Read Imbabura Highland Quichua MIQUEAS 1 Bible Online

MIQUEAS 1 - Imbabura Highland Quichua bible

MIQUEAS 1

¹Jotam, Acaz, Ezequías shuti jatun mandajcuna Judá llactata mandanajui punllacunapimi Mandaj Diosca, Moreset shuti pueblomanda Miqueas shuti runaguman, cai shimicunata villarca. Paica, Samaria pueblota, Jerusalén pueblota llaquichinatami ricushca.

²Tucui gentecuna, uyaichi. Cai pachapash, cai pachapi tucui ima tiajcunapash, ali uyaichi: Mandaj Jatun Diosllata, cangunata llaquichinataca, paipajlla huasimanda pai Jatun Diosllata ricujuchunmi munani.

³Shina cashcamanda ricuichi. Mandaj Diosca, pai causajuj huasimanda llujshishpami, cai pachapi tiaj urcucunata sarushpa, urai shamunga.

⁴Pai sarujpimi, urcucunaca yacuyanga. Pugru pambacunapash, ninapi vira yacuyanshnami yacuyashpa huashajunga. Jahuamanda yacu talirijunshnami taliringa.

⁵Jacobopaj mirai israelcuna na cazushpa juchata rurashcamandami, tucui cai llaquicunaca japinga. Jacobopaj miraicunataca, ¿pita nalita rurachishcanga? ¿Nachu Samaria pueblopi causajcuna chaitaca rurachishcanga? ¿Judá llactapi tiaj altarcunaca maijangunata? ¿Nachu Jerusalén?

⁶“Shinamandami Samaria pueblotaca, rumi mundundalla saquisha. Uvasta tarpuna alpatami rurasha. Pircashca rumicunatapash, pugru pambaman caita chaita shitashpami, callari rumicunatapash llujchisha.

⁷Paicunapaj rumi dioscunatapash, tucuillatami ñutushpa saquisha. Paicuna imata charishcacunataca, tucuillatami ninapi rupachisha. Paicunapaj yanga dioscunatapash, llaquinayaitami tucuchisha. Paicunaca, culquimanda huainayaj huarmicunamanda japishpami, imacunatapash tandachinajurca. Chaicunaca, culquimanda huainayaj huarmicunapajllatami tigranga” nircami.

⁸Chai tucui llaquicunamandaca, llaquinayaita caparishpa huacashpami, churajunapash illaj lluchulla purisha. Chacal nishca, avestruz nishca animalcunashnami, llaquinayaita huacasha.

⁹Samaria pueblopi causajcunapaj nanaica, ninanda nanachij ung:uimari. Chai ung:uica, Judá llactacamanmi chayamurca, ñuca llacta puracuna causanajuj Jerusalén pungucamambashmi chayamurca.

¹⁰Chai llaquicunataca, Gat shuti pueblopica na villanachu canguichi, na yapa huacanachu canguichi. Chai llaquihuanga, Bet-le-afra shuti llactapi tiaj ñutu alpapimi revolcana canguichi.

¹¹Safir shuti pueblopi causajcunalla, pinganayaita lluchulla ñaupashpa richiyari. Zaanán shuti pueblopi causajcunaca, na llujshinajunllu. Bet-esel shuti pueblopi causajcunataca, llaqui japijpimi na ayudai ushanga.

¹²Marot shuti pueblopi causajcunaca, ali causanatallami ninanda munanajurca. Chaimandami Mandaj Diosca, Jerusalén pungucaman llaquicunata urai cachamushca carca.

¹³Laquis shuti pueblopi causajcunalla, cangunapaj carretacunapica ali calpaj caballocunata huataichiyari. Cangunami, Sion shuti pueblopi causajcunataca, juchata ruranata callarichircanguichi. Israel llactapica, cangunamandami jariyashpa na cazunaca callarirca.

¹⁴Shinamandami canguna imata charishcacunataca, Moreset-gat shuti pueblopi causajcunaman cuna canguichi. Aczib shuti pueblopi tiaj huasicunaca, Israel llactata jatun mandajcunata umachingapajmi canga.

¹⁵Maresa shuti pueblopi causajcunalla, cangunata quichunajuchunga shuhuacunatami pushamusha. Paicuna shamujpimi, juyailla sisashna israelcunaca, Adulam shuti pueblopi pacajungapaj calpanajunga.

¹⁶Judá llactalla, cangunapaj juyashca huahuacunamandaca, ajchata tucuilla ruturichiyari. Cangunapi causajcuna shuj llactaman prezu apai tucushcamandaca, jatun angashna lluchu uma tucuichiyari.