Read Imbabura Highland Quichua ZACARÍAS 10 Bible Online

ZACARÍAS 10 - Imbabura Highland Quichua bible

ZACARÍAS 10

¹Mandaj Diostaca, jipa tamiata cachamuna punllapi tamiata cachamuchun mañaichiyari. Mandaj Diosca, punchapambacunata shitamushpami, ashtaca tamiata cachamunga. Chaihuanmi pambapica, verdella jihuacunata tucuicunapajllata viñachinga.

²Terafín nishca dioscunaca, yangacunatami villachinajushca. Yachajcunapash, llullacunatallami ricunajushca. Paicunaca, yanga muscuicunatami villanajushca. Paicuna cushichishcapash, yangallatami. Chaimandami gentecunaca, llamacunashna yangata purinajun. Paicunaca, michijta na charishpami, llaquilla causanajun.

³“Chaimandami chai michijcunahuanga, nina japirinshna fiñarishca cani. Paicunata mandajcunataca llaquichishami. Ashtahuangarin tucuita Mandaj Diosmi, Judá llactapi causanajuj paipaj llamagucunashna gentecunataca ricugringa. Paicunataca, paipaj alicachishca caballotashnami macanajuipica churanga.

⁴Paicuna puramandami, pirca tigranapi churana rumipash, jatun estacapash, macanajuna arcopash, llaquichij tucui mandajcunapash llujshinga.

⁵Paicunaca, jatun macanajuipi cashpa, turulla ñambi paicunata fiñajcunata saruj, ninan shinlli soldadocunashnami canga. Mandaj Dios paicunahuan cajpimi, chashna macanajunajunga. Caballocunapi tiarijcunaca, pingaichi tucunajungami.

⁶Judá shuti runapaj miraicunataca, ñucami shinllichisha, Josepaj miraicunatapash, ñucami huacaichisha. Shinami, paicunataca tigrachimusha. Paicunataca ninandami llaquisha. Shinamandami paicunaca, na shitai tucushcashna canga. Ñucami, paicunata Mandaj Dios cani. Shina cashcamandami, paicuna mañashcataca uyasha.

⁷Efraín ailluca, ninan shinlli runashnami canga. Paicunaca, vinota ufiashpa cushijunshnami, tucui shungu cushijunajunga. Chaita ricushpaca, paicunapaj churicunapashmi cushijunajunga. Paicunaca, Mandaj Diosmandami tucui shunguhuan cushijunajunga.

⁸Paicunata ñuca quishpichishcamandami, silbashpa cayashpa tandachisha. Paicunaca, punda imashna cashcashnallatami, ashtaca miranajunga.

⁹Alipajmi paicunataca shuj gentecunapajman caita chaita cacharcani. Paicunaca, caru llactacunapi causanajushpapashmi, ñucataca yarinajunga. Paicunapaj huahuacunandi causanajushpami, caiman cutin tigramunajunga.

¹⁰Paicunataca, ñucami Egipto llactamanda pushamusha, Asiria llactamandapashmi tandachimusha. Paicunataca, Galaad shuti, Líbano shuti llactacunamanmi pushamusha. Chai llactacunaca, paicunapaca na pactangachu.

¹¹Jatun llaquica, mama cuchatami yalinga. Caiman chaiman cuyurijuj yacupash, chai jatun mama cuchapillatami chinganga. Jatun yacucunapash, tucuillami chaquinga. Asiria llactapi causajcuna jariyanapash urmangami. Egipto llactapi causajcunata mandana varapash chingangami.

¹²Mandaj Dios ñucami, paicunataca ñuca shutipi shinllichisha. Shinamandami, ñuca shutipi mañashpa purinajunga” ninmi Mandaj Diosca.