Read Imbabura Highland Quichua MATEO 14 Bible Online

MATEO 14 - Imbabura Highland Quichua bible

MATEO 14

¹Chai punllacunapica quimsapaj cati mandaj Herodesmi, Galilea llactataca mandajurca. Paimi, Jesús imata rurashpa purijujta uyashpaca,

²paita servijcunataca, cashna nirca: “Paica, Bautizaj Juanmari canga. Huañushcacunapaj chaupimandami causarishcanga. Shina cashpami paica, cashna ruraicunata rurangapaj, ushaita charinga” nircami.

³Paimi, Juandaca cadenahuan huatashpa, prezuna huasipi churachun mandashca carca. Herodías shuti huarmimi, chashna rurachun munarca. Chai huarmica, Herodespaj huauqui Felipepaj huarmimi cashca carca.

⁴Juanga cashnami nijurca: “Cambaj huauquipaj huarmihuan causanaca, mandashcapi nijunshnaca, napacha alichu” nijurcallami.

⁵Shina nishcamandami Herodesca, Juanda huañuchingapaj munarca. Ashtahuangarin: “Juandaca, Profeta runami” nishpa gentecuna alicachijpimi, Herodesca gentecunata manllashpa, na huañuchi usharca.

⁶Herodespaj huacharishca huata chayashca cajpimi, fiestata rurajurca. Herodías shuti huarmipaj ushica, tucuicunapaj ñaupajpi danzajujpimi, Herodesca ninanda ricunayachirca.

⁷Shinamandami: —Can imata mañajpipash, tucuitami carasha— nishpa, chai cuitsaman Herodesca juramenturca.

⁸Shina nijpimi: —Bautizaj Juanbaj umata caipillata, shuj platopi carahuai— nishpa, paipaj mama yachachishcashnallata Herodesta mañarca.

⁹Shina mañajpimi, jatun mandaj Herodesca llaquirirca. Ashtahuangarin paihuan mezapi tianajujcunapash uyajta juramentushca cashpami, cuchun mandashpa cacharca.

¹⁰Shina cachashpami, prezuna huasipi, Juanbaj umata muchugrichun mandarca.

¹¹Juanbaj umata platopi apamushpami, chai cuitsaman cunajurca. Chai cuitsaca, paipaj mamamanmi curca.

¹²Chai jipami, paipaj yachajujcuna chayagrishpa, Juanbaj cuerpogutaca apashpa pambarca. Chai jipami, Jesusman villangapaj rinajurca.

¹³Shina uyashpami canoapi tiarishpa, gentecuna na causaj, jichushca pambaman ringapaj Jesusca, pailla cuchata chimbarca. Chashna rishcata uyashpami, gentecunaca pueblocunamanda llujshishpa, chaquilla catishpa rinajurca.

¹⁴Canoamanda llujshijushpaca, ashtaca ashtaca gentecunata ricushpami, Jesusca ninanda llaquirca. Shina llaquishpami, paicuna purapi tiaj huañujujcunata alichijurca.

¹⁵Ña tutayajujpimi, Jesuspaj yachajujcunaca, paipaj ladoman quimirishpa, cashna ninajurca: —Ñamari tutayan. Cai pushtuca, jichushca pambami. Cai tucui gentecunaca, llactacunaman rishpa, imagutapash randishpa micunajuchun, cayacaman nishpa cachaillayari— ninajurcami.

¹⁶Shina nijpimi Jesusca, cashna nirca: —Paicunaca na rinata charinllu. Cangunami, micunataca carana canguichi— nircami.

¹⁷Shina nijpimi, paipaj yachajujcunaca: —Caipica na charinchica. Picha tandaguta, ishcai pijigutallami charinchi— ninajurca.

¹⁸Shina nijpimi, Jesusca: —Chaigutallapash apamuichi— nirca.

¹⁹Shina nishpallami gentecunataca: “Cai jihua pambapi tiaripaichi” nishpa, Jesusca mandarca. Ña tiarijpimi, picha tandagutapash, ishcai pijigutapash Jesusca japishpa, jahua pachata ricushpa, Diosta pashi nirca. Chai tandacunata asha asha chaupishpami, paipaj yachajujcunaman cujpi paicunaca, tucuilla gentecunaman caranajurca.

²⁰Shina carajpimi gentecunaca, na munangacaman micunajurca. Paicuna na micui ushashcataca, chunga ishcai canasta jundatami, paipaj yachajujcunaca tandachirca.

²¹Chaipi micushpa tianajuj purapica jaricunallami, picha huarangashna carca. Huarmicunata, huahuacunatacarin na cuentashcachu carca.

²²Chai jipami, canoapi tiarishpa cuchata chimbachun, Jesusca paipaj yachajujcunata ñaupachishpa cacharca. Shina cachashpallami Jesusca, chai tucui gentecunata cayacaman nirca.

²³Ña tucuicunata cayacaman nishpallami, Diosta mañangapaj Jesusca, urcuman pailla rirca. Ña tutayashcapimi Jesusca, pailla tiajurca.

²⁴Paipaj yachajujcunaca, ñami chaupi cuchata canoapi rinajurca. Ninan huaira tuparimushpa, yacuta caiman chaiman shitajujpimi, canoatapash ninanda cuyuchijurca.

²⁵Ña punllayanalla tucujujpimi Jesusca, yacu jahuata purishpa, paicunapajman shamujurca.

²⁶Yacu jahuata Jesús shamujujta ricushpami, paipaj yachajujcunaca ninanda musparirca. Shina musparishpami: —¡Ayamari shamujun!— nishpa, ninanda manllarishpa caparinajurca.

²⁷Ashtahuangarin Jesusca, paicunata uchalla rimashpami: —¡Ñucami shamujuni, ama manllarishpa, shinlli tucuichi!— nirca.

²⁸Shina nijpimi, Pedroca: —Apunchi Jesús, can cashpaca yacu jahuata shamushpa, canda tuparichun cayahuayari— nishpa tigrachirca.

²⁹Shina nijpimi, Jesusca: —Shamuilla— nirca. Shina nijpimi canoamanda llujshishpa, Jesusta tuparingapaj Pedroca, yacu jahuata rijurca.

³⁰Ashtahuangarin ninan huaira jatarimujta ricushpami, Pedroca manllarirca. Ña asha asha huashajui callarishpami: —¡Apunchi Jesús, quishpichihuayari!— nishpa, ninanda caparirca.

³¹Shina caparijhuanmi Jesusca, Pedrota maquimanda japishpa: —¡Na tucui shunguhuan crij runa! ¿Imashpata na ali crircangui?— nirca.

³²Paicuna canoapi tiarijpica, huairapash chulunlla quedarcallami.

³³Shinamandami, canoa ucupi tianajuj paipaj yachajujcunaca, Jesuspaj ñaupajpi ninanda alicachinajurca. Shina alicachishpami: —Canga, Taita Diospaj Churipachami capangui— ninajurca.

³⁴Chai cuchata chimbashpaca, Genesaret shuti llactamanmi, paicunaca chayamurca.

³⁵Chai llactapi causanajuj gentecuna Jesusta rijsishpami, chai muyundi llactacunapi tucuicuna yachachun, villachun cacharca. Shina cachajpimi, tucuilla huañunajuj gentecunataca Jesuspajman apamunajurca.

³⁶Chai huañujujcunaca: “Cambaj churajushca pundagupillapash tacarichun saquihuai” ninajurcami. Jesús churajushcapi tacarijcunaca, tucuilla ali tucurcallami.