Read Imbabura Highland Quichua MATEO 17 Bible Online

MATEO 17 - Imbabura Highland Quichua bible

MATEO 17

¹Shina villajushpami, sucta punlla jipaca Pedrotapash, Jacobotapash, Jacobopaj huauqui Juandapash paicunatalla pushashpa, Jesusca urcuman rirca.

²Paicunapaj ñaupajpimi Jesusca, ñapash punchapamba tucushpa ricurirca. Ñavipash, indishna punchapambami ricurirca. Pai churajuriajpash, yuraj yuraj michagushnami ricurirca.

³Chaipimi Moisespash, Eliaspash, Jesushuan parlanajujta, paipaj yachajujcunaca ñapash ricurca.

⁴Shina ricushpami Pedroca, Jesusta cashna nirca: —Ñucanchica, alipajmari shamupashcanchi, Apunchi Jesús. Can munajpica, quimsa chugllaguta rurapashun ninchimi. Shujtaca canman, shujtaca Moisesman, shujtaca Eliasman rurapashun— nircami.

⁵Chashna nijujpillatami, punchapamba fuyu pillushpa, paicunataca ñapash quilpamurca. Chai fuyu ucumandaca, cashna rimajmi uyarirca: —Caimi, ñuca juyashca Churigu. Paimandami, ninanda cushijuni. Pai imata yachachishcataca, aliguta uyanguichi— nircami.

⁶Chashna rimamujta uyashpaca, paipaj yachajujcunaca ninanda manllarishpami, urai cumurirca.

⁷Shina urai cumurinajujpimi, Jesús shamushpaca: —Jatarichilla, na manllarinachu canguichi— nishpa, paicunataca maquihuan tacarirca.

⁸Shina nijpi alsarishpa ricujpica, pipash illajpi Jesuslla shayajushcatami ricunajurca.

⁹Chai urcumanda urai shamunajushpami Jesusca, chai quimsa yachajujcunataca cashna nirca: —Runa Aichayu tucushca ñucami, huañuchi tucushpapash, huañushcacunapaj chaupimanda causarina cani. Canguna ricushcataca, pimambash na villanachu canguichi— nircami.

¹⁰Shina nijpimi paipaj yachajujcunaca, Jesusta cashna nishpa tapunajurca: —Mandashca shimita yachachijcunaca, ¿imashpata: ‘Eliasrami punda shamunapacha’ ninajun?— ninajurcami.

¹¹Shina nijpimi Jesusca, paicunaman cashna nishpa tigrachirca: —Eliasca, punda shamunapachami. Pai shamushpami, imagutapash tucuita alichijunga.

¹²Ashtahuangarin cangunaman, cashna nishpami villani: Eliasca, ñami shamurca. Paitaca, na chasquishpami, paicunapaj munaita rurashpa llaquichinajurca. Paicunallatami, Runa Aichayu tucushca ñucatapash llaquichihuanga— nircami.

¹³Jesús chashna villajpimi, Bautizaj Juanmanda villajushcata, paipaj yachajujcunaca yachanajurca.

¹⁴Ashtaca gentecuna tandanajushcapajman Jesús chayajpimi, shuj runaca paipaj ñaupajman shamushpa, ñapash cungurishpa cashna nirca:

¹⁵—Ñuca churiguta llaquipairi, Apunchi Jesús. Paica, ñapash shitarishpa tucurishpami, ninan llaquita apajun. Paica, cutin cutinmi ninacunapi, yacucunapi urmapan.

¹⁶Cambaj yachajujcunamanmi apamurcani. Ashtahuangarin paicunaca, na alichi ushapanllu— nircami.

¹⁷Shina nijpimi Jesusca, cashna nirca: —¡Ñucata napacha ali crij miraicuna, jatun nalicuna! ¿Ima horascamanda cangunahuanga, chashna cashayari? ¿Ima horascamanda cangunamandaca llaquirijushallayari? Chai huambragutaca, caiman apamugrichi— nircami.

¹⁸Chai huambrata apamujpimi Jesusca, chai ayata shinllita rimashpa llujchirca. Shina llujchijpica, ali tucurcallami.

¹⁹Chai jipallami: —Ñucanchica, ¿imashpata chai ayataca na llujchi usharcanchi?— nishpa, Jesustalla paipaj yachajujcunaca tapunajurca.

²⁰Shina tapujpimi Jesusca, cashna nijurca: —Cangunaca, ñucata na tucui shunguhuan crishcamandami, na llujchi usharcanguichi. Na llullashpami, cangunataca cashna nini: Jamzi mostaza muyu valigutallapash crishpaca, cai urcuta: ‘Caimanda anchurishpa, shuj ladopi tiarigri’ nijpipash ringallami. Tucui shunguhuan ñucata crishpaca, imata ruraitapash ushanguichillami.

²¹Ashtahuangarin na micushpa Diosta mañashpallami, chashna nali ayataca llujchina— nijurcami.

²²Galilea llactapi purijushpami, Jesusca paipaj yachajujcunata, cashna nirca: —Runa Aichayu tucushca ñucataca, runacunaman japichihuangami.

²³Paicuna ñucata huañuchijpipash, quimsa punllahuanga causarishallami— nircami. Shina nijpimi paipaj yachajujcunaca, ninandapacha llaquirirca.

²⁴Capernaum puebloman paipaj yachajujcunandi Jesús chayajpimi, Diospaj huasimanda impuestota japijcunaca, Pedropajman shamurca. Shina shamushpami: —Cangunata yachachijca, ¿ishcai dracma nishca culquita cunata yachanllu?— nishpa, Pedrotaca tapunajurca.

²⁵Shina tapujpimi: —Ari, cunata yachapanmi— nishpa Pedroca, huasi ucuman yaicurca. Paitaca, Jesusrami ucha cashna nishpa tapurca: —Cai pachapi jatun mandajcunaca, ¿picunatata tributo nishcata, na cashpaca impuestotaca cuchun mandan? ¿Chai llactapillata causajcunata, na cashpaca shuj llactamanda shamushca gentecunatachu impuestotaca cuchun mandan, imata Simón?— nishpami tapurca.

²⁶Shina tapujpimi, Pedroca: —Shuj llactamanda shamushca gentecunatami, impuestotaca cuchun mandan— nirca. Shina nijpimi Jesusca, cashna nirca: —Chai llactapillata causajcunaca, impuestotaca na cunachu.

²⁷Ashtahuangarin impuestota japijcunata ama fiñachingapaj cunanga, cuchaman ri. Chaipica, pijita japij anzuelo nishcata shitashpa, punda amulij pijiguta llujchingui. Chai pijipaj shimipimi, shuj estatero nishca culquiguta taringui. Chaitaca ñucamandapash, canmandapash paicunaman cugringui— nircami.