Read Imbabura Highland Quichua ZACARÍAS 3 Bible Online

ZACARÍAS 3 - Imbabura Highland Quichua bible

ZACARÍAS 3

¹Curacunata mandaj Josuetami ricuchihuarca. Paica, Mandaj Diospaj angelpaj ñaupajpimi shayajurca. Josuepaj ali ladopica, Satanasmi paita juchachingapaj shayajurca.

²Mandaj Diosca, Satanastaca cashnami nirca: “Satanaslla, candaca Mandaj Diosllata jarcashpa rimachun. Candaca, Jerusalenda agllaj Mandaj Diosllata jarcashpa rimachun. ¿Nachu caica, rupajuj ninamanda llujchishca yamda caspishna?” nircami.

³Josueca, imapash na valij churajunata churajushcami, angelpaj ñaupajpi shayajurca.

⁴Chaita ricushpami chai angelca, paipaj ñaupajpi shayanajujcunataca: “Chai imapash na valij churajunata llujchichigrichi” nishpa mandarca. Chai jipami, Josuetaca cashna nirca: “Ricui, cambaj juchata anchuchishpami, ninan juyailla churajunata churachini” nircami.

⁵Chai jipaca: “Umapi churachina mitra nishca mapa illaj churajunata Josuepaj umapi churachigrichi” nishpami mandarca. Shina nijpimi paicunaca, mitra nishca mapa illaj chai churajunata umapi churachishpa, churajunatapash churachinajurca. Mandaj Diospaj angelca shayajurcallami.

⁶Chai jipami, Mandaj Diospaj angelca, Josuetaca shinlli tacurishpa cashna nirca:

⁷“Tucuita Mandaj Diosca, cashnami nin: ‘Ñuca yachachishcacunata, mandashcacunata punllandi aliguta pactachishpaca, ñuca huasipica cambashmi mandangui. Shinallata ñuca huasi patiocunatapashmi cuidangui. Caipi shayajuj puramandaca, canmambashmi shuj ruranata cusha.

⁸Curacunata mandaj Josué, cunanga cambash, cambaj ñaupajpi tiarij cumbagucunapash, ali uyaichi. Cangunaca, ima shamunata ricuchijcunami canguichi. Ricui, Retoño nishca ñucata servijtami apamuni.

⁹Ricuichi, Josuepaj ñaupajpimi shujlla rumita churarcani. Chai shujlla rumipillami, canchis ñavicuna tiajun. Ricui, ñucami pai imashna cajtaca labrashpa churasha. Shinallata cai llactapi causajcunapaj juchatapash, shuj punllapillami anchuchisha. Tucuita Mandaj Dios ñucami, chashna nini.

¹⁰Chai punllapica cangunaca, cangunapaj cumbacunata cayashpami, cangunapaj uvas yura ucucunapi, cangunapaj jigos yura ucucunapi tiaringuichi’ ninmi tucuita Mandaj Diosca” nircami.