Read Imbabura Highland Quichua ZACARÍAS 1 Bible Online

ZACARÍAS 1 - Imbabura Highland Quichua bible

ZACARÍAS 1

¹Persia shuti llactata jatun mandaj Darío shuti runaca, ishcai huata pusaj quillatami ña mandajurca. Chai huatapimi Mandaj Diosca, Iddo shuti runapaj churi, Berequías shuti runapaj churi, profeta Zacariasman, cai shimicunata cashna nishpa villarca:

²“Mandaj Dios ñucaca, cangunapaj ñaupa taitacunataca ninandapachami fiñarcani.

³Chaimanda paicunataca, cashna ni: Tucuita Mandaj Diosca, cashnami nin: ‘Ñucapajman tigrarimuichi’ ninmi tucuita Mandaj Diosca. Shina tigrarijpica: ‘Ñucapash, cangunapajman tigrarishami’ ninmi tucuita Mandaj Diosca ni” nishpami villarca.

⁴Cangunapaj ñaupa taitacunashnaca, na causanachu canguichi. Dios ima nishcata punda villajcunaca, paicunamanmi cashna nishpa caparishpa villanajurca: “Tucuita Mandaj Diosca, cashnami nin: ‘Cunanga, nali ñangunamanda, nalita ruranacunamanda anchurichi’ nishpami villanajurca. Shina cajpipash napacha cazushpa, ñucamanda villashcataca na uyanayachinllu carca” ninmi Mandaj Diosca.

⁵“Cangunapaj ñaupa taitacunaca, ¿maipita canga? Profeta runacunapash, ¿causaita causanajungallachu?

⁶Ashtahuangarin ñuca shimicunata, ñuca mandashcacunata, ñuca ima nishcata villaj ñucata servijcunahuan villachishca shimicunaca, ¿nachu cangunapaj ñaupa taitacunapi pactarca? Chaimandami, ñucapajman tigrarishpa cashna ninajurca: ‘Mandaj Diosca, nali ñangunapi ñucanchi imashna purishcashnallata, nalita rurashcashnallatami, llaquichinata yarijurca. Paica, ñucanchihuanga chashnallatami rurarca’ ninajurcami nishpa villai” nircami.

⁷Jatun mandaj Darioca, ishcai huata chunga shuj quillatami, ña mandajurca. Sebat shuti chai quillapaj ishcai chunga chuscu punllapimi, Iddo shuti runapaj churi, Berequías shuti runapaj churi, profeta Zacariasman, Mandaj Diosca cai shimicunata cashna nishpa villarca:

⁸Ña tutayashcapimi, cashnata ricurcani: Puca caballopi tiarishca shuj runatami ñapash ricurcani. Chai runaca, pugru pambapi tiaj mirto nishca yura chaupicunapimi carca. Paipaj huashatapash, puca caballocuna, quillushnalla caballocuna, yuraj caballocunami catinajurca.

⁹Chaita ricushpami: “¿Ñucata mandajlla, caicunaca imata capan?” nircani. Shina nijpimi, ñucahuan rimajuj angelca: “Caicuna ima cajtaca, ñucami villasha” nihuarca.

¹⁰Mirto nishca yura chaupicunapi shayajuj chai runa tigrachishpaca, cashnami nihuarca: “Cai pachata muyushpa tigrachun Mandaj Dios cachashcacunaca caicunami” nihuarcami.

¹¹Paicunami, mirto yura chaupicunapi shayajuj, Mandaj Diospaj angelman cashna ninajurca: “Ñucanchica, ñami cai pachata muyushpa shamupanchi. Ricui, tucui cai pachami casilla aliguta samajun” ninajurcami.

¹²Shina nijpimi Mandaj Diospaj angelca, cashna nishpa tigrachirca: “Tucuita Mandaj Dioslla, Jerusalenbi causajcunata, Judá llactapi tiaj pueblocunapi causajcunataca, ¿ima horascamanshi na llaquipangui? Paicunataca, ña canchis chunga huatacunatamari fiñashca cangui” nircami.

¹³Shina nijpimi Mandaj Diosca, ñucahuan parlajuj angelman juyailla shimicunahuan, cushichij shimicunahuan tigrachirca.

¹⁴Chaimandami ñucahuan parlajuj angelca, cashna nihuarca: “Caparishpa cashna ningui: Tucuita Mandaj Diosca cashnami nin: ‘Jerusalendapash, Sion urcutapash ñucapajlla cachunmi ninandapacha munarcani.

¹⁵Chaimandami samanajuj llactacunataca, ninanda fiñashca cani. Paicunaca, ashatalla ñuca fiñashca cajpipash, ashtahuanmi nalita ruranajurca’ ninmi.

¹⁶Chaimandami Mandaj Diosca, cashna nin: ‘Ñucaca llaquishpami, Jerusalenman tigrarcani. Chaipimi, ñuca huasitaca shayachinajunga. Jerusalenbimi, plomadataca churanajunga’ ninmi tucuita Mandaj Diosca.

¹⁷Caparishpa cashnatapash ningui: Tucuita Mandaj Diosca, cashnami nin: ‘Ñuca pueblocunaca, cutinmi ashtaca alicuna jicharijuj canga. Mandaj Dios ñucaca, Sion urcutaca cushichisharami, Jerusalendaca agllasharami’ ninmi ningui” nihuarcami.

¹⁸Chai jipaca vichai ricushpami, chuscu cachuta ñapash ricurcani.

¹⁹Chaita ricushpami, ñucahuan parlajuj angeltaca: “¿Chaicunaca imata capan?” nircani. Shina nijpimi chai angelca, cashna nishpa tigrachihuarca: “Chai cachucunami, Judá llactapi causajcunata, israelcunata, Jerusalenbi causajcunataca, caiman chaiman cachajurca” nircami.

²⁰Chai jipaca, chuscu carpinterocunatami Mandaj Diosca ricuchihuarca.

²¹Chaita ricushpami: “Cai runacunaca, ¿imata rurangapajta shamunajun?” nircani. Shina nijpimi chai angelca, cashna nishpa tigrachirca: “Chai cachucunami, Judá llactapi causajcunataca, caiman chaiman cachajurca. Chaimandami maijanllapash umata alsaitaca, na ushanajurca. Ashtahuangarin cai runacunaca, llactacunapi tiaj chai cachucunata chujchuchingapaj, urmachingapajmi shamunajun. Judá llactapi causajcunata caiman chaiman cachangapajmi, cachuta alsanajurca” nircami.