Read Imbabura Highland Quichua ZACARÍAS 12 Bible Online

ZACARÍAS 12 - Imbabura Highland Quichua bible

ZACARÍAS 12

¹Mandaj Dios villashca cai shimicunaca, israelcuna imalla tucunatami villajun. Jahua pachatapash, cai pachatapash ruraj, runacunamambash espirituta cuj Mandaj Diosca, cashnami nijurca:

²“Ricui, ñucami Jerusalenbi causajcunataca, copatashna churasha. Paicunami, Judá llacta muyundipi causanajuj, paicunata fiñaj tucui gentecunataca chujchuchinga. Jerusalenda fiñashpa chaupipi churai punllami, chashna canga.

³Chai punllapica, Jerusalendaca ladolla llactacunapi causaj tucui gentecunapaj llasha rumishna cachunmi rurasha. Chai rumita aparijcunaca, tucuillami ñutui tucunga. Cai pachapi tiaj tucui llactacunamandami, paita llaquichingapaj tandanajunga.

⁴Chai punllapica, tucui caballocunatami ninanda manllachishpa chugrichisha. Caballocunapi tiarij soldadocunatapash lococunatashnami rurasha. Ashtahuangarin Judá llactapi causajcunataca, ñucami aliguta ricuriasha. Shuj llactacunapi tiaj tucui caballocunatapash ñausayachishpami llaquichisha.

⁵Chaita ricushpami, Judá llacta soldadocunata mandajcunaca, paicunapaj shungupica cashna yarinajunga: ‘Jerusalenbi causajcunaca, tucuita Mandaj paicunapaj Taita Diosmandami ushaita charin’ yashpami causanajunga.

⁶Chai punllapica, Judá llacta soldadocunata mandajcunataca, ninayashca carbonda churana jirrutashnami, yamda jahuapi churasha. Nina michun japichishcata, parvacunapi churanshnami churasha. Chaimandami, paicunapaj muyundi llactacunapi causajcunataca, ali ladomambash, lluqui ladomambash tucuchinajunga. Ashtahuangarin Jerusalenbi causajcunaca, paicuna causashca pushtupillatami, Jerusalenbi cutin causanajunga.

⁷Davidpaj juyailla huasi ucu purapash, Jerusalenbi causajcunapash, Judá shuti runapaj miraicunata yalishpa ama jatun tucunajuchunmi Mandaj Diosca, Judá llacta carpacunapi causajcunatara, punda quishpichinga.

⁸Chai punllapica, Jerusalenbi causajcunamandaca, Mandaj Diosmi shayaringa. Paicuna purapi ushaita maijan na charishpapash, chai huatacunapica jatun mandaj Davidshnami shinllipacha canga. Davidpaj huasi ucu puracunaca, paicunapaj ñaupajpica, Taita Diosmambash, Mandaj Diospaj angelmambash rijchajmi canga.

⁹Chai punllapica, Jerusalenda llaquichingapaj shamuj llactacunataca, tucuillatami tucuchingapaj yarisha.

¹⁰Chaipimi, Davidpaj huasi ucu puramambash, Jerusalenbi causajcunamambash juyaita charij, ñucata mañana yuyaita charij Espirituta talinshna cachamusha. Chaipimi paicunaca, yalijta tujsishpa ñucata chugrichishcata ricunajunga. Shinamandami ninandapacha llaquirishpa, shujlla churi huañushcamandashna huacanajunga. Paicunaca, punda churimanda ninanda llaquirinshnami llaquirinajunga.

¹¹Chai punllapica, Meguido shuti pambapi Hadad-rimón shuti diosmanda llaquirishpa huacashcashnami, Jerusalenbica jatun huacai tianga.

¹²Cai llactapi causajcunaca, ailluca aillu purami, shican shican tandanajushpa huacanajunga. Davidpaj huasi ucupura miraicunaca, pai puralla, paicunapaj huarmicunapash pai purallami huacanajunga. Natán runapaj huasi ucupura miraicunapash pai puralla, paicunapaj huarmicunapash pai purallami huacanajunga.

¹³Levipaj huasi ucupura miraicunapash pai puralla, paicunapaj huarmicunapash pai purallami huacanajunga. Simei shuti runapaj miraicunapash, pai puralla, paicunapaj huarmicunapash pai purallami huacanajunga.

¹⁴Tucuilla caishuj miraicunapash pai puralla, paicunapaj huarmicunapash pai purallami huacanajunga.