Read Imbabura Highland Quichua HABACUC 3 Bible Online

HABACUC 3 - Imbabura Highland Quichua bible

HABACUC 3

¹Profeta Habacuc shuti runagumi, Sigionot nishca tonopi candashpa, Diosta mañarca:

²Mandaj Dioslla, cambaj Shimita uyashpaca, manllarircanimi. Mandaj Dioslla, imata can rurashcataca, cunan huatacunapash cutin mushujyachipairi. Chaicunataca, cunan huatacunapash, cutin rurashpa ricuchipairi. Can fiñarishca cashpaca, llaquinata yaripairi.

³Taita Diosca, Temán shuti llactamandami shamunga. Jucha illaj Diosca, Parán shuti urcumandapachami shamunga. Selah Jahua pachataca, paipaj punchapambami quilparca. Cai pachapica, paita alicachishca shimicunami jundarca.

⁴Pai punchayachijujca, michashnami carca. Paipaj maquimandaca, punchapamba rayocunami llujshijurca. Chaipimi paipaj ushaica, pacalla tiajurca.

⁵Paipaj ñaupajpica, huañuchij ung:uimi rijurca. Paipaj chaquimandaca, nina rupajuj carbongunami llujshijurca.

⁶Paica jatarishpami, cai pachataca medirca, ricushpallami gentecunatapash chujchuchirca. Punda huatacunamanda tiaj urcucunapashmi ñuturirca. Punda huatacunamanda tiaj lomacunapash, pingai tucushpami cumurinajurca. Paipaj ñangunaca, causaita causaicamanmi.

⁷Cusán shuti llactapi tiaj carpacunaca, llaquilla cajtami ricurcani. Madián shuti llactapi tiaj carpacunapashmi chujchunajurca.

⁸Mandaj Dioslla, ¿jatun yacucunahuanllu fiñarircangui? ¿Canga, jatun yacucunahuanllu fiñarircangui? ¿Cambaj caballocunapi, cambaj mishana carretacunapi tiarishpaca, mama cuchata fiñashpachu chashna tiarircangui?

⁹Cambaj arcopash, tucuillami ricurirca. Aillucunaman juramentushcapash, pactanapacha shimicunami carca. Selah Pambacunatapash, jatun yacucunahuanmi huaicuyachircangui.

¹⁰Canda ricushpaca, urcucunapashmi manllarirca, yacupash ninanda jundashpami yalirca. Manllanayai ucu ucu yacucunapash caparishpami, jahuaman maquita alsanshna jatarirca.

¹¹Indipash, lunapash, chai pushtupimi shayarirca. Cambaj flechacuna punchayachijpi, cambaj ninan punchapamba lanza punchayachijpimi calpanajurca.

¹²Canga, ninanda fiñarishpami, cai pachataca sarurcangui. Ninandapacha fiñarishpami, shuj llactacunapi causajcunataca, trillanshna tucuchircangui.

¹³Can agllashcacunatapash, aceitehuan javi tucushca cambaj jatun mandajtapash, ayudangapajmi llujshircangui. Canda na manllaj runapaj huasica, tucuicunapaj umashna cajpipash, allashpa urmachircanguillami. Callari rumicuna ricuringacamanmi urmachircangui. Selah

¹⁴Paicunapaj soldadocunataca, paicunapaj flechacunahuanllatami, umata utujurcangui. Ninan huairahuan tamiashna, caiman chaiman cachangapajmi yaicumunajurca. Paicunaca pacalla langashna, imagutapash na charij runata llaquichishun yashpami cushijunajurca.

¹⁵Caiman chaiman cuyurijuj mama cucha yacu jahuataca, cambaj caballocunapi tiarishpami purijurcangui.

¹⁶Chaita uyashpami, vijsa ucucaman manllarircani. Rimajta uyashpaca, ñuca shimipashmi chujchurca. Ñuca tullucunapash ismujunshna tucushpami, ñuca shungupica chujchujurcani. Gentecunata llaquichingapaj, paicunapaj soldadocunahuan vichai shamujpipash, ñucaca chai ninan llaqui punllapica, casilla tiajushallami.

¹⁷Jigos yuracuna na sisajpipash, uvas yuracuna na granujpipash, olivoscuna na fucujpipash, chagracuna na fucujpipash, llamacuna pambamanda tucurijpipash, huarmi huagracuna corralcunapi illajpipash,

¹⁸tucui chashna tucujpipash ñucaca, Mandaj Dioshuanmi cushijusha. Ñucaca, ñucata quishpichij Taita Diospimi cushijuita charisha.

¹⁹Mandaj Jatun Diosca, ñucapaj shinlli torreshnami. Paimi, ñuca chaquitapash, tarugatashna ucha calpajta ruran. Jahua urcucunapipash, paimi cuidashpa pushahuan. Cuerdayu ñuca tocanacunapi tocashpa, candajcunata mandaj candachinami.