Read Imbabura Highland Quichua ZACARÍAS 2 Bible Online

ZACARÍAS 2 - Imbabura Highland Quichua bible

ZACARÍAS 2

¹Chai jipami, vichai ricurcani. Chaipica, medina cordelta maquipi charijuj shuj runatami, ñapash ricurcani.

²Chai runatami: “¿Maimanda rijungui?” nishpa tapurcani. Shina tapujpimi paica, cashna nishpa tigrachihuarca: “Ñucaca, mashna ancho cajta, mashna jatun cajta, Jerusalenda medishpa ricungapajmi rijuni” nihuarcami.

³Ñucahuan parlajuj ángel ñapash llujshijpimi, shuj angelpash paita tuparingapaj llujshimurca.

⁴Tuparingapaj llujshijuj angelca, chaishuj angeltaca cashnami nirca: “Calpashpa rishpa, chairalla viñai chai runaman cashna nigri: ‘Ashtaca gentecuna, ashtaca animalcuna tiashcamandami, Jerusalenbica muyundi jatun pircata na rurashpa causanajunga.

⁵Jerusalendaca, ñucami nina rupajuj muyundi jatun pircashna jarcasha. Ñucaca, punchapamba cajta ricuchingapajmi, paicunapaj chaupipi casha’ nigri” nircami.

⁶Mandaj Diosca, cashnami nin: “Uyaichi, uyaichi, jahua lado llactamandaca llujshishpa calpaichilla. Ñucami, cai pacha chuscundi ladocunaman, caita chaita cacharcani” ninmi Mandaj Diosca.

⁷“Babilonia llactapi causaj Sion pueblolla, pacalla llujshilla” ninmi.

⁸Tucuita Mandaj Diosca, cashnami nin: “Ñucata ninanda alicachishca jipami, canguna ima charishcacunata quichujcunapaj llactacunaman paica cachahuanga. Maijambash cangunata llaquichishpaca, ñuca ricujuj ñavita tujsinshnami llaquichin.

⁹Chaimandami ñuca maquita alsashpa, paicunataca ñapash llaquichigrini. Paicuna ima charishcacunataca, paicunata servijcunallatami quichushpa apanajunga. Shina rurajpimi, tucuita Mandaj Diosllata ñucata cachamushcata yachanguichi” ninmi.

¹⁰Mandaj Diosca, cashnatapashmi nin: “Sionbi causajcunalla, cushijushpa candaichiyari. Ricuichi ñucaca, cangunapajman shamushpami, cangunapaj chaupipi causasha.

¹¹Chai punllapica, ashtaca llactacunamandami Mandaj Dios ñucapajman tandanajumunga. Paicunaca, ñuca agllashcacunami canga, ñucapash paicunapaj chaupimi causasha” ninmi. Chaita ricushpami, tucuita Mandaj Diosllata, cangunapajman ñucata cachamushcata yachanguichi.

¹²Mandaj Diosca, jucha illaj llactapimi, Judá llactataca paipajlla cachun japinga. Jerusalendapash agllangarami.

¹³Cai pachapi tucui causajcuna, Mandaj Diospaj ñaupajpica, upalla caichi. Paica, pai causana jucha illaj pushtumandami jatarishca.