Read Imbabura Highland Quichua NÚMEROS 8 Bible Online

NÚMEROS 8 - Imbabura Highland Quichua bible

NÚMEROS 8

¹Mandaj Diosca, Moisestaca cashnami nirca:

²“Aaronman, cashna nishpa villangui: ‘Canchis lamparacunata michata japichishpa, candelero ñaupajman punchayachijuchun, churangui’ ningui” nircami.

³Aaronga chashnallatami rurarca. Mandaj Dios Moisesman mandashcashnallatami, lamparacunapi michata japichishpa, candelero ñaupa ladoman punchayachijuchun churarca.

⁴Candelerotaca, cashnami rurarca. Orota rurashpami, martillohuan labrashca carca. Chaquimandapacha sisacunacamanmi, martillohuan labrashca carca. Mandaj Dios, Moisesman imashna rurachun ricuchishcashnallatami, chai candelerotaca chashnatapacha rurarca.

⁵Mandaj Diosca, Moisestaca cashnatapashmi nijurca:

⁶“Levitacunataca, Israel puracunamanda shicanyachishpa, paicunapaj juchata anchuchijuchun, cashna rurangui.

⁷Paicunapaj juchata anchuchijuchunga, cashnami rurana cangui: Juchata maillachina yacuta paicunapaj jahuapi tsirapachingui. Chai jipaca, paicunallata paicunapaj tucui cuerpota cuchillohuan llagllarishpa, paicunapaj churajunacunatapash tajshachun mandangui. Chashna rurashpami, paicunaca mapa illaj tucunga.

⁸Chai jipaca, shuj maltun shicutami, ashtahuan ali jacuta aceitehuan chapushpa masashcandi japinajunga. Shinallata paicunapaj juchamandapash, shuj maltun shicutallata japingui.

⁹Levitacunataca, ñucahuan tuparina jatun carpa ñaupajpi tandanajuchun mandangui. Tandanajushca tucui israelcunatapash tandachingui.

¹⁰Mandaj Dios ñuca ñaupajman levitacunata ña tandachimushpaca, israelcunaca levitacunapaj uma jahuapimi paicunapaj maquita churanga.

¹¹Aaronmi, Mandaj Dios ñucaman israelcuna carashca levitacunataca cuhuanga. Chashna rurajpimi, levitacunaca Mandaj Dios ñucapajta rurashpa servinajunga.

¹²Levitacunapash, maltun shicucunapaj uma jahuapimi, paicunapaj maquita churanga. Paicuna chashna rurajpimi, shuj maltun shicutaca, paicunapaj juchamanda ñucaman cuhuangui. Caishujtaca, paicunapaj juchata anchuchijuchun, Mandaj Dios ñucaman cushpa tucuillata rupachingui. Levitacunapaj juchamandami, chashna rurangui.

¹³Chai jipaca, levitacunataca Aaronbaj ñaupajpi, paipaj churicunapaj ñaupajpi shayachishpa, Mandaj Dios ñucaman cuhuangui.

¹⁴Chashnami levitacunataca, Israel puracunamanda ñucapajlla cachun shicanyachingui. Chashna rurajpimi, levitacunaca ñucapajlla tucunga.

¹⁵Chai jipami, levitacunaca ñucahuan tuparina jatun carpapi ñucapajta rurangapaj shamunajunga. Paicunaca, mapa illajcunami canga. Shinamandami paicunataca, ñucaman cuhuangui.

¹⁶Levitacunaca, Israel puracunapica punda huacharishca churicunapaj randimi, ñucapajlla shicanyachi tucushca. Paicunataca, tucui israelcunapaj punda churicunapaj randimi japircani.

¹⁷Israel puracunapica punda churicunapash, punda huacharishca jari animalcunapash, tucuilla ñucapajmi. Paicunataca, Egipto llactapi punda churicunata, punda huacharishca jari animalcunata huañuchishca punllamandapachami, ñucapajlla cachun shicanyachircani.

¹⁸Levitacunataca, tucuilla israelcunapaj punda churicunapaj randimi japircani.

¹⁹Ñucami levitacunataca, Israel puramanda agllashpa, Aarondapash, paipaj churicunatapash ayudachun curcani. Ñucahuan tuparina jatun carpapica, israelcunapaj randica, levitacuna ñucata servinajuchun, israelcuna Dioshuan ali tucuchumbash, paicuna mañanajuchunmi curcani. Paicuna mañajpica, ñucapajlla huasiman israelcuna chayamujpipash, huañuchij llaquita israelcuna ama japichunmi, chashna curcani” nijurcami.

²⁰Moisespash, Aaronbash, tandanajushca tucui israelcunatapash, levitacunamanda Mandaj Dios imashna Moisesta mandashcashnallatami, levitacunataca tucuita rurashpa pactachinajurca. Shinami israelcunaca, levitacunataca Diospajlla cachun shicanyachinajurca.

²¹Levitacunaca, mapa illajcuna tucushpami, paicunapaj churajunacunatapash tajshanajurca. Shina cajpimi Aaronga, levitacunataca Mandaj Diospaj ñaupajman apamushpa curca. Aaronga, paicuna mapa illaj quedachunmi, paicunapaj juchamanda Diosman cujurca.

²²Chai jipami levitacunaca, Mandaj Dioshuan tuparina jatun carpapica, Aaronbaj ñaupajpi, paipaj churicunapaj ñaupajpipash, Diospajta rurangapaj shamunajurca. Mandaj Dios levitacunamanda Moisesta imashna mandashcashnallatami, levitacunataca tucuita rurashpa pactachinajurca.

²³Chai jipami Mandaj Diosca, Moisesman cashna nishpa villajurca:

²⁴“Levitacunaca, ñucahuan tuparina jatun carpapi ñucapajta rurashpa servingapaca, ishcai chunga picha huatata charijmanda vichaimanmi yaicumunga.

²⁵Paicunaca, picha chunga huatata charingacamanllami, ñucapajta ruranajunga. Chai jipaca, cutinga na servingapaj yaicui ushangachu.

²⁶Shina cashpapash paicunapaj huauquicunahuanmi, ñucahuan tuparina jatun carpata cuidanajunga. Ashtahuangarin punda servishcashnallataca, ña na servinajungachu. Levitacuna ñucapajta ruranajuchunga, chashnami rurana cangui” nijurcami.