Read Imbabura Highland Quichua NÚMEROS 6 Bible Online

NÚMEROS 6 - Imbabura Highland Quichua bible

NÚMEROS 6

¹Mandaj Diosca, Moisestaca cashnami nijurca:

²“Israelcunaman, cashna nishpa villangui: ‘Maijan jari cashpa, huarmi cashpapash, nazareo tucushpa shicanyashpa, Mandaj Diosta servishapacha nishpaca,

³vinota, sidrata na ufiangachu. Vinomanda, sidramanda rurashca vinagretapash, uvasta cutashpa llujchishca ima ufianacunatapash na ufiangachu. Shinallata chaira pallashca uvastapash, chaquichishca uvastapash na micungachu.

⁴Nazareo tucushca punllacunapica, uvasmanda rurashcacunataca, imatallapash na micungachu. Muyutapash, caratapash na micungachu.

⁵Nazareo tucushapachami nishca tucui punllacunapica, ajchatapash na rutuchingachu. Mandaj Diospajlla shicanyashca punllacuna pactangacamanmi, Diospajlla causanga. Shinallata ajchatapash, viñachun saquingallami.

⁶Mandaj Diospajlla shicanyashca tucuilla punllacunapica, huañushcapajmambash na quimiringachu.

⁷Paipaj taita cajpipash, paipaj mama cajpipash, paipaj huauqui cajpipash, paipaj pani huañujpipash, ama mapayangapaca na quimiringachu. Taita Diospajlla shicanyashcataca, paipaj uma ajchami ricuchijunga.

⁸Nazareo tucushca punllacunapica, Mandaj Diospajlla shicanyashcami canga.

⁹Maijan cashpapash, paipaj ladopi ñapash cungashcapi huañujpica, Diospajlla tucushcata ricuchijuj paipaj uma ajchaca mapami tucunga. Shinamandami pai armana punllapica, paipaj ajchata rutuchinga. Canchis punllapimi, ajchata rutuchinga.

¹⁰Pusaj punllapica, ishcai urpita, na cashpaca ishcai palomata apamushpami, Dioshuan tuparina jatun carpa pungupi curaman cunga.

¹¹Chai animalcunataca curallatami, shujtaca juchamanda Diosman cujunga. Caishujtaca, Diosman cushpami tucuillata rupachijunga. Chai huañushcapi tacarishca juchamanda Diosman cushpami, chai punllapica paipaj ajchataca, cutin Diospajlla tucushcata ricuchishpa viñachijunga.

¹²Chai jipaca, cutinmi Mandaj Diospajlla tucushpa nazareo tucunga. Diosta cutin servi callaringapaca, shuj huatata charij jari llamatami, juchamanda Mandaj Diosman cunga. Nazareo tucushcata mapayashcamandaca, punda punllacunapi, Diosta servishcapash yangami quedanga.

¹³Nazareo tucushpa Diospajlla shicanyachishca punllacuna pactajpica, chai nazareo runaca, cai mandashcatami rurana: Dioshuan tuparina jatun carpa pungumanmi shamunga.

¹⁴Chaipica, shuj huatata charij, imapash na tucushca maltun llamatami, Mandaj Diosman cushpa tucuillata rupachinga. Shinallata shuj huatata charij, imapash na tucushca malta llamatami, juchamanda cunga. Dioshuan ali cangapaca, imapash na tucushca jari llamatami cunga.

¹⁵Shinallata ashtahuan ali jacuta aceitehuan chapushpa masashcatapashmi, levadura illaj mishqui tandata rurashpa, canastapi apamunga. Levadura illaj rurashca tortillacunatapash, aceitehuan javishpami apamunga. Chai caranacunataca, talina vinohuanmi apamunga.

¹⁶Juchamanda cushcatapash, animalta Diosman cushpa tucuillata rupachinatapash, curami Mandaj Diospaj ñaupajpi cunga.

¹⁷Mandaj Dioshuan ali cangapaj carashca jari llamataca, levadura illaj tandacunata churashca canastahuanmi Diosman cunga. Shinallata curallatami, Diosman imatalla caranatapash, talina vinotapash Diosman cunga.

¹⁸Chai jipami, nazareo tucushpa Diospajlla shicanyarishca runaca, Diospajlla viñachishca ajchataca, Dioshuan tuparina jatun carpa pungupi rutuchinga. Chai ajchata japishpami, Dioshuan ali cangapaj Diosman carashcata rupachijuj nina jahuapi churashpa rupachinga.

¹⁹Chai jipami, jari llamapaj rigra aicha yanushcatapash, canastamanda levadura illaj shuj mishqui tandatapash, levadura illaj shuj tortillatapash curallata japishpa, nazareo runapaj maquipi churanga. Diospajlla viñachishca ajchata rutuchishca jipami, chashna churanga.

²⁰Chaicunataca, curami Mandaj Diospaj ñaupajpi vichai cuyuchishpa, Diosman cunga. Chaicunaca, Diospajlla shicanyachishca cashcamandami, curapajlla canga. Shinallata Diospaj ñaupajpi vichai cuyuchishpa, paiman cushca pecho aichapash, rigra aichapash curapajllami canga. Chai jipami nazareo runaca, vinota ufiai ushanga.

²¹Nazareo tucushcamanda, Mandaj Diosman imagutapash carashapachami nishcata, nazareocuna carachun mandashcacunaca chaicunami. Ashtahuan imaguta carai ushashpapash caranallami. Diosman imagutapash carashapachami nishcashnallatami, chashnatapacha pactachinga. Nazareo tucushpa imashna cachun mandashcashnallatami pactachinga’ nishpa villangui” nijurcami.

²²Mandaj Diosca, Moisestaca cashnami nijurca:

²³“Aaronmambash, paipaj churicunamambash, cashna nishpa villangui: Israelcunataca, cashna nishpa bendicianguichi:

²⁴‘Mandaj Diosca, canda bendiciapachun, paillata candaca huacaichipachun.

²⁵Mandaj Diosca, candaca paipaj ñavihuan punchayachipachun, paillata candaca llaquipachun.

²⁶Mandaj Diosca, canda ricupachun. Paillata canman casilla ali causaita cupachun’ ninguichi, nishpa villangui.

²⁷Ñuca shutipi israelcunata bendiciajpimi, ñucapash paicunataca bendiciasha” nijurcami.