Read Imbabura Highland Quichua ZACARÍAS 6 Bible Online

ZACARÍAS 6 - Imbabura Highland Quichua bible

ZACARÍAS 6

¹Cutinllata vichai ricushpaca, ishcai urcu chaupimanda chuscu carretacuna ñapash llujshimujtami ricurcani. Chai urcucunaca, bronce urcucunami carca.

²Punda carretataca, puca caballocunami aisanajurca. Jipa carretataca, yana caballocunami aisanajurca.

³Ishcaipaj jipa carretataca, yuraj caballocunami aisanajurca. Quimsapaj jipa carretataca, ninan shinlli, pintado caballocunami aisanajurca.

⁴Chaita ricushpami, ñucahuan parlajuj angeltaca: “Ñucata mandajlla, ¿caica imata capan?” nishpa tapurcani.

⁵Shina tapujpimi chai angelca, cashna nishpa tigrachihuarca: “Cai pachata mandaj Jatun Diospaj ñaupajpi ricurishca jipa llujshimuj, jahua pacha chuscundi ladomanda huairami” nircami.

⁶Yana caballocunaca, jahua lado llactamanmi carretata aisashpa llujshinajurca. Yuraj caballocunaca, chai carretata catishpami llujshinajurca. Pintado caballocunaca, urai lado llactamanmi llujshinajurca.

⁷Puca caballocuna llujshishpaca, cai pachata muyugringapajmi ninanda munanajurca. Chaimandami paicunataca: “Cai pachata muyugrichi” nijpi paicunaca, cai pachata muyugrirca.

⁸Chai jipami, ñucata cayashpa cashna nihuarca: “Ricui, jahua lado llactaman rijcunaca, ñuca Espirituta chaipi samachishpami shamunajurca” nihuarcami.

⁹Mandaj Diosca, cai shimicunatami cashna nishpa villahuarca:

¹⁰“Prezu apai tucushca puramanda Heldai, Tobías, Jedaías shuti runacunata pushashpa ringui. Paicunami, Babilonia llactamanda tigramurca. Shina rishpaca, Sofonías shuti runapaj churi Josías shuti runapaj huasiman chai punllallata ringui.

¹¹Chaiman chayashpaca culquita, orota japishpa, coronacunata rurangui. Chaitaca, Josadac shuti runapaj churi, curacunata mandaj Josueman churachingui.

¹²Chai jipaca, cashna ningui: Tucuita Mandaj Diosca, cashnami nin: ‘Ricui, Retoño shuti runaca, ñallami shamunga. Paica, paipaj sapimandallata viñashpami, Mandaj Diospaj huasitapash shayachinga.

¹³Paimi, Mandaj Diospaj huasitaca shayachinga. Paica, ninanda alicachi tucushcami canga. Paica, pai mandangapaj tiarinapi tiarishpami, tucuicunata mandajunga. Paipaj ladopica, shuj curami shayajunga. Paicunaca, aliguta casilla causangapajmi ishcandillata aliguta yarishpa parlanajunga.

¹⁴Chaishuj coronacunataca Helem, Tobías, Jedaías shuti runacunapash, shinallata Sofoniaspaj churi Hen shuti runapash yarinajuchunmi, Mandaj Diospaj huasipi churarcangui’ ninmi ningui” nishpami villahuarca.

¹⁵Shinallata carucunapi causajcunapash shamushpami, Mandaj Diospaj huasita shayachishpa ayudanajunga. Chaita ricushpami, Mandaj Diosllata cangunapajman ñucata cachamushcata yachanguichi. Cangunata Mandaj Taita Dios rimashca shimita uyashpa cazujpimi, chashna tucunga.