Read Imbabura Highland Quichua NAHUM 2 Bible Online

NAHUM 2 - Imbabura Highland Quichua bible

NAHUM 2

¹Canda fiñashpa tucuchij runami vichai rirca. Shinlli torretapash ricurianguiyari. Ñandapash chaparianguiyari, shinllita chumbiliriyari, ushaita ashtahuan japiyari.

²Mandaj Diosca, Jacobopaj miraicuna juyailla canataca, israelcuna juyailla canashnallatami cutin alichinga. Shuhuacunami, paicuna imata charishcacunataca shuhuashpa apanajurca. Paicunataca, uvas retoñotashnami sarunajurca.

³Paicunapaj shinlli soldadocunapaj jarcarina escudocunaca, pucayashcami canga. Chai soldadocunapash, yanalla puca churajunata churajushcami canga. Macanajuna carretacunaca, michumbi ninata japichishcashnami canga. Chai alichirinajui punllapica, haya nishca quirucunapashmi chujchunga.

⁴Macanajuna carretacunahuanga, plazacunamanmi calpashpa yaicunajunga. Ñangunapipash culunlla huacashpami, ruedacunaca muyunajunga. Chai carretacunaca, ninata japichishca michunshnami ricuringa. Chaicunaca, punchapamba shitamunshnami calpanajunga.

⁵Paica, paipaj shinlli soldadocunatami yaringa. Paicunaca, shamunajushpallatami sarurinajunga. Pirca ladoman ucha rishpami, jarcashpa macanajungapaj alichirinajunga.

⁶Jatun yacucunapaj pungucunapash pascaringami. Chai yacucunami, mandashpa tiajuna huasitapash urmachinga.

⁷Jatun mandaj huarmitaca, prezumi japinga. Paita vichai apamuchun mandajpimi, paita servij huarmicunaca, pechopi huactarishpa palomacunashna huacashpa apanajunga.

⁸Ñaupa punllacunaca, Nínive shuti puebloca, cuchayashca yacushnami carca, ashtahuangarin paicunaca pacajungapajmi calpanajun. Paicunataca: “¡Shuyaichi, shuyaichi!” nijpipash, pipash na tigrashpa ricunllu.

⁹Culquitapash, orotapash japishpa apaichilla. Chai tucui juyailla, valishca munanayai charishcacunaca mashnata apanajujpipash, na tucuringachu.

¹⁰Chushaj, shaijushca, llaquinayaita tucuchi tucushcami quedashca. Shungupipash ña huañugrijunshnami tucushca. Cunguripash chujchujuj, vijsatapash nanachijuj, ñavipash, quillu quillumari tucushca.

¹¹Leonguna causana pushtupash, leongunapaj huahuacuna mapayachishca utujucunapash, taita leonbash, mama leonbash, leongunapaj huahuacuna tandanajushpa causana utujucunaca, ¿imata tucushcayari? Paicunataca, pipash na manllachi ushanllu carca.

¹²Leonga, paipaj huahuacunamambash, paipaj huarmicunamambash carangapajmi, huañuchishpa ashtaca aichata apamun carca. Paicuna causana utujucunapica, aichacunata shuhuashcacunatami jundachin carca.

¹³Tucuita Mandaj Diosca, cashnami nin: “Ricui, canda llaquichingapaca caipimi cani. Macanajuna cambaj carretacunata rupachijpimi, cushni llujshijunga. Cambaj maltun leongunataca, espadami micunshna tucuchinga. Llactamandaca, can shuhuashcatapash chingachishami. Cambaj villajcuna villashcapash, ima horapash na ashtahuan uyaringachu” ninmi.