Read Imbabura Highland Quichua MATEO 15 Bible Online

MATEO 15 - Imbabura Highland Quichua bible

MATEO 15

¹Chai jipaca, Jerusalenmandami fariseocuna, mandashca shimita yachachijcunapash huaquingunalla, Jesuspaj ladoman quimirimurca. Paicunaca cashnami ninajurca:

²—¿Imashpata cambaj yachajujcunaca, ñaupa taitacuna yachachishpa saquishcataca, na cazunajun? Paicunaca, maquitapash na maillashpami micunajun— ninajurcami.

³Shina nijpimi Jesusca, cashna nijurca: —¿Imashpata cangunapash, canguna yachachishpa saquishcatara rurashpa catinajungapaj, Taita Dios mandashcata na cazunguichi?

⁴Taita Diosca, cashna nishpami mandarca: ‘Cambaj taitata, cambaj mamata ninanda alicachingui. Taitata, mamata imapash tucushpaca alichari canman nijtaca, llaquitapash na llaquishpami huañuchina’ nircami.

⁵Ashtahuangarin cangunaca, cashna nishpami yachachinguichi: ‘Maijandapash Taita mama imata mañajpipash: Cangunaman caraitaca, na ushanichu. Ñuca imaguta charishcatapash, ñami Taita Diosman tucuilla cararcani ninguichi’ nishpami yachachinguichi.

⁶Chashna yachachishcamandami, paicunapaj taita mamataca na ashtahuan alicachinajunga. Chashnacunami, canguna yachachishpa saquishcata catingapaj, Taita Dios mandashcataca yangapi churashcanguichi.

⁷Mishqui shimi, jayaj shungucunami canguichi. Canguna cashna tucuna cajpillatami, Profeta Isaiasca cashna villajurca:

⁸‘Cai llactapi causajcunaca, shimihuanllami ninanda alicachihuan. Ashtahuangarin paicunapaj shunguca, ñucamandaca carupimi.

⁹Ñucataca yangallami alicachinajun. Ashtahuangarin gentecuna mandashcatallami, ñuca yachachishcatashna yachachinajun’ nishpami villarca— nijurcami.

¹⁰Shina nishpallami, chai tucui gentecunata cayashpa, Jesusca cashna nirca: —Ñuca villashcataca, aliguta uyashpa yaringuichi.

¹¹Imatapash micushpa langashpaca, ñami juchata ruranchi yanguichiman. Ashtahuangarin imatapash nalita rimashpami, gentecunaca juchayu tucun— nircami.

¹²Shina nijpimi, paipaj yachajujcunaca, Jesuspajman quimirishpa, cashna ninajurca: —Can chashna villajujpica, fariseocunaca ninandami fiñarirca. Chaitaca, ¿nachu yacharcangui?— ninajurcami.

¹³Shina nijpimi Jesusca, paipaj yachajujcunata cashna nijurca: —Jahua pachapi tiajuj ñuca Taita na tarpushca yuracunataca, tucuillatami sapimanda llujchishpa shitanga.

¹⁴Chai fariseocunataca, upalla saquichilla. Paicunaca, shuj ñausa runata ñausallata pushashpa rijunshnami purinajun. Shuj ñausa runata shuj ñausa pushashpa rijushpaca, ishcandimi utujupi huashajunga— nijurcami.

¹⁵Shina nijpimi Pedroca, cashna nirca: —Can chimbapurashpa parlashcataca, ñucanchiman aliguta yachachihuai— nircami.

¹⁶Shina nijpimi Jesusca, cashna nijurca: —¿Cangunapashchu, ñuca villajushcataca nara yachai ushanguichi?

¹⁷Imata micujpipash, chunllulimanmi rijun. Chai jipaca, uraiman llujshinllami. Chaitaca, ¿nachu yachanguichi?

¹⁸Ashtahuangarin nali shimicunata rimanaca, shungumandami llujshimun. Chaimi runataca mapayachin.

¹⁹Shungu ucumandami, nalicunata rurana yuyaicunaca llujshin. Chaimandami huañuchinajun, cazarashca jahua shujcunahuan causanajun, huainayanajun, shuhuanajun, llullanajun, imatapash nalitallami rimanajun.

²⁰Chaicunami runataca mapayachin. Ashtahuangarin maquita na maillashpa micushcamandaca, runaca na mapayanllu— nijurcami.

²¹Chai llactamanda llujshishpa rijushpaca, Tiro shuti, Sidón shuti llactacunamanmi Jesusca chayarca.

²²Chaipimi, Canaán shuti llactapi causajuj huarmica, Jesusta ñapash cashna nishpa caparimurca: —¡Ñaupa taita Davidpaj Churi, ñucata llaquihuayari! Ñuca ushigumi, aya jundashpa ninanda llaquichijpi causajun— nijurcami.

²³Shina nijujpipash Jesusca, upalla uyarcallami. Ashtahuangarin Jesuspaj yachajujcunaca, paipaj ladoman quimirishpami: —Chai huarmica, ñucanchitamari caparishpa catimujun. Imagutallapash nishpa tigrachipairi— ninajurca.

²⁴Shina nijpimi, Jesusca: —Ñucataca, llamashna chingashca israelcunapajmanllami, Diosca cachamuhuarca— nircami.

²⁵Ashtahuangarin chai huarmica, Jesuspaj ñaupajpi ñapash cungurishpami: —¡Ñucata ayudahuayari, Apunchi Jesús!— nirca.

²⁶Shina nijpimi, Jesusca: —Huahuacuna micunajujta quichushpa, alcugucunaman caranaca nalichu— nirca.

²⁷Shina nijpimi chai huarmica, cashna nirca: —Chashnapachamari capan, Apunchi Jesús. Shina cajpipash huahuacuna micunajushpa jichashcataca, alcucunapash micupanllamari— nircami.

²⁸Shina nijpimi Jesusca, chai huarmita cashna nirca: —Canga, aligutapachami crihuashcangui. Can munashcashnalla, ali tucuchun ninimi— nircami. Shina nijpimi chai ushiguca, ña ali tucushca carca.

²⁹Chai llactamanda llujshishpa rijushpaca, Galilea cucha manñatami, Jesusca shamujurca. Chai jipami, urcuman chayashpa chaipi tiarirca.

³⁰Chaipi tiajujpimi, ashtaca gentecuna paipajman chayamunajurca. Paicunaca jangacunata, ñausacunata, na rimai ushajcunata, lado chaqui illaj, lado maqui illajcunata, ashtahuan shuj huañunajuj gentecunatapash, ashtaca ashtacacunata apamushpami, Jesuspaj ñaupajpi churanajurca. Paicunataca, Jesusca alichijurcallami.

³¹Shina alichijujpica, na rimai ushajcunapash rimarcallami. Lado chaqui illaj, lado maqui illajcunapash, ali tucurcallami. Jangacunapash purircallami, ñausacunapash ricurcallami. Chaimandami gentecunaca ninanda manllarishpa, israelcunapaj Taita Diostaca ninanda alicachinajurca.

³²Chai jipami, paipaj yachajujcunata cayashpa Jesusca, cashna nirca: —Cai tucui gentecunami, ñucahuanga ña quimsa punllata tianajun. Paicunataca, ima micunagupash illaj cajpimi, ninanda llaquini. Paicunaman na micuchishpa yarjaita tigrachingapaca, na munanichu. Na micuchishpa yarjaita cachajpica, chaupi ñambillami na ri ushashpa urmanga— nircami.

³³Shina nijpimi, paipaj yachajujcunaca: —Cai tucui gentecunaman carangapaca, cai jichushca pambapica, ¿maipita ashtaca tandata tarishunyari?— ninajurca.

³⁴Shina ninajujpimi: —Cangunaca, ¿mashna tandatata charinguichi?— nishpa, Jesusca tapurca. Shina tapujpimi: —Canchis tandagutallami, huaquin pijigundi charinchi— ninajurca.

³⁵Shina nijpimi Jesusca, chai tucui gentecunata: “Alpagupi tiaripaichi” nirca.

³⁶Ña tiarijpica, chai canchis tandagutapash, pijicunatapash japishpami Jesusca, Diosta pashi nishpa mañarca. Shina mañashpallami, chaitaca asha asha chaupishpa, paipaj yachajujcunaman cujpi paicunaca, chai tucuilla gentecunaman caranajurca.

³⁷Shina carajpimi gentecunaca, na munangacaman micurca. Paicuna na micui ushashcataca, canchis canasta jundatami, paipaj yachajujcunaca tandachirca.

³⁸Chai micushpa tianajuj purapica, jaricunallami chuscu huarangashna carca. Huarmicunata, huahuacunatacarin na cuentashcachu carca.

³⁹Chai jipaca, gentecunata cayacaman nishpami, Jesusca canoapi tiarishpa, Magdala shuti llactaman rirca.