Read Imbabura Highland Quichua MATEO 18 Bible Online

MATEO 18 - Imbabura Highland Quichua bible

MATEO 18

¹Chai punllacunapimi paipaj yachajujcunaca, Jesuspajman quimirishpa cashna ninajurca: —¿Maijanshi jahua pachamanda Dios mandajpi causaj puracunapica, ashtahuan yali alicachi tucunajushun?— ninajurcami.

²Shina nijpimi Jesusca, shuj huahuata cayashpa, paicunapaj chaupipi shayachishpa,

³cashna nijurca: —Na llullashpami, cangunataca cashna nini: Huahuacunashnalla yarishpa causangapaj na tigrashpaca, jahua pachapi Dios mandajuj llactaguman yaicuitaca, napacha ushangachu.

⁴Maijambash cai huahuagushna, ali shunguhuambacha causashpami, jahua pachapi Dios mandajuj llactagupica, ninanda alicachi tucujunga.

⁵Maijambash ñuca shutipi cai huahuatashna chasquishpaca, ñucatami chasquihuan.

⁶Maijambash cai uchillagucunashna ñucata crishpa catinajujta, nitijanshna pandachij runataca, molino jatun rumita cungapi huatashpa, mama cuchapi ucu ucuman huashajuchun shitashpachari, ashtahuan ali canman.

⁷Gentecunata pandachingapaca, imapash nalicunallami cai pachapica, ashtaca tian. Chaicunaca, ¡aij imachari tucunajunga! Chashna pandachijca tianapachamari. Shina cajpipash juchata rurachun pandachij runaca, ¡aij imachari tucunga!

⁸Shinamandami cambaj maqui cashpa, chaqui cashpapash, imatapash nalita rurachingapaj munajpica, muchushpa shitana cangui. Chashna shujlla maquihuan, shujlla chaquihuan causaita causangapaj rinami, cambaca ashtahuan ali. Ashtahuangarin ucu pachapi na huañushpa rupajuj ninaman ishcandi maquihuan, ishcandi chaquihuan shitai tucunaca, napacha alichu.

⁹Shinallata cambaj ñavi, imatapash nalita ricushpa rurachingapaj munajpica, surcushpa shitangui. Chashna shujlla ñavihuan causaita causangapaj rinami, cambaca ashtahuan ali. Ashtahuangarin ucu pachapi rupajuj ninaman ishcandi ñavihuan shitai tucunaca, napacha alichu.

¹⁰Cai uchillagucunatara, maijandapash na ricunayanllu ninguichiman. Cangunataca, cashnami nini: Paicunata cuidaj angelcunaca, jahua pachapimi tianajun. Chai angelcunami, jahua pachapi tiajuj ñuca Taitapaj ñavitaca ricushpa, causaita causaicaman tianajun.

¹¹Runa Aichayu tucushca ñucami, chingashca causajcunataca quishpichingapaj shamurcani.

¹²Cangunaca, ¿imata yanguichiman? Patsaj llamata shuj runa charijpi, shuj llamagu chingajpica, ¿nacha iscun chunga iscun llamacunata chai urcupi saquishpa, chai chingashca llamagutara mascangapaj rinman?

¹³Na llullashpami, cangunataca cashna nini: Chai chingashca llamaguta tarishpaca, chai na chingashca, iscun chunga iscun llamamandapash yalimi chai llamaguta tarishcamanda, ninanda cushijunman.

¹⁴Shinallatami jahua pachapi tiajuj cangunapaj Taitaca, cai uchillagushna puramandaca, shujllapash chingagrichunga na munan.

¹⁵Maijan crijpash, canda fiñashpa juchata rurajpica, paipajman rishpami ñavi ñavi jarcashpa rimana cangui. Canda cazushpa uyajpica, cambaj huauquishna purichunmi crichishcangui.

¹⁶Ashtahuangarin canda na cazungapaj munajpica, shujta cashpa ishcaita cashpapash pushashpami, cutin rina cangui. Ishcai cashpa, quimsa cashpapash, paicunami imata uyashcatapash, tucuita aliguta villajunajunga.

¹⁷Paicunatapash na cazungapaj munajpica, tandanajuj crijcunamanmi villana cangui. Tandanajuj crijcunatapash na cazujpica, na Israel runatashna, impuestota japishpa causaj runatashna ricungui.

¹⁸Na llullashpami, cangunataca cashna nini: Cai pachapi tucui imatapash huatashcashna saquijpica, jahua pachapipash huatashcashnami canga. Shinallata cai pachapi tucui imatapash cacharijpica, jahua pachapipash cacharishcami canga.

¹⁹Cashnatapashmi nini: Shujllashnalla yarishpa, imagutapash Taita Diosta canguna puramanda ishcaipura tucushpa cai pachapi mañajpica, jahua pachapi tiajuj ñuca Taitami caranga.

²⁰Shinallata maipimi ñuca shutipi ishcai cashpa, na cashpaca quimsa cashpapash tandanajujpica, ñucaca paicunapaj chaupipimi cani— nijurcami.

²¹Shina nijpi quimirishpami, Pedroca cashna nirca: —Apunchi Jesús, maijan huauqui cashpapash, ñucata fiñashpa juchata rurajpica, ¿mashnacamanda perdonasha? ¿Canchiscaman perdonanaca alichu, imata?— nishpami tapurca.

²²Shina tapujpimi Jesusca, cashna nijurca: —Canchiscamanlla perdonaitaca, na ninichu. Ashtahuangarin canchis chunga canchistapash yalishpami perdonana cangui ninimi.

²³Jahua pachapi Dios mandajujca, shuj llactata jatun mandaj mandajunshnami. Chai mandajca: ‘Ñuca imata charishcatapash, ¿imatata rurarcanguichi?’ nishpami, paipaj servijcunataca tapuchirca.

²⁴Tapuchi callarijpica, sucta huaranga pusaj patsaj quintal culquita na tigrachishpa purij runatami, jatun mandajpaj ñaupajman apamunajurca.

²⁵Chai runagutaca na tigrachi ushajpimi, divimanda japingapaca: ‘Paipaj huarmindi, huahuacunandi, imata charishcatapash tucuilla jatugrichi’ nishpa mandarca.

²⁶Shina nijpimi, jatun mandajpaj ñaupajpica cungurishpa: ‘Culquigutaca, tucuillagutamari tigrachipasha. Ashaguta shuyapai, amo taitalla’ nishpami mañarca.

²⁷Shina nijpica, ninanda llaquishpami: ‘Chai culquitaca, ama tigrachishpa saquinguilla’ nishpa chai amoca, chai servijtaca yanga cacharirca.

²⁸Shina cacharijpi chai servij runa rijushpaca, paiman patsaj denario nishca culquita na tigrachishpa purij cumba runatami tuparirca. Chai runagutaca, cungapi llapishpami: ‘Ñuca culquita tigrachihuai’ nijurca.

²⁹Shina nijpi, paipaj ñaupajpi chai runagu cungurishpami: ‘Culquigutaca, tucuillaguta tigrachishamari. Ashaguta shuyapai’ nishpa mañajurca.

³⁰Ashtahuangarin shina mañajpipash, paica na shuyashpami chai runagutaca, prezuna huasipi churachirca. Divishca culquita tigrachingacamanmi, shina churachirca.

³¹Chashna llaquichijujta caishuj servijcuna ricushpaca, ninandami llaquirirca. Paicunami, chashna rurashcataca, paicunata mandajman villangapaj rinajurca.

³²Shina villajpimi chai amoca, chai runata cayachun cachashpa cashna nirca: ‘Canga, jatun nali runami cashcangui. Can ñucaman cunata charishcata cungapaca, ashaguta shuyapai nishpa mañajpica, saquinguilla nishpami candaca cacharircani.

³³¿Nachu cambash, cambaj cumbataca chashnallata llaquina carcangui? Candaca llaquishpami, ñucaca yanga cacharircani’ nircami.

³⁴Shina nishpami, chai mandajca ninanda fiñarishpa, culquita tucuilla cungacaman, macachun macaj runacunaman cugrichi nishpa, chai runataca cacharca.

³⁵Maijan crijpash, cangunata imatapash nalita rurajpi, na tucui shunguhuan perdonajpica, chashnallatami jahua pachapi tiajuj ñuca Taitapash, cangunataca llaquichinga— nijurcami.