Read Imbabura Highland Quichua ZACARÍAS 7 Bible Online

ZACARÍAS 7 - Imbabura Highland Quichua bible

ZACARÍAS 7

¹Chuscu huata, iscun quillata jatun mandaj Darío ña mandajujpimi, cashna tucurca: Quisleu shuti quillapaj chuscu punllapimi Mandaj Diosca, cai shimicunata Zacariasman villarca.

²Chai punllacunami, Bet-el shuti pueblopi causajcunaca, Sarezer shuti runatapash, Regem-melec shuti runatapash, paicunapaj runacunandi, Mandaj Diosta mañachun cachashca carca.

³Shinallata tucuita Mandaj Diospaj huasipi causaj curacunata, profetacunata cashna nishpa tapuchumbashmi cachashca carca: “¿Picha quilla chayajpica, huacanachu canchi? ¿Punda huatacuna rurashcashnallata, na micushpa catinachu canchi?” nichunmi cachashca carca.

⁴Chaimandami tucuita Mandaj Diosca, cai shimicunata cashna nishpa villahuarca:

⁵“Cai llactapi tucui causajcunata, curacunataca cashna ningui: ‘Cangunaca, cai canchis chunga huatapaj picha quilla, canchis quilla chayajpi na micushpa mañashpa huacashpaca, ¿ñucata yarishpachu chashna na micushpa mañarcanguichi?

⁶Micushpapash, ufiashpapash, ¿nachu cangunapajllata micunguichi, ufianguichi?’ ningui” nihuarcami.

⁷¿Nachu cai shimicunataca, Jerusalenbi causajcunapash, chai pueblo muyundi pueblocunapi causajcunapash, Neguev shuti, Sefela shuti pambacunapi causajcunapash, aliguta causanajujpillata Mandaj Diosca, pai ima nishcata punda villajcunahuan villachirca?

⁸Mandaj Diosca cai shimicunatami, Zacariasman cashna nishpa villarca:

⁹“Tucuita Mandaj Diosca, cashnami nin: ‘Ima llaquita alichinapipash, chashna cashcatapacha ricushpami alichina canguichi. Tucuicunallata cangunapaj huauquicunataca juyashpa, llaquishpa causaichi.

¹⁰Sapalla mamagutapash, taita mama illaj huahuagutapash, caru llactamanda shamushca runatapash, imaguta na charijtapash na llaquichishpa charinachu canguichi. Cangunapaj huauquicunatallataca, ucu shungupillapash na fiñanachu canguichi’ ninmi” nishpami villarca.

¹¹Shina nijpipash na uyanayachishpami, ashtahuangarin huashaman tigrarishpa, ama uyangapaj rinrita llapirinajurca.

¹²Paicunapaj shunguca, diamante nishca rumishna tucushpami, tucuita Mandaj Dios, paipaj Espirituhuan punda villajcunaman mandashcatapash, pai ima nishcatapash, na uyanajurca. Chaimandami tucuita Mandaj Diosca, paicunataca ninandapacha fiñarca.

¹³Chaimandami tucuita Mandaj Diosca, cashna nin: “Paicunahuanga cashnami tucurca: Caparishpa ñuca cayajpipash, paicunaca na uyarcachu. Chashnallatami, paicuna caparishpa mañanajujpipash, na uyarcani.

¹⁴Ashtahuangarin paicunataca, na rijsishca tucui llactacunamanmi, jatun acapanahuanshna llujchishpa, caiman chaiman cacharcani. Paicuna rishca jipami, paicunapaj llactaca, llaquinayaita tucuchi tucurca. Chai llactamanga, pipash na rircachu, pipash na tigrarcachu. Paicuna munashca llactataca, jichushca pambatami saquinajurca” ninmi.