Read Imbabura Highland Quichua MATEO 10 Bible Online

MATEO 10 - Imbabura Highland Quichua bible

MATEO 10

¹Chai jipallami Jesusca, paipaj chunga ishcai yachajujcunata cayashpaca, mapata rurachij ayacuna jundashca causanajuj gentecunamanda ayacunata llujchi ushachun, paicunaman ushaita curca. Shinallata tucui nanaihuan, tucui ung:uicunahuan huañujujcunata alichi ushachumbashmi, ushaita curca.

²Chai chunga ishcai apostolcunapaj shuticunaca, caicunami: Tucuicunapaj pundami, Pedro nishca Simón carca. Paipaj huauqui Andrespashmi carca. Shinallata Zebedeo shuti runapaj churicunapashmi carca. Paicunaca, Jacobo shuti, Juan shutimi carca.

³Shinallata Felipe, Bartolomé, Tomás shuti runacunapashmi carca. Impuestota japij Mateopashmi carca. Alfeo shuti runapaj churi Jacobopash, Tadeo nishca Lebeo shuti runapashmi carca.

⁴Cananita nishca Simón runapash, Jesusta japichij Judas Iscariote shuti runapashmi carca.

⁵Chai chunga ishcai purata cachajushpami Jesusca, cashna nishpa yachachijurca: “Na israelcuna causanajuj llactacunataca, na rinachu canguichi. Samaria llactapi tiaj pueblocunamambash, na yaicunachu canguichi.

⁶Ashtahuangarin chingashca llamacunashna causanajuj israelcunapajmanmi rina canguichi.

⁷ña rinajushpaca, cashna nishpa villashpandi ringuichi: ‘Jahua pachamanda Dios mandanaca, ñami chayamushca’ ninguichi.

⁸Huañujujcunatapash, lepra ung:uihuan ungushcacunatapash alichinguichi. Huañushcacunatapash causachinguichi. Ayacunatapash, gentecunamanda llujchinguichi. Chai ushaitaca, juyaihuan cangunaman carajpimi japircanguichi. Shinallatami, juyaihuan chashna rurana canguichi.

⁹Canguna chumbilishcacunapica orotapash, culquitapash na apanachu canguichi.

¹⁰Ñambi micungapaj, cucavi muchilatapash na apanachu canguichi. Túnica nishca churajunatapash, ishcaitaca na apanachu canguichi. Chaquipi churajunatapash, tauna caspitapash, na apanachu canguichi. Imaguta rurajcunapash, paicuna micungapaca chaimandallatami japinata charin.

¹¹Ashtahuangarin maijan puebloman, maijan uchilla llactaman yaicushpapash, cangunata cushilla mingachina runagutami, tapushpa mascana canguichi. Chaipimi, shuj llactaman yalingacaman mingarina canguichi.

¹²ña huasiman yaicushpaca: ‘¿Alillachu capanguichi?’ ninami canguichi.

¹³Chai huasipi mingachij ali cajpica, paicunapaca casilla ali causaigumi tianga. Ashtahuangarin nalicuna cajpica, casilla ali causaiguca cangunamanllatami tigranga.

¹⁴Maijan huasipi cashpa, pueblopi cashpapash, cangunata na chasquishpa canguna villajujtapash na uyangapaj munajpica, llujshishpa ringuichilla. Chaimandaca, cangunapaj chaquipi churajushcapi catijuj alpatapash chafsishpa ringuichi.

¹⁵Na llullashpami, cangunataca cashna nini: Imatalla rurashcata Dios ricuchijui punllapica, Sodoma shuti, Gomorra shuti pueblocunapi causashca gentecunata llaquichishcatapash ashtahuan yalitami, chai pueblopi causajcunataca ninanda llaquichinga.

¹⁶Ricuichi, ñucami cangunataca atujcunapaj chaupipi, llamacunata cacharinshna cachajuni. Shinamandami, cangunaca culebrashna aligutapacha yarishpa purina canguichi. Shinallata palomagushna, ali shunguhuanmi purina canguichi.

¹⁷Aligutapacha yariashpa puringuichi. Cangunata japishpaca, mandajcunapaj maquipimi churanajunga. Shinallata tandanajuna huasicunapimi astinajunga.

¹⁸Ñucata catinajushcamandaca, llactata mandajcunapaj ñaupajman, jatun mandajcunapaj ñaupajmanmi apai tucunguichi. Paicunamambash, na israelcunamambash, ñucamandaca villangapajmi chashna apai tucunguichi.

¹⁹Ashtahuangarin chashna apai tucushpaca: ‘¿Imashnata rimasha, imatata nisha?’ nishpaca, na manllanachu canguichi. Canguna rimajui horaspica, imata rimachumbash Dios cujpimi rimanguichi.

²⁰Chaipica, na cangunapaj munai rimanguichichu. Ashtahuangarin, cangunapaj Taitapaj Espíritu cangunapaj shungupi yarichijpimi, rimanguichi.

²¹Huauquillatami, paipaj huauquitaca huañuchijcunaman japichinga. Taitallatami, paipaj huahuataca, huañuchijcunaman japichinga. Huahuacunapash taitata, mamata ninanda na ricunayachishpami, huañuchi tucuchun japichinga.

²²Ñucata catinajushcamandami cangunataca, tucuilla gentecuna ninanda millanayachinga. Ashtahuangarin tucurimui punllacaman llaquicunata apajllami quishpiringa.

²³Cangunata llaquichingapaj cai pueblopi callarijpica, shuj puebloman pajacushpa ringuichi. Na llullashpami, cangunataca cashna nini: Israel llactapi tiaj pueblocunapica, Runa Aichayu tucushca ñuca tigramungacamambash, nara tucui pueblocunapi villashcachu canguichi.

²⁴Yachajujca, paita yachachijtaca na yalichu, servijpash paipaj amotaca na yalichu.

²⁵Yachajujca, paita yachachinshnallata ali yachajushca cashpaca, alimi canga. Servijpash, paipaj amoshnalla tucushpaca, alimi canga. Familiata mandaj taitataca: ‘Ayacunata mandaj Beelzebú shuti diablomi cangui’ nishpacarin, huasi ucu purataca ashtahuanmi ninanda nalicachinajunga.

²⁶Chashna llaquichinata yachashpapash, na manllanachu canguichi. Imata pacalla ruranapash, chai rurashcacunaca ricuringapachami. Na yachai ushanalla ima pacallapash na tianllu.

²⁷Ñuca cangunaman yana tutapi villashcataca, punllami villana canguichi. Ñuca cangunaman rinripilla yachachishcataca, huasi jahuamanda caparishpami villana canguichi.

²⁸Cangunapaj cuerpota huañuchij gentecunataca, na manllanachu canguichi. Ashtahuangarin Diostallami manllana canguichi. Paimi, almatapash, cuerpotapash ucu pachapi tucuchingapaj ushaita charij Diostami manllana canguichi.

²⁹¿Nachu ishcai gorrión nishca alasyu animaltaca, shuj uchilla culquipajlla jatun? Shina cashpapash chaicunaca, shujllapash cangunapaj Taita na cacharimujpica, na urmamunllu.

³⁰Cangunapaj uma ajchatapash, tucuillata cuentashcallami.

³¹Shinamandami gentecunataca, na manllana canguichi. Cangunaca, ashtaca gorriongunatapash yali valishcami canguichi.

³²Maijambash shujcunaman ñucamanda villajpica, ñucapash paicunataca jahua pachapi tiajuj ñuca Taitamanmi villasha.

³³Ashtahuangarin gentecunapaj ñaupajpi: ‘Paitaca na rijsinichu’ nishpa ñucata nijpica, ñucapash jahua pachapi tiajuj ñuca Taitapaj ñaupajpimi: ‘Paitapash na rijsinichu’ nisha.

³⁴Cai pachapi causajcuna casilla ali causaita charichunmi, shamushca yahuanguichiman. Casilla ali causaita charichunga na shamurcanichu, ashtahuangarin macanajui tiachunmi shamurcani.

³⁵Ashtahuangarin na shujlla yuyai tucushpa, churipash paipaj taitata, ushipash paipaj mamata, jachumbash paipaj suedrata fiñachunmi shamurcani.

³⁶Chashna fiñajcunaca, quiquin huasi ucu purallatami canga.

³⁷Ñucata na tucui shunguhuan juyashpa, paipaj taitata, mamatara ashtahuan juyajca, napacha ñucapajlla causaita ushanllu. Shinallata ñucata na tucui shunguhuan juyashpa, paipaj churita, paipaj ushitara ashtahuan juyajca, napacha ñucapajlla causaita ushanllu.

³⁸Maijan cashpapash paipaj cruzta aparishpa ñucata na catijca, napacha ñucapajlla causaita ushanllu.

³⁹Paipaj cai causaitara ashtahuan juyashpaca, chingaitami chingagringa. Ashtahuangarin ñucata catijushcamanda huañuchi tucushpaca, causaitami charigringa.

⁴⁰Cangunata chasquijcunaca, ñucatami chasquin. Ñucata chasquijcunaca, ñucata cachamuj Taitatami chasquin.

⁴¹Profeta runagu cajpi, Profeta chai runaguta maijambash chasquishpaca, chai chasquijcunapash villaj runagu japina cashcashnallatami, chasquij runapash japinga. Shinallata imatapash cashcatapacha ruraj runagu cajpi, imatapash cashcatapacha ruraj chai runaguta chasquishpaca, chai chasquijcunapash imatapash cashcatapacha ruraj chai runagu japina cashcashnallatami japinga.

⁴²Na llullashpami, cangunataca cashna nini: Ñucata catinajujcuna cai uchillagucunashna causajcunaca, ñucapaj yachajujcunami. Shina cashcamanda maijan cashpapash paicunaman chiri yacugutallapash pilchipi carajcunaca, Dios carajpi japinataca napacha chingachingachu” nijurcami.