Read Imbabura Highland Quichua NÚMEROS 9 Bible Online

NÚMEROS 9 - Imbabura Highland Quichua bible

NÚMEROS 9

¹Mandaj Diosca, Sinaí shuti jichushca pambapimi, israelcuna Egipto llactamanda llujshimushcapash, ña ishcai huatapaj callari quillapi, Moisesman cashna nishpa villajurca:

²“Israelcunaca, pascua punllapi micuitaca, chai micuita rurana punllapillatami ruranajunga.

³Cai callari quillapi chunga chuscu punlla tucujpica, chishimanda amsayangacaman chai micuna punllallata cushijushpa micunguichilla. Tucuita imashna rurana cashcashnallata, tucuita imashna mandashcashnallata cushijushpa micunguichilla” nircami.

⁴Shina nijpimi Moisesca, israelcunataca pascua punllapi cushijushpa micunajuchun mandarca.

⁵Shinamandami israelcunaca, Sinaí shuti jichushca pambapica, huata callari quillapi chunga chuscu punllapica, chishimanda amsayangacaman, pascua punllata cushijushpa, jatun micuita ruranajurca. Mandaj Dios, Moisesman tucuita mandashcashnallatami, israelcunaca chashnatapacha ruranajurca.

⁶Ashtahuangarin huaquingunaca, huañushcapi tacarishcamanda mapa cashpami, pascua punllapi micuitaca na ushanajurca. Chaimandami, chai punllallata Moisespaj ñaupajman, Aaronbaj ñaupajman shamushpa,

⁷paicunaca cashna ninajurca: —Ñucanchica, huañushcapi tacarishpallami mapayashcanchi. ¿Imashpata caishuj israelcunahuan pascua punllapi, Mandaj Diosman imagutapash caranamandaca jarcai tucushunyari?— ninajurcami.

⁸Shina nijpimi Moisesca, cashna nishpa tigrachirca: —Caipi shuyaichi, Mandaj Dios cangunamanda imata mandajtara uyasha— nircami.

⁹Chaipimi Mandaj Diosca, Moisestaca cashna nirca: “Israelcunaman cashna nishpa villangui:

¹⁰‘Canguna puramandapash, cangunapaj mirai puramandapash, huañushcapi maijambash tacarishpa mapayashca cashpa, na cashpaca caruman rijushpa, na micui ushashca cashpaca, Mandaj Dios ñucata yarishpa pascua punllapi cushijushpa micunataca micuchunlla.

¹¹Paicunaca, cati quilla chunga chuscu punllapimi, chishimanda amsayangacaman cushijushpa micunajunga. Chai punllapica jayaj jihuahuan, levadura illaj tandahuanmi micunajunga.

¹²Diosman cushpa huañuchishca animalpaj aichataca, cayandi punllapaca imatallapash na saquingachu. Chai huañuchishca animalpaj tullucunatallapash, na faquingachu. Pascua punllapi imashna tucuita rurana cashcashcashnallatami cushijushpa micunajunga.

¹³Ashtahuangarin maijambash mapa illaj cashpata, maimambash na rishca cashpata, pascua punllapi micunata na micushpaca, Israel puracunamandaca anchuchi tucungapachami. Mandashca punllapi, Mandaj Diosman imagutapash na carashcamandami, chai runaca juchamanda llaquita apanga.

¹⁴Shuj llactamanda shamushca runa cangunahuan causajushpa, paipash Mandaj Dios ñucata yarishpa, pascua punllapi micushpaca, pascua punllapi imashna rurana cashcashnallata, cushijushpa micuchun mandashcashnallata rurachun. Shuj llactamanda cashpa, chai llactapillata huacharishca cashpapash, imashna rurana cashcashcashnallata ruranguichi’ nishpa villangui” nijurcami.

¹⁵Diospaj jatun carpata shayachinajui punllapica, imashna causanata yachachishca shimicunata alichishca arca tiajuj jatun carpa jahuapimi, fuyu quilparca. Chishi amsayajujmanda cayandi tutamandacamanmi, Diospaj jatun carpapica ninashnalla tiajuj ricurijurca.

¹⁶Chashnami punllandi ricurijurca. Punllapica, fuyumi quilpajurca. Tutaca, nina rupajunshnami ricurijurca.

¹⁷Diospaj jatun carpa jahuamanda fuyu ña vichai rijpica, israelcunapashmi rinajurca. Fuyu maipi shayarijpipash chaipimi, paicunapaj carpacunata shayachishpa tianajurca.

¹⁸Israelcunaca, Mandaj Dios mandajpillami rinajurca. Mandaj Dios mandajpillatami, carpacunatapash shayachishpa tianajurca. Diospaj jatun carpa jahuapi fuyu tiajui punllacunaca, paicunaca carpacunapi tianajurcallami.

¹⁹Diospaj carpa jahuapi fuyu unai punllacunata tiajujpica, israelcunaca Mandaj Dios mandashcata cazushpami, maimambash na rinajurca.

²⁰Diospaj carpa jahuapi fuyu ashalla punllacunata tiajujpica israelcunaca, Mandaj Dios mandajpimi, carpacunata shayachishpa tianajurca. Shinallata Mandaj Dios mandajpillatami rinajurca.

²¹Chishimandapacha tutamandacaman fuyu tiajujpi, na cashpaca tutamanda fuyu vichai rijpica, israelcunaca rinllami carca. Na cashpaca, shuj punllata chishashpa tutayajpi, fuyu vichai rijpica rinllami carca.

²²Fuyuca, huaquimbica ishcai punllatalla, huaquimbica shuj quillata, na cashpaca shuj huatatami, Diospaj carpa jahuapica tiajurca. Fuyu chaipi tiajujpica, israelcunapash na maimambash rishpami, chaipi tianajun carca. Ashtahuangarin fuyu vichai rijpica, paicunapashmi rinajurca.

²³Mandaj Dios mandajpillami, carpacunata shayachishpa tiarinajurca. Mandaj Dios mandajpillatami rinajurca. Mandaj Dios mandashpa, Moiseshuan villachishcashnallatami paicunaca, Mandaj Dios mandashcata cazunajurca.