Read Imbabura Highland Quichua MIQUEAS 3 Bible Online

MIQUEAS 3 - Imbabura Highland Quichua bible

MIQUEAS 3

¹Cashnami nircani: Cunanga, Jacobopaj mirai israelcunata mandajcunapash, pushajcunapash, caita ali uyahuaichi. Imatapash cashcatapacha ruranata yachanaca, ¿nachu cangunapaj?

²Cangunaca, alita ruranata fiñashpami, nalita ruranatara munanguichi. Tullumandaca caratapash, aichatapash anchuchishpami saquinguichi.

³Shinallata ñuca llacta puracunatami micunguichi, paicunapaj caratami lluchunguichi. Paicunapaj tullucunatapash, mangapi churashpa yanuna tullucunatashnami faquinguichi. Paicunaca, yanuna mangapi tiajuj aichashnami.

⁴Shinamandami, Mandaj Diosta caparishpa mañanajujpipash, paica napacha tigrachinga. Ashtahuangarin chai llaqui punllacunapica, paipaj ñavitaca cangunamanda shujmanmi churanga. Canguna jatun nalita rurashpa causanajushcamandami, chashna ruranga.

⁵Ñuca llacta puracunata pandachingapaj caparishpa villajcunataca, Mandaj Diosca cashnami nin: “Paicunaca, micuna tiajpica, ali casilla causaimi tianga ninajunmi. Ashtahuangarin pipash micunata na carajpica, paihuan macanajui tianatami villanajun.

⁶Chaimandami Dios villashcatashna villashcapash, tutashna tucunga. Yachaj tucushpalla villashcapash, yanami tucunga. Chai villajcunapaca, indipash huashajungami, punllapash yana yanami tigranga.

⁷Shinamandami chai villajcunaca pingai tucunajunga, yachajcunapash musparinajungami. Paicunaca, Taita Diospash nimata na tigrachijpimi, tucuicuna shimita vichanajunga” ninmi.

⁸Ashtahuangarin ñucaca, Mandaj Diospaj Espíritu ushaita cujpi, ushaihuan jundami cani. Paimi, imatapash cashcatapacha ruranatapash, ushaitapash carahuarca. Chaimandami Jacobopaj mirai israelcuna na cazushpa juchata rurashcataca, na manllashpa villasha.

⁹Cunanga, Jacobopaj mirai israelcunata mandajcunapash, soldadocunata mandajcunapash, caita ali uyahuaichi: Cangunaca, aliguta ricushpa mandanataca millanayachinguichimi, japinatallata cunatapash nalimanrami tigrachinguichi.

¹⁰Siondaca, gentecunapaj yahuarta jichashpami shayachinguichi. Jerusalendaca, imatapash cashcatapacha na rurashcacunahuanmi shayachinguichi.

¹¹Paicunapaj juezcunaca, imatapash pacalla cujpi japishpami, ima llaquitapash alichinajun. Paicunapaj curacunapash, culquimandallami yachachinajun. Paicunaman villajcunapash, culquimandallami yachaj tucushpa villanajun. Chashna rurashpapash, paicunaca Mandaj Diostaca yariashpami causanajunchi nishpami, cashna ninajun: “Mandaj Diosca ñucanchihuanmi. Ima llaquipash, ñucanchitaca na japingachu” ninajunmi.

¹²Canguna chashna rurashcamandami, Siondaca tarpuna alpatashna yapunga. Jerusalenga, rumita mundunashcashnami tucunga. Diospaj huasi tiajuj urcuca, jatun urcushna sachamanmi tigranga.