Read Imbabura Highland Quichua MATEO 2 Bible Online

MATEO 2 - Imbabura Highland Quichua bible

MATEO 2

¹Judea llactapi tiaj Belén pueblopi Jesús huacharijpica, indi llujshimuj ladomandami, alipacha yachajushca runacuna Jerusalenman shamunajurca. Chai punllacunapica, Herodes shuti jatun mandajmi mandajurca.

²Paicunaca, cashna nishpami tapunajurca: —Israelcunata mandangapaj huacharishca huahuaguca, ¿maipita canga? Pai huacharishcata ricuchij luzerotami, indi llujshimuj ladopi ricurcanchi. Chaimandami, chai huahuaguta cungurishpa alicachingapaj shamupanchi— ninajurcami.

³Chashna ninajujta, jatun mandaj Herodes uyashpaca, ninandami manllarirca. Jerusalenbi causajcunapash, tucuillami chashnallata manllarinajurca.

⁴Shina manllarishpami, curacunata mandaj tucuilla curacunata, mandashca shimicunata gentecunaman yachachijcunata cayachun cachashpa, Quishpichij Cristo maipi huacharina cashcata tapurca.

⁵Shina tapujpimi paicunaca, cashna ninajurca: —Judea llactapi tiajuj Belén pueblopimi huacharinga. Chaitaca, Profeta escribishcapimi, cashna nijun:

⁶‘Judá llactapi tiaj Belén pueblolla. Judá llactapi mandaj puracunahuan ricujpica, na yapa uchillaguchu cangui. Canmandami, shuj jatun mandajca llujshinga. Paimi, ñuca agllashca israelcunataca, michijunga’ nijunmi— ninajurcami.

⁷Shina nijpimi Herodesca, alipacha yachajushca chai runacunataca, pipash na yachajta cayashpa, ima punllapacha chai luzero ricurishcata ali ali tapuchijurca.

⁸Chai jipami, chai runacunataca cashna nishpa, Belenman cacharca: —Chai puebloman richi. Chaipica, chai huahua maipi cajta ucha tapushpa mascanguichi. Ña tarishpaca, ñucapash paita alicachigringapaj, ñucaman ucha villaj shamunguichi— nircami.

⁹Chai runacunaca, jatun mandaj chashna nijta uyashpaca rircallami. Paicunataca, indi llujshimuj ladopi ricurishca luzerollata ricurishpami, paicunata ñaupashpa rijurca. Chai luzero ña chayashpaca, huahua sirijuj huasi jahuapimi shayarirca.

¹⁰Chai luzerota ricushpami, chai runacunaca ninandapacha cushijunajurca.

¹¹Chai huasi ucuman yaicushpaca huahuagutapash, paipaj mama Mariatapash ricushpami, cungurishpa ninanda alicachinajurca. Chai jipallami paicunaca, cajacunata pascashpa orota, inciensota, mirra nishcata caranajurca.

¹²Paicunataca: “Herodespajman, pactarallapash tigranguichiman” nishpa, muscuipi villarca. Shina villajpimi, shuj ñanda japishpa paicunapaj llactaman tigranajurca.

¹³Chai runacuna tigrashca jipami, Jatun Diospaj angelca, muscuipi Joseman ricurishpa, cashna nirca: “Ucha jatarishpa, huahuata mamandi pushashpa, Egiptopi pacajugri. Ñuca canman cutin villangacaman, chaipi causanguilla. Herodesca, huahuata huañuchingapajmi mascachigrijun” nircami.

¹⁴Pai rijcharishpaca, huahuata mamandi apashpami, chai tutallata Egiptoman rirca.

¹⁵Chaipimi, Herodes huañungacaman causanajurca. Jatun Dios profetaman villachishca pactachunmi, chaipi causanajurca. Paica: “Egiptomandami, ñuca Churitaca cayarcani” nircami.

¹⁶Herodesca, alipacha yachajushca chai runacunahuan umachi tucushcata ricushpami, ninandapacha fiñarirca. Shina fiñarishpami, Belén pueblopi, chai muyundi tucui llactacunapipash, ishcai huatata nara charij, tucuilla jari huahuacunata huañuchigrichun mandarca. Alipacha yachajushca runacuna villashca punllacunamanda cuentashpami, chashna huañuchigrichun cacharca.

¹⁷Chashna rurajpimi, Profeta Jeremías villashca pactarca. Paica cashnami nijurca:

¹⁸“Ramá shuti pueblopica, ninanda caparishpa, ninanda huacashpa, aij nishpa huacajujmi uyarirca. Raquel shuti huarmiguca, paipaj huahuacunamandami ninanda huacajun. Ama yapa huacaichu nijpipash, huahuacuna huañushcamandaca huacajurcallami” nijurcami.

¹⁹Ashtahuangarin Herodes huañushca jipami, Jatun Diospaj angelca José, Egiptopi cajpi muscuipi ñapash ricurirca:

²⁰Shina ricurishpami, cashna nirca: “Ucha jatarishpa, huahuata mamandi pushashpa, Israel llactaman tigrailla. Huahuata huañuchingapaj munaj runacunaca, ñami huañushca” nircami.

²¹Shina nijpimi Joseca jatarishpa, huahuata mamandi pushashpa, Israel llactaman tigramurca.

²²Ashtahuangarin: “Judea llactataca, Herodespaj churi Arquelao shuti runa mandajun” nijtami, Joseca uyarca. Chaita uyashpami, chai llactaman yaicunataca manllarca. Muscuipi ricurishpa villajpimi Joseca, Galilea llactaman rirca.

²³Chai llactaman chayamushpaca, Nazaret shuti pueblopimi causanajurca. “Paica, nazareno ni tucushcami canga” nishpami, profetacunaca villashca carca. Chaipi causagrijpimi, chashna villashcashna pactarca.