca alpacunaca, Manasés aillu purapajllata quedarca. Manasesca, Josepaj churimi carca. Zelofehad shuti runapash, Manasespaj mirai purami carca.

¹³Cai shimicunaca, mandashca shimicuna, pactachinajuchun cushca shimicunami. Cai shimicunataca, Mandaj Diosmi israelcunaman Moisesta mandarca. Cai shimicunataca, Jordán yacu manñapi, Jericó pueblo chimba purapi tiaj Moab llacta pambacunapimi curca.