Read Imbabura Highland Quichua ZACARÍAS 4 Bible Online

ZACARÍAS 4 - Imbabura Highland Quichua bible

ZACARÍAS 4

¹Ñucahuan parlajuj ángel cutin tigramushpami, shuj runa puñujujpi rijchachinshna rijchachihuarca.

²Chai angelca: “¿Imatata ricujungui?” nishpami tapuhuarca. Shina tapujpimi, cashna nishpa tigrachircani: “Ricui, orotalla rurashca candelerotami ricujuni. Chai candelero jahuapica, aceiteta churanatapashmi ricujuni. Chai jahuapica, canchis lamparacuna tianajujtapashmi ricujuni. Chai jahuapi tiajuj lamparacunapaj canchis tubocunatapashmi ricujuni.

³Candeleropaj ladopica, ishcai olivos yuracunatami ricujuni. Shujca, aceiteta churana ali ladoman, caishujca lluqui ladomanmi shayajun” nircanimi.

⁴Chai jipaca, ñucahuan parlajuj angeltaca: “Ñucata mandajlla, ¿caica imata capan?” nishpami tapurcani.

⁵Shina tapujpimi, ñucahuan parlajuj angelca: “¿Nachu ima cajta yachangui?” nishpa tigrachihuarca. Shina nijpimi: “Ñucata mandajlla, na yachapanichu” nircani.

⁶Shina nijpimi, cashna nishpa tigrachirca: “Mandaj Diosca, Zorobabel shuti runamanmi cai shimicunata cashna nin: ‘Soldadocunahuan, ninan ushaihuanga na mishanguichu, ashtahuangarin ñuca Espirituhuanllami mishangui’ ninmi tucuita Mandaj Diosca.

⁷‘Jatun urculla, Zorobabel runapaj ñaupajpica, ¿pita cangui? Canga, pugru pambami tucungui. Paimi, ucuman tiajuj callari rumitaca llujchinga. Shina llujchijujpica: Juyaillagumari, juyaillagumari nishpami caparinajunga’ ninmi” nircami.

⁸Mandaj Diosca, cai shimicunatami cashna nishpa villahuarca:

⁹“Diospaj cai huasita rurai callaringapaca, Zorobabel shuti runami, paipaj maquihuambacha ucuman callari rumita churanga. Cai huasitaca, paipaj maquihuanllatami rurashpa tucuchinga” nishpami villahuarca. Shina rurashcacunata ricushpami, tucuita Mandaj Diosllata cangunapajman ñucata cachamushcata yachanguichi.

¹⁰“Cai huasita rurai callarijui punllata yangapi churajcunami, tucuchishcata ricushpa cushijunajunga. Plomadatapash, Zorobabel shuti runa charijujtami ricunajunga. Chai canchis lamparacunaca, Mandaj Diospaj ñavihuan tucui cai pachata ricujujtami ricuchijun” nihuarcami.

¹¹Cashnatapashmi ashtahuan tapurcani: “Candeleropaj ali ladomambash, lluqui ladomambash shayanajuj chai ishcai olivos yuracunaca, ¿imatata ricuchijupan?” nircanimi.

¹²Cutin cashnatapash nircanirami: “Ishcai olivos yurapaj, ishcai oro tubo chaupicunatami, oroshnalla aceite yalijun. Chaica, ¿imatata ricuchijupan?” nishpami tapurcani.

¹³Shina nijpimi chai angelca: “¿Nachu ima cajta yachangui?” nishpa tigrachihuarca. Shina nijpimi: “Ñucata mandajlla, na yachapanichu” nircani.

¹⁴Shina nijpimi chai angelca, cashna nihuarca: “Caicunaca, aceiteta talishpa javi tucushca ishcai runacuna, tucui cai pachata mandaj Jatun Diospaj ñaupajpi shayanajujtami ricuchijun” nihuarcami.