Read Imbabura Highland Quichua MATEO 11 Bible Online

MATEO 11 - Imbabura Highland Quichua bible

MATEO 11

¹Jesusca, paipaj chunga ishcai yachajujcunaman aliguta yachachishca jipaca, chai llactapillata tiaj pueblocunapi yachachingapaj, villangapajmi rirca.

²Bautizaj Juanga, prezuna huasipi tiajushpami, Quishpichij Cristo imaguta rurashpa purijujtapash uyarca. Chashna uyashpami, paipaj yachajuj puramanda ishcai purata Jesuspajman cachamurca.

³Paicunataca: —¿Canllu, ñucanchi shuyanajushca Quishpichij Cristo capangui? Na cashpaca, ¿shujtachu shuyapashun?— nishpa tapuchunmi cacharca.

⁴Shina nijpimi Jesusca, cashna nishpa tigrachirca: —Cunanga, imata uyashcata, imata ricushcatapash, Juanman cashna nishpa villagrichi:

⁵‘Ñausacunapash ricunajunmi, jangacunapash alimi purinajun. Lepra ung:uihuan causajcunapash ali tucushcami. Rinrihuan na uyajcunapash uyanajunmi. Huañushcacunatapash causachijunmi. Imagutapash na charijcunamambash, ali villaitami villajun’ nigrichi.

⁶Ñucata crinata na saquishpa na pandajcunaca, ninandami cushijun— nijurcami.

⁷Paicuna rijhuanmi Jesusca, Juanmandaca gentecunaman villashpa cashna ni callarirca: “Jichushca pambapica, ¿imata ricungapajta llujshircanguichi? Ninanda huairashpa sucusta cuyuchijujta, ¿ricungapajchu rircanguichi?

⁸¿Imata ricungapajta llujshircanguichi? ¿Punchapamba churajushcacunatachu ricungapaj rircanguichi? Punchapamba churajushca runacunaca, jatun mandajcunapaj huasicunapimi tianajun.

⁹Ashtahuanga, ¿imatata ricungapaj rircanguichi? ¿Profeta runaguta ricungapajchu rircanguichi? Ari, cangunataca cashnami nini: Cangunaca, Profeta runatapash yalitami, ricungapaj rircanguichi.

¹⁰Juanmanda villashpami, cashna nishpa escribishca tiajun: ‘Ricui, ñucamanda villajtaca, canda ñaupashpa rishpa, can purina ñanda punda alichijuchunmi cachamugrini’ nijunmi.

¹¹Na llullashpami, cangunataca cashna nini: Huarmimanda huacharishca purapica, Bautizaj Juanda yali ali runaguca, shujllapash na tianllu. Ashtahuangarin Dios mandajuj llactagupica, tucuita yali uchillashna causaj runagumi, Juandaca ashtahuan yali.

¹²Bautizaj Juan villajui punllamandapacha cunangamanmi, Dios mandajuj jahua pacha llactaguca, ninanda llaquichi tucujun. Chashna ninanda llaquichijcunami, japishpa charinajun.

¹³Profetacunapash, mandashca shimicunapash, Juan shamungacamanmi villanajurca.

¹⁴Chasquingapaj munashpaca, paita chasquichi. Paimi, chai shamuna Elías runaguca.

¹⁵Uyangapaj rinrita charishpaca, aliguta uyaichi.

¹⁶Ashtahuangarin cunan viñaicunataca, ¿imahuanda chimbapurashayari? Cunan viñaicunaca, plazacunapi tiarishpa, paicunapaj cumbacunata caparinajuj huambracunashnami causanajun.

¹⁷Paicunaca, cashna nishpami caparinajun: ‘Canguna bailachun gaitata gaitajpipash, na bailashpami purircanguichi. Yarishpa yarishpa huacajpipash, na huacashpami purircanguichi’ ninajunmi.

¹⁸Bautizaj Juan shamushpaca, micuitapash na micushpa, vinotapash na ufiashpami purijun. Shina cajpimi, paitaca: ‘Aya jundashca runamari’ ninajun.

¹⁹Runa Aichayu tucushca ñuca shamushpami, micunatapash micushpa, vinotapash ufiashpa purijuni. Chaimandami cashna ninajuhuan: ‘Ricuichi, cai runaca yapata micuj runami, vinotapash ufiaj runami. Impuestota japishpa causanajuj runacunahuan, juchayu gentecunahuanmi, cumba tucushpa tandanajun’ ninajuhuanmi. Ashtahuangarin Diospaj ali yachaitaca, tucui paipaj huahuacunallami, imatapash cashcatapacha rurashpa ricuchinajun” nijurcami.

²⁰Tauca pueblocunapimi, pipash na rurai ushanallacunata ninanda rurashpa, Jesusca purijurca: Chaita ricushpapash, na llaquirishpa Diospajman tigrarinajurcachu. Chaimandami, Jesusca nalicachishpa shinllita cashna nishpa rimajurca:

²¹“Corazín shuti pueblopi causajcunalla, ¡aij imachari tucunguichi! Betsaida shuti pueblopi causajcunalla, ¡aij imachari tucunguichi! Cangunahuan cashpami, pipash na rurai ushanallacunata imatapash rurajurcani. Tiro shuti, Sidón shuti pueblocunapi cashna rurashca cajpica, uchami ninanda llaquirishpa Diospajman tigrarinman carca. Paicuna tigrarishcata ricuchingapaca, cañamuta churajushpami, uchufahuan shitarinman carca.

²²Chaimandami cangunataca, cashna nini: Dios llaquichijui punllapica cangunataca, Tiro shuti, Sidón shuti pueblocunapi causanajuj gentecunatapash ashtahuan yalimi llaquichinga.

²³Capernaum pueblopi causajcuna, cangunaca jahua pachaman apai tucushunllami yanguichimi. Ashtahuangarin ucu pachamanmi, shitai tucunguichi. Sodoma shuti pueblopi, pipash na rurai ushanallacunata imatapash juyailla rurashca cajpica, cunangamanmi chai puebloca tiajunman carca.

²⁴Chaimandami cangunataca, cashna nini: Dios llaquichijui punllapica cangunataca, Sodoma shuti pueblopi causanajuj gentecunatapash ashtahuan yalimi llaquichinga” nijurcami.

²⁵Chai punllacunapimi, Jesusca cashna nijurca: “Jahua pachatapash, cai pachatapash Mandajuj, ñuca Taitalla. Canga, alipacha yachajushca gentecunaman, alita yarishpa causanajuj gentecunamambash, cai yachajunataca na ricuchircanguichu. Ashtahuangarin huahuashna causajcunaman yachachishcamandami, candaca ninanda alicachini.

²⁶Ari, ñuca Taitalla, canga chashnatami munarcangui.

²⁷Ñuca Taitami, imagutapash tucuita ñucamanlla carahuashca. Pipaj Churi cajtapash, gentecunaca na yachahuanllu, ñuca Taitallami yachan. Ñuca Taitatapash, pipash na rijsinllu. Ñucallami, paipaj Churi cashpa rijsini. Shinallata paipaj Churi maijanmambash rijsichijpillami, ñuca Taitataca rijsinajun.

²⁸Imatapash rurashpa shaijushcashna, aparishcashna causajcuna, ñucapajman tucuilla shamuichi. Ñucami cangunataca samachisha.

²⁹Ñuca yachachishcataca, yugota aparinshna yachajuichi. Ñucallami, na ñapash fiñarij, jariyanata na yarij shunguta charini. Ñucamandami cangunapaj almaca, samanata taringa.

³⁰Ñucapaj yugoca fangallagumi, aparijpipash na llashachingachu” nijurcami.