Read Imbabura Highland Quichua MALAQUÍAS 2 Bible Online

MALAQUÍAS 2 - Imbabura Highland Quichua bible

MALAQUÍAS 2

¹Curacunalla, cunanga cai mandashcacunaca cangunapajmi.

²Tucuita Mandaj Diosca, cashnami nin: “Ñuca mandashcata na uyashpa, tucui shunguhuan ñuca shutita alicachina yuyaita na japijpica, ninan llaquitami cachamusha. Canguna bendiciai tucushcataca, ninan llaquimanmi tigrachisha. Tucui shunguhuan ñucata cazuna yuyaita na japishcamandaca, cangunataca ñami ninan llaquipi churarcani.

³Ricuichi, ñucaca canguna tarpushca chagracunatapashmi chingachisha. Ñucaman carashpa huañuchishca animalcunapaj huanucunatapash, cangunapaj ñavipimi shitasha. Cangunataca, chai animalcunapaj huanucunandimi tandachishpa shitasha.

⁴Chashna rurajpimi Leví shuti runapaj miraicunahuan, ñucahuan ari nishca cachun, ñucallata cai mandashcata cushcata yachanguichi. Tucuita Mandaj Dios ñucami, chashna nini.

⁵Causaitapash, casilla ali causaitapash carangapajmi, ñucaca paicunahuan ari nijurcani. Chaicunataca, ñucata manllashpa causachunmi curcani. Chaimandami paicunaca, ñuca ñaupajpipash ñuca shutipaj ñaupajpipash manllashpa, na jariyashpa causanajurca.

⁶Levitacunaca ñuca na llullashpa mandashcatami yachachinajurca. Paicunapica, ima nali shimicunata rimashcallapash na ricurircachu. Ñucahuan na fiñanajushpa, imatapash cashcatapacha rurashpami causanajurca. Nalita rurashpa causanajujtapash, taucacunatami saquichinajurca.

⁷Curapaj shimihuanga, ali yachaitami yachachinga. Pai villajpimi gentecunaca, mandashcata yachangapaj munanajunga. Paica, tucuita Mandaj Diosmanda villaj runami.

⁸Ashtahuangarin cangunaca, ali ñanmandami anchurircanguichi. Ñuca mandashcata panda yachachishpami, nitijachinshna taucacunata pandachircanguichi. Chashna rurashpami, levitacunahuan ari ninajushcataca huaglichircanguichi. Tucuita Mandaj Dios ñucami, chashna nini.

⁹Imashnami cangunapash ñuca yachachishcata na cazushpa, ñuca mandashcatapash ñavita ricushpalla yachachircanguichi, chashnallatami cangunatapash, tucuicuna nalicachishca, yangapi churai tucushca causachun churarcani” ninmi.

¹⁰¿Nachu tucuicunallata, shujlla taitata charinchi? ¿Nachu chai Taita Diosllata rurashcacuna canchi? Shina cashpaca, ¿imashpata ñucanchi ñaupa taitacunahuan ari ninajushcataca yangapi churashpa, caishuj chaishuj na cazurinajunchi?

¹¹Judá llactapipash, Israel llactapipash, Jerusalenbipash, yachashpata na cazushpami, millanayaicunata ruranajurca. Judá llactapi causajcunaca, Mandaj Dios juyashca huasigutapash yangapi churashpami, na rijsishca diosta mañaj huarmicunahuan cazaranajurca.

¹²Mandaj Diosca chashnata ruraj runataca, cuidaj runatapash, tapushcata tigrachij runatapash, tucuita Mandaj Diosman imatalla cujtapashmi, Jacobopaj carpacunamanda anchuchinga.

¹³Cutinllatami Mandaj Diospaj altartaca, ninanda caparishpa huacashca viquihuan jundachinguichi. Ñucaca, canguna ñucaman imatalla caranacunata carashcataca, ricuitallapash na ricushachu. Cangunapaj maquimandaca, chasquitallapash na cushijushpa chasquishachu.

¹⁴Ashtahuangarin cangunaca: “¿Imashpata na chasquin?” ninajunguichimi. Canllatami, chairalla viñai cashpa cazarashca cambaj huarmita jichurcangui. Chaitaca, Mandaj Diosca ricujurcami. Chai huarmica, canhuan cazarashca, canhuan ari nishcami carca.

¹⁵¿Nachu Taita Diosca, Espíritu junda cashpa, cangunataca shujllatashna rurarca? ¿Imapajshi chashna rurarca? Paica, cangunapaj miraicunapash, paipajlla cachun munashpami, chashna rurarca. Shina cashcamanda cangunapaj yuyaita cuidarichi, pactarallapash chairalla viñai cashpa cazarashca cangunapaj huarmitara jichunguichiman.

¹⁶Israelcunata Mandaj Taita Diosca, cashnami nin: “Quiquin huarmita jichuj runataca fiñanimi. Chai nalita rurashcahuan paipaj churajunata quilpanshna causajtami fiñani. Cangunapaj yuyaita cuidarichi, pactarallapash cangunapaj huarmitara jichunguichiman” nishpami, tucuita Mandaj Diosca villajun.

¹⁷Cangunaca rimarinajushpallatami, Mandaj Diostaca shaijuchircanguichi. Chaimandaca cangunami: “¿Imapita paitaca shaijuchishcanchi?” ninguichi. “Maijan cashpapash nalita rurashpami, Mandaj Diostaca cushichinchi, paicunahuanmi paipash cushijun, na cashpaca imatapash cashcatapacha ruraj Taita Diosca ¿maipita?” nishpami shaijuchinguichi.