Read Imbabura Highland Quichua NAHUM 1 Bible Online

NAHUM 1 - Imbabura Highland Quichua bible

NAHUM 1

¹Nínive shuti pueblota Dios llaquichinatami villashca. Elcos shuti pueblomanda Nahum shuti runa, muscuipishna ricushcata escribishca libromi.

²Mandaj Diosca, paipajlla cachun munaj Taita Diosmi. Imashna llaquichishcashnallata llaquichij Diosmi. Mandaj Diosca, imashna llaquichishcashnallata llaquichij, ninanda fiñarij Diosmi. Paita na ricunayachijcunatapash, imashna llaquichishcashnallata randi llaquichin. Pai fiñarishcataca, paita fiñajcunamanmi alichin.

³Mandaj Diosca na ñapash fiñarij, ninan ushaita charij Diosmi. Nalita ruraj runataca, ima nalitapash na rurajtashnaca na ricungachu. Mandaj Diosca ninan huairahuan tamiapi, jatun acapanapimi purin. Fuyupash, pai purina ñutu alpashnami.

⁴Paica, mama cucha yacutapash rimashpami chaquichin. Chaimandami jatun yacucunapash, tucuilla chaquin. Basán shuti llactapash, Carmelo shuti, Líbano shuti urcucunapi tiaj sisacunapashmi tucuchi tucurca.

⁵Paipaj ñaupajpica, urcucunapash chujchunmi, lomacunapash yacuyanmi. Pai ricurijpica, alpapash manllarinmi. Cai pachapash, paipi causajcunapash tucuillami manllarin.

⁶Pai fiñarishcapaj ñaupajpica, ¿pita shayajungallayari? Nina japirinshna pai fiñarishcapaj ñaupajpica, ¿pita shayarishpa quedai ushangayari? Pai ninanda fiñarishcapash, rupajuj ninashnami talirijun. Chaihuanmi, jatun jaca rumicunapash chaupirin.

⁷Mandaj Diosca alimi. Paica, ninan llaqui punllapipash shinlli torreshnami. Paitalla yariashpa causajcunataca rijsinmi.

⁸Ashtahuangarin paita na ricunayachijcunataca, manllanayai yacuta jundachimunshnami tucuchinga. Paita fiñajcunataca, yana yana tutami catiriashpa llaquichinga.

⁹¿Cangunaca, imata yarishpata Mandaj Diostaca fiñanguichi? Paica tucuchingami. Paita fiñajcunataca, na ishcai viajeta llaquichingachu.

¹⁰Huatarishpa viñashca cashacunashna cashpapash, ninandapacha machashcacuna cashpapash, alipacha chaquishca fangashnami tucuchi tucunga.

¹¹Canmandami, Mandaj Diosta fiñashpa nalita yarij runaca llujshirca. Paica, jatun nali yuyaita cuj runami.

¹²Chaimandami Mandaj Diosca, cashna nin: “Paicunaca, casilla ali causaita charishpapash, ashtaca ashtacacuna cashpapash, anchuchi tucungami. Paicunaca chingangami. Candaca, ninandapachami ña llaquichircani, na ashtahuan llaquichishachu.

¹³Cunanga, paicuna huatashca cambaj jahuapi yugotapash faquishpami, canda huatashca yugo caracunatapash fitisha” ninmi.

¹⁴Ashtahuangarin Mandaj Diosca, canmandaca cambaj shutita yarinallapash ama tiachunmi mandanga. “Cambaj diospaj huasipi tiajuj labrashpa rurashca diostapash, yacuyachishpa rurashca diostapash tucuchishami. Cambash imapajpash na valij tucushcamandami, canda pambana utujutapash chaipillata churasha” ninmi.

¹⁵Ricuichi, casilla ali causaimanda ali villaita villajmari, jahua urcucunata shamujun. Judá llactalla, canga fiestacunata rurailla. Can imagutapash Diosman carasha nishcataca pactachilla. Chai nalita ruraj runaca, cutinga na ashtahuan llaquichingachu, paica ñami chingaita chingarca.