Read Imbabura Highland Quichua SOFONÍAS 2 Bible Online

SOFONÍAS 2 - Imbabura Highland Quichua bible

SOFONÍAS 2

¹Llactapi causaj na pingaj gentecunalla, tandanajushpa aliguta yarichiyari.

²Llaquichishami nishcapash nara pactajpillata, punllapash jupashna nara yalijpillata, ninanda fiñarishcapash cangunapaj jahuapi nara shamujpillata, Mandaj Dios ninanda fiñarina punllapash cangunapaj jahuapi nara shamujpillata, aliguta yarichiyari.

³Cai pachapi causanajuj ali shungu tucui runacuna, pai mandashcata pactachijcuna Mandaj Diosta mascaichiyari. Imatapash cashcatapacha ruranatapash, na jariyashpa causanatapash mascaichiyari. Shina mascajpica, Mandaj Dios fiñarishpa llaquichijui punllapica huacaichi tucunguichipashchari.

⁴Gaza shuti puebloca, jichui tucushcami canga. Ascalón shuti pueblopashmi llaquinayaita tucuchi tucunga. Asdod shuti pueblomandaca, punllami shuhuashpa apanajunga. Ecrón shuti pueblopash, sapimanda llujchinshnami llujchi tucunga.

⁵Mama cucha manñapi causanajuj cereteocunaca, ¡aij imachari tucunga! Filisteocuna causanajuj Canaán llactalla, Mandaj Diosca cangunata fiñashpami, cai shimicunata cashna nirca: “Chaipi causachunga, shujllatapash na saquishpami tucuchisha.

⁶Chaimandami, mama cucha manñapica, michina pambacuna tucunga. Llamacunapaj corralcunatami, chaipica shayachinga.

⁷Chai alpaca, Judá shuti runapaj miraimanda huaquin puchushcacunapajmi canga. Paicunami chaipica michinajunga. Ascalón shuti pueblopi tiaj huasicunapimi, tutaca puñunajunga. Paicunata Mandaj Taita Dios ricugrishpami, prezu apai tucushcacunataca cacharichinga.

⁸Moabitacuna, amonitacuna rimashpa pingaichinajujtaca uyarcanimi. Chashna rimashpami, ñuca agllashcacuna alicachi tucushcataca huaglichinajurca. Paicunaca, israelcunapaj llactata quichushpami, jariyashpa causanajurca.

⁹Shinamandami tucuita Mandaj, israelcunapaj Taita Dios ñucaca causajunipachami nini. Moabitacunaca, Sodoma shuti puebloshnami tucuringa. Amonitacunaca, Gomorra shuti puebloshnami tucuringa. Chaipica, tsinicunalla jundashca pamba, shinallata cachita llujchina pushtucunallami tucunga. Chashnami causaita causaicaman, llaquinayaita tucuchi tucunajunga. Ñuca agllashca puramanda huaquin puchushcacunami, paicuna ima charishcacunataca apanajunga. Paicunallatami alpacunatapash japinajunga” ninmi.

¹⁰Paicunallata jariyashpa jatun tucushcamanda, tucuita Mandaj Diospaj agllashcacunata rimashpa pingaichishpa jariyashcamandami, chai llaquicunaca japinga.

¹¹Mandaj Diosca, paicunahuanga manllanayaitami fiñaringa. Chaimandami, cai pachapi tiaj dioscunataca, tucuillata tucuchinga. Paitaca, tucui llactacunapi causajcunami, paicuna maipi causashcapillata cungurinajunga.

¹²“Etiopía shuti llactapi causajcuna, cangunapash ñuca espadahuanmi huañuchi tucunguichi” ninmi.

¹³Diosca, paipaj maquita jahua ladoman chutashpami, Asiria llactataca tucuchinga. Nínive shuti pueblotapash llaquinayaita tucuchishpami, jichushca pambatashna chaquichishpa saquinga.

¹⁴Chaipica, huasipi charina animalcunapaj corraltami ruranga. Chaipica, tucui sacha animalcunapashmi causanga. Pelícano nishca, erizo nishca animalcunapash, huasi pilar jahuacunapimi puñunajunga, huasi ventanacunapimi huacanajunga. Cedro caspicunahuan quilpashpa rurashcacunapash ricurijujpimi, pungucunapash llaquinayaita urmashpa tucuringa.

¹⁵Ricui, chai pueblopi causajcunami imatapash na manllashpa, cushijushpa causanajurca. Paicunapaj shungupica: “Ñucanchillami, cashna jatunguna canchi” yashpami causanajurca. ¡Chashnamari llaquinayaita tucuchi tucushca, sacha animalcuna causanallami tucushca! Shina tucushcamandami, maijambash chai ladota yalijcunaca, asishpa maquita chafsirinajunga.