Read Imbabura Highland Quichua MIQUEAS 7 Bible Online

MIQUEAS 7 - Imbabura Highland Quichua bible

MIQUEAS 7

¹¡Aij ñucalla! Rupai punllacunapi granocunata tandachishca jipa, puchushcata mascanshnami cani. Uvasta pallashca jipa, puchushcata pallajunshnami cani. Ashtahuangarin micungapaca, shuj racimollapash na tiarcachu. Ñucaca, punda fucushca granoguta tucui shunguhuan micungapajmi munarcani.

²Cai llactapi causajcunata llaquijmari illarca. Gente purapica, aligutalla ruraj runaca pipash na tianllu. Tucuicunami, huañuchishpa yahuarta jichangapaj pacalla chapanajun. Tucuicunallatami, linllita churashpa urmachinshna, paicunapaj huauquitallata llaquichinajun.

³Nalita rurashpa pactachingapajmi, jatun mandajca imatapash carachun mañajun. Juezpash carashcata japishpami, ima llaquitapash alichin. Mandajpash, paipaj shungu munashcata rimashpaca, chaitapachami ruran.

⁴Paicuna purapi alicachi tucushca runaca cashashnami. Aliguta ruraj runapash, zarza casha yurashnami. Chapariashpa cuidaj runacuna villashcashnallatami, llaquichi tucuna punllapash pactamujun. Cunanmi muspachi tucunguichi.

⁵Cangunapaj cumba imata nijpipash, na crinallachu canguichi. Jatun mandajtapash, na yariashpa causanachu cangui. Canhuan puñuj cambaj huarmimambash, imatapash ama parlanguillachu.

⁶Churica taitatami na cazun, ushipash mamatami macan, jachumbash suedratami jariyan. Runata fiñajcunaca, quiquin huasi ucu purallatami.

⁷Ashtahuangarin ñucaca, Mandaj Diostami ricuriasha. Ñucata quishpichij Taita Diostami shuyasha. Ñuca Taita Diosmi, ñuca mañajujtaca uyahuanga.

⁸Ñucata fiñajlla, ñucamandaca ama cushijuichu. Ñucaca urmashca cashpapash, jatarishallami. Yana yana tutapishna causajujpipash, Mandaj Diosmi ñuca michagushna canga.

⁹Ñucaca juchata rurashpami, Mandaj Diosta fiñachishcani. Chaimandami cunanga, ñuca imatalla rurashcacunata ricuchishpa alichingacaman, pai fiñarishpa cachamushca llaquitaca apajunalla cani. Paimi, ñucataca michamanshna llujchihuanga, pai imatapash cashcatapacha ruraj cajtaca ricushapachami.

¹⁰Shina rurashcataca, ñucata fiñajpash ricushpami, ninanda pingai tucunga. Paica ñucataca: “¿Canda Mandaj Taita Diosca maipitayari?” ninmi carca. Ashtahuangarin cunanga paitarami, ñangunapi sirij turutashna sarushpa llaquichijujta, ñuca ñavihuambacha ricusha.

¹¹Cambaj muyundi jatun pircacuna urmashcata alichina punllami chayamujun. Chai punllapimi, linderocunapash ashtahuan caruman miranga.

¹²Chai punllapica, Asiria llactamandapash, muyundi jatun pircahuan pueblocunamandapashmi, cambajman shamunajunga. Muyundi jatun pircahuan pueblocunamanda, jatun Yacu ladocaman causajcunapash, mama cuchamandaca caishuj mama cuchacaman, caishuj urcumandaca chaishuj urcucamanmi causaj shamunajunga.

¹³Cai pachapi causajcunaca, imatapash nalita rurashcamandami, llaquinayaita tucuchi tucunga.

¹⁴Can agllashcacunataca, cambaj tauna caspihuan michipangui. Cambajlla cachun agllashca llamagucunaca, ali jihua tiaj urcupimi paicunalla causanajun. Paicunataca, punda huatacunashnallata Basán shuti, Galaad shuti urcu jihuacunaman pushapairi.

¹⁵Ñucami, Egiptomanda llujchimui punllapi juyaillacunata rurashcashnallata rurashpa ricuchisha.

¹⁶Tucui ushaita charishcata ricushpami, shuj llactacunapi causajcunaca ninanda pingai tucunajunga. Maquita shimipi churashpami, rinripash na uyajcuna tucunajunga.

¹⁷Paicunaca, culebrashnami ñutu alpata lambinajunga. Culebracuna manllarishpa chujchunshnami, utujupi chujchunajunga. Paicunaca, ñucanchita Mandaj Taita Diospajmanmi, manllaihuan chujchushpa tigrarinajunga. Can llaquichinatami manllanajunga.

¹⁸Taita Dioslla, canshnalla shuj Diosca, ¿pita tiangayari? Canga, can agllashca puramanda huaquin puchushcacuna ima nalita rurashcatapash cungajmi cangui. Paicunapaj juchatapash cungajmi cangui. Paica, na causaita causaicaman fiñarinllu, ashtahuangarin llaquij cajta ricuchishpami cushijun.

¹⁹Paica, cutinllatami ñucanchitaca llaquinga. Ñucanchi ima nalita rurashcacunatapash pambangami. Ñucanchi juchacunatapash, mama cucha ucu ucumanmi shitanga.

²⁰Ñucanchi ñaupa taita Jacobomambash, taita Abrahammambash llaquishapachami nishpa, na llullashpa juramentushcataca pactachinguipachami.