Read Imbabura Highland Quichua MATEO 13 Bible Online

MATEO 13 - Imbabura Highland Quichua bible

MATEO 13

¹Chai punllallata huasimanda llujshishpa rishpami Jesusca, cucha manñapi yachachingapaj tiarirca.

²Ashtaca gentecuna paipajman shamujpimi, canoapi yaicushpa Jesusca tiarirca. Chai gentecunaca, tucuillami cucha manñapi tianajurca.

³Paicunamanmi, ashtaca parlocunahuan chimbapurashpa, Jesusca cashna nijurca: “Shuj tarpuj runaca, tarpungapajmi llujshirca.

⁴Chai runa muyuta shitajujpica, huaquingunaca ñanman yalijtami rirca. Ñambi sirinajuj muyucunataca, alasyu animalcuna shamushpami micurca.

⁵Shinallata huaquin muyucunaca, alpa ashalla tiaj rumilla pushtupimi urmarca. Chai muyucunaca, na jundu alpa cajpimi, ñapash viñarca.

⁶Ashtahuangarin uchilla sapita charishpami, ninanda indijpica, anguyashpa chaquirca.

⁷Shinallata huaquin muyucunaca, casha viñana chaupipimi urmarca. Cashacuna yalishpa viñashpami, llapishpa ismuchirca.

⁸Ashtahuangarin huaquin muyucunaca, ali alpapi urmashpami aliguta fucurca. Huaquingunaca shujmandallami patsajta, huaquingunaca sucta chungata, huaquingunaca quimsa chungata granurca.

⁹Uyangapaj rinrita charishpaca, aliguta uyaichi” nijurcami.

¹⁰Chai jipami, paipaj yachajujcunaca, Jesuspaj ladoman quimirimushpa, cashna nishpa tapunajurca: —¿Imashpata imahuambash chimbapurashpalla parlangui?— ninajurcami.

¹¹Shina tapujpimi Jesusca, paicunaman cashna nishpa tigrachirca: —Jahua pachapi Dios mandajujtaca, pipash na yachai ushashcatami cangunamanlla yachachishca. Ashtahuangarin caishuj gentecunamanga, na chai yachanata curcachu.

¹²Ashtacata charijca, Dios carajpimi ashtahuan charinga. Ashtahuangarin na charijtaca, ashagutalla charishcatapash quichungami.

¹³Shinamandami caishuj gentecuna yarichunga, imacunahuambash chimbapurashpa parlajuni. Paicunaca ricushpapash na ricunajunllu, uyashpapash na uyanajunllu, yaritapash na yarinajunllu.

¹⁴Paicuna chashna tucujpimi, Dios ima nishcata villaj Isaías villashcapash pactashca. Isaisca cashnami nijurca: ‘Rinrihuan uyashpapash, na yachai ushashpami causanguichi. Ricuitaca ricushpapash, napacha ricushcashnami causanguichi.

¹⁵Cai gentecunapaj shunguca, ninanda shinlliyashcami. Rinrihuan uyashpapash, nali uyanajunllu. Ama ricungapaj, ñavitapash vichashcashnami causanajun. Rinripash ama uyachun, shungupipash yuyaita ama japingapaj, ñucapajmambash ama tigrangapaj, ñucapash ama paicunata alichijuchunmi, chashna tucushca’ nijurcami.

¹⁶Ashtahuangarin cangunapaj ñavipash ricujushcamanda, cangunapaj rinripash uyajushcamandaca, ninanda cushijuichi.

¹⁷Na llullashpami, cangunataca cashna nini: Canguna cunambi ricunajunguichi, chaitaca Dios ima nishcata tauca villajcunapash, imatapash cashcatapacha rurashpa causajcunapash, ninandami ricunayachirca. Ashtahuangarin paicunaca, na ricunajurcachu. Shinallata canguna cunambi uyanajujtapash, ninandami uyanayachirca. Ashtahuangarin paicunaca, na uyanajurcachu.

¹⁸Tarpuj runahuan chimbapurashpa ñuca yachachijujtaca, aliguta uyahuaichi.

¹⁹Jahua pachapi Dios mandajujmanda villajuj shimita uyashpapash, huaquingunaca na yuyaita japinllu. Chaicunaca, ñambi urmashca muyushnallami tucunajun. Paicunapaj shungupi tarpushcashna uyashcatami, diablo shamushpa cungachin.

²⁰Huaquingunaca, rumilla alpapi urmashca muyushnallami tucun. Paicunaca, Diospaj Shimita villajpipash, ashagucamanllami cushijushpa chasquin.

²¹Paicunaca, sapita na charij yurashna cashpami, ashacamanlla catin. Shina cashpami llaquicuna japijpi, na cashpaca Diospaj Shimita catijujpi catiriashpa llaquichijpica, nitijanshna pandanajun.

²²Huaquingunaca, Diospaj Shimita villajpica, aligutami uyan. Paicunaca, casha viñana chaupipi urmashca muyushnallami tucun. Cai causaipilla ashtahuan ashtahuan ninanda charingapaj munashpami, pandachi tucunajun. Diospaj Shimitaca, chai tucui munaicunami cungachin. Shinamandami paicunaca, grano na fucunshna tucun.

²³Ashtahuangarin shujcunaca, ali alpapi tarpushca muyushnallami causanajun. Paicunaca, Diospaj Shimita uyashpami, aliguta fucunshna mirachinajun. Huaquingunaca shujlla muyumanda patsajta fucunshna, shujcunaca sucta chungata fucunshna, shujcunaca quimsa chungata fucunshnami mirachin— nijurcami.

²⁴Paicuna yarichunmi Jesusca, cutinmi cashna chimbapurashpa parlajurca: “Jahua pachapi Dios mandajujca, shuj runa paipaj alpapi ali muyuguta tarpushcashnami.

²⁵Ashtahuangarin tucuilla puñunajujpimi, chagrayu runata na ricunayachij runaca shamurca. Chai runaca, trigo chagrapimi, balicu muyuta shitashpa rirca.

²⁶Trigo ña viñashpa grano llujshijpimi, balicupash chapurishca ricurirca.

²⁷Chaita ricushpami, familiapaj huasipi servishpa causaj runacuna shamushpa, cashna tapurca: ‘Taitalla, canga ¿nachu ali trigoguta tarpuchircangui? ¿Imashpashi balicupash chapurian?’ nishpa tapugrirca.

²⁸Shina tapujpimi dueñoca, cashna nirca: ‘Ñucata fiñaj runami, chashna rurashcanga’ nijurcami. Shina nijpimi, chai runacunaca: ‘¿Chai balicu jihuata sapimanda llujchishpa shitagrichun munanguichu?’ nishpami tapunajurca.

²⁹Shina tapujpimi, dueñoca cashna nirca: ‘Balicu jihuata sapimanda llujchishpaca, trigondimi llujchinguichi, saquipaichilla.

³⁰Tandachina punllacaman ishcandillata fucujuchun saquipaichilla. Chai punllapimi, tandachij runacunataca cashna nisha: Balicu jihuatara tandachishpa, rupachingapaj huangupaichi. Trigotaca, ñuca huasigupi alichipaichi nishami’ nircami” nishpami villajurca.

³¹Paicuna yarichunmi Jesusca, cashnatapash chimbapurashpa parlajurca: “Jahua pachapi Dios mandajujca, shuj runa paipaj alpapi mostaza nishca muyuguta tarpushcashnami.

³²Chai muyuguca, tucui tiashca muyucunatapash yali jamzi jamzipachami. Ashtahuangarin chai muyugu viñashpaca, ima yuratapash yalishpa viñashpami, jatun quiru tucungacaman viñan. Chai yurapaj malquicunapimi, alasyu animalcunaca tazinda rurashpa causanajun” nijurcami.

³³Jesusca, cashnatapashmi chimbapurashpa parlajurca: “Shuj huarmica, quimsa batea junda jacupi levadurata chapushpami, tucuilla masa punguingacaman pacashpa saquin. Jahua pachapi Dios mandajujca, chashnapachami” nircami.

³⁴Cai tucui chimbapurashpa parlanacunahuanmi Jesusca, gentecunaman yachachijurca. Imaguta yachachishpapash, chimbapurashpa parlashpallami yachachijurca.

³⁵Profeta villashca pactachunmi, Jesusca chashna yachachijurca. Chai villajca, cashnami nijurca: “Paicunataca, chimbapurashpa parlashcahuanmi yachachijusha. Cai pachata Dios churashcamandapacha, pipash na yachashcatami villasha” nijurcami.

³⁶Gentecunata cayacaman nishpami, Jesusca huasiman rirca. Chai huasipimi, paipaj yachajujcunaca, Jesuspaj ladoman quimirishpa, cashna ninajurca: —Pambapi balicu jihuahuan chimbapurashpa parlajushcataca entendichihuai— ninajurcami.

³⁷Shina ninajujpimi Jesusca, paicunaman cashna nishpa tigrachijurca: —Ali muyuguta tarpuj runashnaca, Runa Aichayu tucushca ñucami cani.

³⁸Cai pachapi causajcunaca, tarpuna pambashnami. Ali muyuguca, Dios mandajujpi causanajuj huahuacunami. Ashtahuangarin diablopaj huahuacunaca, balicu jihuashnami.

³⁹Diablollatami, chagra dueñotaca ninanda fiñashpa, balicu muyuta tarpurca. Cai pacha tucurimui punllami, chagra fucushca cozechai punllashna canga. Cozechajcunaca, angelcunami canga.

⁴⁰Imashnami balicu jihuata sapimanda llujchishpaca, ninapi rupachin, chashnallatami cai pacha tucurimui punllapipash canga.

⁴¹Runa Aichayu tucushca ñucami, ñuca angelcunata cachamusha. Paicunami, nitijachinshna juchata rurachijcunatapash, nalita rurajcunatapash, ñuca mandajujmandaca tucuilla tandachishpa anchuchinga.

⁴²Shina tandachishpami chai gentecunataca, na huañushpa rupajuj jornopi shitanga. Chaipica huacashpa, quirutapash canirishpami causanajunga.

⁴³Ashtahuangarin imatapash cashcatapacha rurashpa causajcunaca, paicunapaj Taita mandajuj llactagupimi, indigushna punchapamba causanajunga. Uyangapaj rinrita charishpaca, aliguta uyaichi.

⁴⁴Jahua pachapi Dios mandajujca, alpa ucupi ninan valishcata pacashcashnami. Chai ninan valishcata shuj runa tarishpaca, chaipillatami pacashpa saquin. Chai runaguca, ninanda cushijushpa rishpami, pai imata charishcatapash tucuilla jatushpa, chai alpagutaca randin.

⁴⁵Jahua pachapi Dios mandajujca, juyailla perlascunata randishpa jatuj runashnami.

⁴⁶Shuj juyailla perlasguta ricushpaca, pai imata charishcatapash tucuilla jatushpami, chai perlasgutaca randin.

⁴⁷Shinallata jahua pachapi Dios mandajujca, tucui imashnalla tiaj pijicunata mama cuchapi japigrina linllishnami.

⁴⁸Linllipi pijicuna jundajpica, manñamanmi llujchin. Pijita japijcunaca tiarishpami, alitaca agllashpa canastacunapi churan. Nalicunataca, shitashpami saquin.

⁴⁹Chashnallatami, cai pacha tucurimui punllapipash canga. Angelcuna shamushpami, nali gentecunataca, imatapash cashcatapacha rurashpa causaj puracunamandaca anchuchinga.

⁵⁰Chai nalicunataca, na huañushpa rupajuj nina jornopimi shitanga. Chaipica huacashpa, quirutapash canirishpami causanajunga— nijurcami.

⁵¹Jesusca, paipaj yachajujcunataca cashnami tapurca: —Ñuca yachachijujtaca, ¿ñachu tucuita yachai ushanguichi?— nircami. Shina nijpica: —Ari, ñami yachai ushapanchi, Apunchi Jesús— ninajurcami.

⁵²Shina nijpimi Jesusca, paicunata cashna nirca: —Mandashca shimita yachachij runaca, jahua pachapi Dios mandajujmandami yachajun. Shina yachajushpaca, huasiyu taita ninan valishcata pai alichishpa charishcata, mushujta, maucata llujchinshnami yachajun— nircami.

⁵³Cai parlanacunata chimbapurashpa parlashca jipami, Jesusca llujshishpa rirca.

⁵⁴Paipaj llactaman chayamushpami, Jesusca tandanajuna huasipi yachachijurca. Shina yachachijujpimi, gentecunaca ninanda manllarishpa, cashna ninajurca: —Cai runaca, ¿maipita cashna ali yachaita yachajushcanga? ¿Maipita pipash na rurai ushanallacunata yachajushcanga?

⁵⁵¿Nachu cai runaca, carpinteropaj churi? ¿Nachu paipaj mamaca María? ¿Nachu paica Jacobopaj, Josepaj, Simonbaj, Judaspaj huauqui?

⁵⁶¿Nachu paipaj panicunapash, cai ñucanchi llactapillata tucuilla causanajun? Paica, ¿maipita cashnapacha cai tucuitaca yachajushcanga?— ninajurcami.

⁵⁷Chashna nishpami, Jesusta na crishpa pandarinajurca. Ashtahuangarin Jesusca, paicunataca cashnami nijurca: —Profeta runataca, shuj llactapirami alicachishpa chasquin. Ashtahuangarin paipaj llactapi causajcuna, paipaj huasipi causajcunaca, ninandami na ricunayachin— nircami.

⁵⁸Chai gentecunaca na crishcamandami, pipash na rurai ushanallacunataca chai llactapica na ashtacata Jesusca rurarca.