Read Imbabura Highland Quichua HABACUC 2 Bible Online

HABACUC 2 - Imbabura Highland Quichua bible

HABACUC 2

¹Chapachun churashcapimi chapashpa shayajusha. Shinlli torre jahuapimi shinlli shayarishpa, tutapash na puñushpa, ñucaman imata nijta uyariajushalla. Ñuca rimashcata tigrachingacaman chapariajushallami.

²Mandaj Diosca, cashna nishpami ñucaman tigrachihuarca: “Muscuipishna imata ricushcatapash escribingui. Chaita maijambash leyishpaca, ucha villangapaj calpachun, rumi tablacunapi ricuchingui.

³Muscuipishna ricushcacunaca, huaquin huatacuna yalishpapash, ñapashmi tucuringa. Shina cashpapash, na llullangachu. Na ucha pactajpipash chapariajuilla, shamungapachami, na unayangachu.

⁴Ricui, nali shunguta charij runaca jariyanllami. Ashtahuangarin imatapash cashcatapacha ruraj runaca, crishcamandallami causanga.

⁵Shinallata vinota ufiaj runaca umachij, jariyashpa jatun tucuj runami. Paica, na causajungallachu. Paipaj almaca, Seol pascarinshnami carca. Paica, huañuishna na amingachu. Ashtahuangarin paipajlla cachunmi, tucui llactacunapi causaj gentecunata tandachijurca” nijurcami.

⁶¿Nachu tucui caicunataca, yarichij shimicunahuan paitaca rimanajunga? ¿Nachu ninanda asishpa, paitaca rimanajunga? Paitaca, cashnami ninajunga: “Napash paipaj cajpita ninanda mirachij runaca, ¡aij imachari tucunga! ¿Ima punllacamanda ashtahuan ashtahuan prendacunata japishpa, jahuan jahuan mundunajunalla carca?” ninajungami.

⁷Canman divijcunara, cungashcapi jatarishpaca, ¿nachu candara llaquichinman? Canda chujchuchijcuna rijcharishpaca, ¿nachu can ima charishcacunata quichushpa apanman?

⁸Ashtaca llactacuna ima charishcacunata quichushpa can apashcamandami, tucui shuj gentecunapash can ima charishcacunata quichushpa apanajunga. Gentecunata huañuchishpa yahuarta jichashcamanda, llactacunata, pueblocunata quichushcamanda, chaipi tucui causajcuna ima charishcacunata can shuhuashcamandami, chashna apanajunga.

⁹Imatapash cashcatapacha na rurashpata, paipaj huasipi ashtacatapacha charingapaj ninandapacha munaj runaca, ¡aij imachari tucunga! Paica, jatun llaquimanda pacajungapaca, paipaj huasitaca, tazinda jahuaman churanshna shinllita churangapajmi, chashna ruran.

¹⁰Pinganayaita rimashpa yarichishca shimicunatami, cambaj huasipi chasquircangui. Ashtaca gentecunatami, llaquinayaita tucuchircangui. Shina rurashpami, cambaj causaitallata llaquichingapaj, juchata rurarcangui.

¹¹Rumicunaca, muyundi pirca jahuamandami caparinajunga. Caspicunaca, maipi churashcamandami tigrachinajunga.

¹²Gentecunapaj yahuarta jichashpa pueblota shayachij runalla, nalita rurashcacunahuan pueblota callarichij runalla, ¡aij imachari tucunga!

¹³¿Nachu caica, tucuita Mandaj Diosmanda canga? Ninapi rupachunllami, gentecunaca imatapash ruranajunga. Shuj llactapi causajcunapash, yangallatami ninanda shaijunajunga.

¹⁴Imashnami mama cuchaca yacuhuan junda, chashnallatami cai pachaca Mandaj Dios punchapamba cajta rijsishca yuyaihuan junda canga.

¹⁵Shujcunaman ufiachij runalla, ¡aij imachari tucunga! Paipaj lluchullata ricungapaj machangacaman jayajta ufiachij runalla, ¡aij imachari tucungui!

¹⁶Canga, alicachi tucungapaj randica, alicachi tucushcatapash ninandami huaglichi tucushcangui. Cambash ufiayari, cambash lluchulla tucunguillami. Mandaj Diospaj ali lado maquipi charijuj vasomandami, canmambash ufiachinga. Can juyailla cajtaca, shunguta tigrachinshnami rimashpa pingaichinga.

¹⁷Líbano shuti llactapi causajcunata macashpa can shuhuashca llaquillatami, candapash japinga. Sachacunapi causanajuj animalcunata huañuchishpa tucuchishcashnallatami, llaquichi tucungui. Gentecunata huañuchishpa yahuarta jichashcamanda, paicunapaj alpata shuhuashcamanda, shinallata pueblocunamandapash, chaipi causajcuna ima charishcacunatapash shuhuashcamandami llaquichi tucungui.

¹⁸Labranata yachaj runa labrashpa rurashca diosca, ¿imapajta ali? Yacuyachishpa rurashca diospash llullanatalla yachachij cashcamandaca, ¿imapajta ali? Imamambash rijchaj, na rimaj dioscunata ruraj runaca, pai rurashcatallatami yariashpa causan.

¹⁹Caspitara: “Rijchari” nij runapash, na rimaj rumita: “Jatari” nij runapash, ¡aij imachari tucunga! ¿Chai diosca, imatapash yachachi ushangachu? Ricuichi, chai diosca orohuan, culquihuan quilpashcallami. Paipica, samaipash na tianllu.

²⁰Ashtahuangarin Mandaj Diosca, paipajlla shicanyachishca huasipimi causajun. Cai pachapi tucui causajcuna, paipaj ñaupajpica upalla caichi.