Read Imbabura Highland Quichua ZACARÍAS 11 Bible Online

ZACARÍAS 11 - Imbabura Highland Quichua bible

ZACARÍAS 11

¹Líbano shuti urculla, cambaj cedro quirucunata ninahuan rupachishpa tucuchingapaj, cambaj pungucunata pascayari.

²Ciprés quirulla, ninanda caparishpa huacayari. Cedro quiruca, ñami urmashca. Shuj juyailla alipacha quirucunapashmi, urmachi tucushca. Basán shuti llactapi encina nishca quirucunapash, caparishpa huacaichiyari. Quirucuna junda bosquemi, urmachi tucushca.

³Juyaillapacha jihua pambacuna llaquinayaita tucuchi tucushcamandami, michijcunapash ninanda caparishpa huacanajuj uyarin. Leongunapaj huahua leongunapash, Jordán juyailla jatun yacu chaquishcamandami, ninanda huacashpa caparinajuj uyarin.

⁴Ñucata Mandaj Taita Diosca, cashnami nihuarca: “Huañuchi tucuna llamacunata michi.

⁵Chai llamacunataca, paicunata randijcunallata huañuchishpapash, ima nalitapash na rurashcashnallatami purinajurca. Paicunata jatuj runapash, cashnami nijun: ‘Mandaj Diosca alimari cangui ni tucushca cachun. Ñami ashtacata charijyashcani’ nijunmi. Paicunata michijcunapash, napacha llaquinajunllu.

⁶Chaimandami cai llactapi causajcunataca, ñucapash na ashtahuan llaquichisha. Ricuichi, ñucallatami paicunataca, paicunapaj cumbacunapaj maquipi, jatun mandajpaj maquipi tucuicunata churasha. Paicunami cai llactataca, llaquinayaita tucuchinajunga. Paicunapaj maquimandaca, napacha cacharichishachu” nihuarcami.

⁷Chaimandami, huañuchi tucuna llamagushna, huajcha gentecunataca michijurcani. Chai llamacunata michingapaca, ishcai tauna caspitami japircani. Chai caspicunataca, shujtaca: “Juyai” nishca shutitami shutichircani. Caishujtaca: “Huatanacuna” nishca shutitami shutichircani. Shinami, chai llamacunataca michijurcani.

⁸Shinallata shuj quillapillami, quimsa michijcunata tucuchircani. Ñuca shungupica, paicunahuan na ashtahuan ali caita ushashpami, ninanda fiñarircani. Paicunapaj shungupipashmi, ñucataca na ashtahuan ricunayachihuarca.

⁹Chaimandami cashna nircani: “Na ashtahuan michishachu. Maijambash huañushpaca, huañungatachari. Maijambash chingashpaca, chingangatachari. Huaquin puchucunaca, tucuicunallata paipura micuringatachari” nircanimi.

¹⁰Shina nishca jipami, “Juyai” shuti ñuca tauna caspita japishpa faquircani. Tucui llactacunapi causajcunahuan ñuca ari ninajushcata faquishcata ricuchingapajmi, chashna rurarcani.

¹¹Chai punllami, ari ninajushcata pactachinaca tucurirca. Chashnami, ñucata ricurianajuj huajcha llamacunaca, Mandaj Diospaj Shimita villajushcata yacharca.

¹²Chaipimi cashna nircani: “Cangunapi ali cajpica, ñuca imatalla rurashcamanda cuhuaichilla, na cashpaca saquipaichilla” nircanimi. Shina nijpimi, paicunaca quimsa chunga culquita pezashpa, ñuca imatalla rurashcamanda cuhuarca.

¹³Chaimandami Mandaj Diosca, cashna nihuarca: “Chai culquitaca, culquita alichinapi alichilla. ¡Chashna ninan valishca culquipajmi, ñucataca jatunajurca!” nihuarcami. Shina nijpimi, chai quimsa chunga culquita japishpaca, Mandaj Diospaj huasipi culquita alichinapi alichircani.

¹⁴Chai jipami, “Huatanacuna” shuti caishuj tauna caspitapash faquircani. Israelcunahuan, Judá llactapi causajcunahuan, huauquipura aliguta causanajushcata faquinshna shicanyachingapajmi, chashna rurarcani.

¹⁵Mandaj Diosca, cashnami nihuarca: “Cunanga, juizu illaj michij runa michingapaj ima charishcacunataca japinguilla.

¹⁶Ricui, cai llactapimi, nali michijta churagrini. Chai michijca, chingashcacunatapash na ricugringachu, uchilla llamacunatapash na mascagringachu. Chaqui faquirishcatapash na jambingachu, shaijushcacunatapash na rigra jahuapi churashpa apangachu. Ashtahuangarin vira llama aichataca, pairami micunga, sillucunatapashmi faquinga.

¹⁷Llamacunata na michi ushashpa saquij michij runalla, ¡aij imachari tucunga! Paipaj rigratapash, ali lado ñavitapash, espada chugrichishpami ali canman. Paipaj rigrapash, tucuillami chaquinga. Ali lado ñavipash, ñausapachami quedanga” nihuarcami.