Read Imbabura Highland Quichua MATEO 19 Bible Online

MATEO 19 - Imbabura Highland Quichua bible

MATEO 19

¹Shina yachachishca jipami Jesusca, Galilea llactamanda llujshishpa, Jordán shuti yacuta chimbashpa, Judea llactaman chayagrirca.

²Ashtaca ashtaca gentecuna catishpa rinajujpimi, huañujujcunata Jesusca alichijurca.

³Chaiman fariseocuna shamushpami, imata tigrachijpipash juchachingapaj munashpa, cashna tapunajurca: —Maijan runapash, paipaj huarmita imamandapash juchachishpa jichushpaca, ñucanchita mandashca shimipi nijunshna, ¿alichu canga, imata?— ninajurcami.

⁴Shina ninajujpimi Jesusca, cashna nirca: —Diosca, cai pachata churashpami: ‘Jaritapash, huarmitapash rurarca’ nishcataca, ¿nachu leyishcanguichi?

⁵Diosca, cashnatapashmi nirca: ‘Shinamandami jarica, taitatapash, mamatapash saquishpa, paipaj huarmihuan causangapaj tandanajunga. Shina tandanajushpaca, ishcai cashpapash, shujlla aicha tucushpami causanajunga’ nircami.

⁶Chashna cashpami, na ashtahuan ishcai cashpa, shujlla cuerpo tucushpa causanajun. Shina cashcamandami, Taita Dios chashna tandachishcataca, runaca napacha shicanyachi ushana— nircami.

⁷Shina nijpimi fariseocunaca, Jesustaca cashna ninajurca: —¿Imashpata cazarashca cashpata jichushpa saquina cartata escribishpa, huarmiman cushpalla jichunallami nishpa, Moisesca mandashca canga?— ninajurcami.

⁸Shina nijpimi Jesusca, paicunataca cashna nirca: —Canguna shinlli shungucuna cajpimi, huarmitaca jichunallami nishpa, Moisesca nijushca. Ashtahuangarin cai pachata churai punllacunapica, na chashnachu carca.

⁹Shinamandami cangunataca, cashna nini: Napash huainayajpita, paipaj huarmita shuj runa yangamanda jichushpa, shujhuan cazarashpaca, huainayashpami causajun. Shinallata cusa jichushca huarmihuan pipash cazarashpaca, huainayashpallatami causajun— nircami.

¹⁰Shina nijpimi paipaj yachajujcunaca, cashna ninajurca: —Cazarashca jahua, huarmita na jichunalla cajpica, ama cazarashpa causanami ashtahuan ali canga— ninajurcami.

¹¹Shina nijpimi Jesusca, cashna nirca: —Cai ñuca yachachishcataca, na tucuicuna chasqui ushanllu. Chaitaca, Taita Dios yachachijpillami, maijambash chasqui ushan.

¹²Huaquingunaca, mamapaj vijsamandallatami, capashcashna huacharin. Huaquin runacunaca, capai tucushca cashpami, na cazarashpa causan. Cutin shujcunaca, jahua pachapi Dios mandajujpi causangapaj munashpami, na cazarashpa capashcashna causanajun. Maijambash cai ñuca yachachishcata chasquishpaca, chasquichun— nircami.

¹³Chai jipami, huahuacunapaj uma jahuapi maquita churashpa, Taita Diosta mañachun nishpa, Jesuspajman huahuacunata apamushca carca. Ashtahuangarin huahuacunata apamujcunataca, paipaj yachajujcunaca jarcashpami rimanajurca.

¹⁴Ashtahuangarin Jesusca, cashnami nirca: —Huahuacuna ñucapajman shamuchunga, saquinallami canguichi. Na jarcashpa rimanachu canguichi. Jahua pachapi Dios mandajuj llactaguca, cai huahuacunashna shamujcunapajmi— nircami.

¹⁵Shina nishpa, huahuacunapaj uma jahuapi maquita churashpaca, Jesusca chaimanda rircallami.

¹⁶Shuj runaguca, Jesuspajman shamushpami cashna nirca: —Aliguta Yachachij, causaita causagrinata ñuca charingapaca, ¿ima aligutata rurana capani?— nircami.

¹⁷Shina tapujpimi Jesusca, cashna nirca: —¿Imashpata ñucataca, ali runagumi cangui nihuangui? Pipash alica na tianllu. Taita Diosllami alica tian. Causaita causagrinata charingapaj munashpaca, Dios mandashca shimicunatami pactachina cangui— nircami.

¹⁸Shina nijpimi: —Chai mandashcacunaca, ¿maijanda capan?— nirca. Shina nijpimi Jesusca, cashna nijurca: —Ama huañuchinguichu, cazarashca jahua ama shujcunahuan causanguichu, ama shuhuanguichu, ama chashnapachami nishpa juchachishpa villanguichu.

¹⁹Cambaj taitata, mamatapash alicachingui. Cambaj cumba runagutaca, imashna can juyarishnallata juyangui— nijurcami.

²⁰Shina nijpimi chaira viñai chai runaca, cashna nirca: —Chaicunataca, huahuamandapachami tucuita pactachijupani. ¿Imatata ashtahuan pactachinara capani?— nircami.

²¹Shina nijpimi Jesusca, cashna nirca: —Taita Diospaj ñaupajpi alipi ricuringapaj munashpaca, can imata charishcatapash tucuilla jatugri. Chai culquitaca, imagutapash na charijcunaman caragri. Chashna carashpaca, jahua pachapimi ninan charij cangui. Chai jipaca, ñucata catihuailla— nircami.

²²Jesús chashna nijpica chai runaca, ashtaca charij cashcamandaca ninanda llaquirishpa rircallami.

²³Shina rijpimi Jesusca, paipaj yachajujcunataca cashna nijurca: —Na llullashpami, cangunataca cashna nini: Ninan charij shuj runapaca, jahua pachapi Dios mandajuj llactaguman yaicunaca, ninan shinllipachami.

²⁴Cashnatapashmi cangunataca nini: Taita Dios mandajuj llactaguman shuj ninan charij runa yaicungapaj randica, camello nishca animalrapashmi, auja utujuta fangalla yalinman— nircami.

²⁵Shina nijpimi paipaj yachajujcunaca, ninandapacha manllarishpa cashna ninajurca: —Shinaca, ¿pita quishpiri ushangayari?— nishpa, paicunapura nirinajurca.

²⁶Shina nirinajujpimi Jesusca, paicunata ricushpa cashna nirca: —Gentecunapaca, caica napacha ushanallachu. Ashtahuangarin Taita Diospaca, tucui ushanallami— nircami.

²⁷Shina nijpimi Pedroca, cashna nirca: —Ricui, ñucanchica imaguta charishcatapash tucuita saquishpami, candaca catinajunchi. Shina catishcamandaca, ¿imagutashi charishun?— nishpami tapurca.

²⁸Shina tapujpimi Jesusca, paicunata cashna nirca: —Na llullashpami, cangunataca cashna nini: Taita Dios tucuita mushujyachi punllapimi, Runa Aichayu tucushca ñucaca, punchapamba tiarinapi tiarishpa mandajusha. Chai punllapimi, ñucata catinajushcamandaca, cangunapash chunga ishcai tiarinapi tiaringuichi. Shina tiarishpami, chunga ishcai Israel aillucuna imata rurashcatapash, canguna ricuchishpa mandanguichi.

²⁹Maijan cashpapash, ñuca shutipi villangapaj, paipaj huasita, huauquicunata, panicunata, taitata, mamata, huarmita, huahuacunata, paipaj alpacunata saquishcamandaca, patsaj viajetapash yalitami chasquinga. Shinallata causaita causagrinatapashmi japinga.

³⁰Ashtahuangarin ashtacacuna pundapi churai tucushpa causajcunaca, huashamanmi churai tucunajunga. Shinallata huashaman churai tucushcacunaca, pundapimi churai tucunajunga.