Read Imbabura Highland Quichua MALAQUÍAS 3 Bible Online

MALAQUÍAS 3 - Imbabura Highland Quichua bible

MALAQUÍAS 3

¹“Uyaichi, ñucaca ñuca villajtami cachamusha. Paimi, ñuca purina ñandaca ñaupashpa alichinga. Canguna mascajushca Amoca, ñapashmi paipaj huasiman shamunga. Ari ninajushcata pactachij canguna shuyanajushca angelpashmi shamunga. Ricuichi, ñami shamujun” ninmi tucuita Mandaj Diosca.

²Pai shamui punllapica, ¿pita llaquicunata apai ushanga? Pai ricurijpica, ¿pita shinlli shayari ushanga? Paica, yacuyachishpa mapacunata anchuchij ninashnami, tajshajcunapaj jabonshnapashmi.

³Paica, culquita mapa illajta punchallata rurangapajshnami tiaringa. Leví shuti runapaj miraicunapaj juchacunataca orota, culquita ninapi rupachishpa, mapata anchuchinshnami anchuchinga. Shina rurajpimi, Mandaj Diosman imatalla caranacunataca, imatapash cashcatapacha rurashpa apamunajunga.

⁴Judá llactapi, Jerusalenbi causajcuna, Mandaj Diosman imatalla cushcataca, punda punllacunapi, ñaupa huatacunapi cushijushpa chasquishcashnallatami chasquinga.

⁵Tucuita Mandaj Diosca, cashnami nin: “Cangunata llaquichingapajmi shamusha. Chaipica yumbucunata, cazarashca jahua shujcunahuan causajcunata, llullashpa juramentujcunata llaquichingapajmi, cungashcapi shamusha. Shinallata shujpi shujpi trabajaj runaguta llaquichijcunata, sapalla mamaguta, taita mama illaj huahuaguta llaquichijcunata, caru llactamanda shamujcunata imatapash cashcatapacha na rurajcunatapash, ñucata na manllashpa chashna rurashcamandami, llaquichij shamusha.

⁶Mandaj Dios ñucaca, napacha shuj tucunichu. Chaimandami Jacobopaj mirai cangunaca, na tucuchi tucurcanguichi.

⁷Cangunapaj punda taitacunamandapacha callarishpami, ñuca mandashcacunata na cazushpa anchurircanguichi. Ñucapajman tigrarimujpica, ñucapash cangunapajman tigrashami. Tucuita Mandaj Dios ñuca chashna nijpipash, cangunaca: ‘¿Imashpata cambajman tigrashun?’ nircanguichimi.

⁸¿Runaca, Taita Diospajta shuhuai ushanllu? Cangunami, ñucapaj cashcata shuhuarcanguichi. Shina shuhuashpapash: ‘¿Imatata shuhuarcanchi?’ ninguichimi. Cangunaca, chungamanda shujguta cunatapash, ñucaman imata cunatallatapash, na cushpami shuhuarcanguichi.

⁹Cai llactapi tucui causajcunalla, cangunaca ñucaman cunata shuhuashcamandami, ninandapacha nalicachi tucushcacuna canguichi.

¹⁰Chungamanda shujguta ñucaman tucuilla cunataca, granota alichina ñuca huasiman apamuichi. Shina apamujpimi, ñuca huasipica micuna tianga. Caitaca, cunanda rurashpa ricuichilla. Canguna shina rurajpica, ñucapash jahua pacha ventanacunata pascashpami, ashtacatapacha bendiciamusha. Tucuita Mandaj Dios ñucami, chashna nini.

¹¹Tucuita tucuchijtapashmi, cangunamandaca jarcashpa rimasha. Shina jarcajpimi, cangunapaj pambapi fucushca granocunataca na tucuchinga. Cangunapaj pambapica, uvas chagracunapash alimi fucunga. Tucuita Mandaj Dios ñucami, chashna nini.

¹²Cangunapaj llactaguca munanayai cajpimi, tucui llactacunapi causajcunaca: ‘Cushijushpami paicunaca causanajun’ ninajunga. Tucuita Mandaj Dios ñucami, chashna nini” nijurcami.

¹³Mandaj Diosca, cashnami nin: “Cangunaca, ninanda nalicachishpami ñucataca ninandapacha rimahuarcanguichi. Shina rimashpapash: ‘¿Imashnata candaca, nalicachishpa rimarcanchi?’ ninguichimi.

¹⁴Cashnatapashmi nircanguichi: ‘Yangallatami, Taita Diostaca servishpa causanchi. Pai mandashcata pactachishpa, tucuita Mandaj Diospaj ñaupajpi llaquilla purishpapash, ¿imatata japinchi?

¹⁵Cunanga, chaimandami cashna ninchi: Jariyashpa jatun tucujcunarami cushijushpa causanajun. Nalita rurajcunaca, na chaitalla rurashpa causanllu. Ashtahuangarin Taita Diostapash umachishpami, ima llaquimandapash quishpirinajurca ninchimi’ nircanguichimi” ninmi.

¹⁶Chaimandami Mandaj Diosta manllajcunaca, caishuj chaishuj paicunapaj cumbacunaman, tucuicunallata parlanajurca. Chai parlanajushcataca, Mandaj Diosca tucuita uyashpami, paipaj yarina libropi escribichirca. Mandaj Diosta manllashpa causajcunapaj, paipaj shutita yarishpa causajcunapajmi chashna escribichirca.

¹⁷Tucuita Mandaj Diosca, cashnami nin: “Ñuca shamui punllami paicunaca, imapash ashtahuan valishcacunata alichishcashna canga. Imashnami taitaca, paita servij huahua nalita rurashcataca cungan, chashnallatami ñucapash paicuna nalita rurashcataca cungasha.

¹⁸Ñucapajman tigrarishpami, imatapash cashcatapacha ruranahuan, nalita ruranahuanga shican cajta, shinallata Taita Diosta servishpa causanahuan, na servishpa causanahuambash shican cajta yachanguichi” ninmi.