Read Imbabura Highland Quichua MATEO 20 Bible Online

MATEO 20 - Imbabura Highland Quichua bible

MATEO 20

¹Jahua pachamanda Dios mandanaca, uvas chagrata charij runashnami. Chai runaca, uvasta pallachingapajmi runacunata mascangapaj, tutamandata jatarishpa rirca.

²‘Shuj punllaguta pallashpa chishajpica, shuj denario nishca culquigutami cupasha’ nishpami, chai runaca pallajcunahuan parlarca. Ña ari nijpimi, paipaj chagrapi uvasta pallachun cacharca.

³Chai runaguca, cutinmi iscun horas ña tucunallapica, plazaman tigrarca. Chaipica, yanga yanga tianajuj runacunatami ricurca.

⁴Chaicunata ricushpaca: ‘Ñuca chagragupi uvasta pallangapaj, ¿nacha cangunapash ripanguichiman? Cuna cashcagutapachami cupasha’ nircami. Shina nijpimi, paicunaca rirca.

⁵Chai runaguca, chaupi punllapipash, ña quimsa horas tucujujpipash, cutinmi chashnallata mascangapaj rirca.

⁶Shinallata ña picha horas chishi tucujujpipash, cutinmi plazaman rirca. Chaipica, yanga yanga tiashpa chishanajuj shuj runacunatami ricurca. Paicunatapash: ‘¿Imashpata chashna chishanajunguichi?’ nishpami tapurca.

⁷Shina tapujpica: ‘Imata ruranapash na taririjpimi, cashna chishanajunchi’ ninajurcami. Shina nijpimi: ‘Ñuca chagragupi uvasta pallangapaj, ¿nacha cangunapash ripanguichiman? Cuna cashcagutapachami cupasha’ nirca.

⁸Ña tutayajujpimi, chagrayu runaguca, mayordomota cashna nirca: ‘Pallajcunata cayashpa, jipa shamujmandara callarishpa, punda shamujcunamambash cungui’ nircami.

⁹Ña shamujushpaca, chishi chishipi yaicujcunara punda shamushpami, shuj denario nishca culquigutaca japinajurca.

¹⁰Pallangapaj punda yaicujcunapash shamushpaca: ‘Ñucanchicarin ashtahuanmi japishun’ yashpami shuyanajurcami. Ashtahuangarin paicunapash, shujlla denario culquigutami japinajurca.

¹¹Chashna japishpami, chagrayu amotaca, fiñashpa rimashpa,

¹²cashna ninajurca: ‘Caicunaca, chairalla yaicumushpa, shuj horastallamari pallanajurca. Ñucanchicarin, ninanda shaijushpa rupaipipash llaquinayaitami pallashpa chisharcanchi. ¿Imashpata paicunamambash, ñucanchimambash chashnallatata cungui?’ ninajurcami.

¹³Chashna nijpimi, chagrayu amoca, paicuna puramanda shuj runataca, cashna nirca: ‘Ricui, amigo. Candaca, ima nalitapash na rurashcanichu. ¿Nachu shuj denario culquiguta cusha nijpi, canga ari nihuarcangui?

¹⁴Can japina cashca culquitaca japishpa rilla. Cambaj jipa shamujmambash, canmanshnallatami cungapaj munani.

¹⁵¿Nachu ñuca culquitaca, ñuca munashcashna cunalla cani? ¿Na cashpaca, ali shunguta ñuca charijpichu, paica ama chashnallata japishcanman yashpa fiñahuangui?’ nijurcami.

¹⁶Chashnami, pundapi churai tucushcacunaca, huashaman churai tucunajunga. Shinallatami huashaman churai tucujcunapash, pundapi churai tucunajunga. Ashtacacunami cayai tucunajun. Shina cashpapash, huaquingunallami agllai tucushca— nijurcami.

¹⁷Jesusca, Jerusalenman vichai rijushpami, paipaj chunga ishcai yachajujcunatalla, ashaguta ladoman pushashpa, ñambi cashna nijurca:

¹⁸—Ricuichi cunanga, Jerusalenmanmi vichai rinajunchi. Chaipimi, Runa Aichayu tucushca ñucataca, curacunata mandaj curacunapajman, mandashca shimita yachachijcunapajman japishpa apahuanga. Chaicunami ñucataca, huañunapachami cangui ninajuhuanga.

¹⁹Shinallata na israelcunamanmi japichihuanga. Paicunaca, ñucataca asishpa ricushpami, astitapash astihuanga. Chai jipami, cruzpi chacatashpa huañuchihuanga. Ashtahuangarin quimsa punllahuanga causarishallami— nijurcami.

²⁰Chai jipami, Zebedeo shuti runagupaj mamaca, ishcai churicunandi, Jesuspaj ladoman quimirishpa, paipaj ñaupajpi cungurishpaca: —¿Nacha ñuca mañashcaguta uyahuanguiman?— nirca.

²¹Shina nijpimi: —¿Imagutata munanguiyari?— nishpa, Jesusca tapurca. Shina tapujpimi, chai huarmica cashna nirca: —Can mandangapaj tiarishpaca, cai ñuca ishcai churigucunataca, shujtaca ali ladoman, shujtaca lluqui ladoman tiachipangui— nircami.

²²Shina nijpimi Jesusca, cashna nishpa tigrachirca: —Na yachaimandami, chashna mañahuanguichi. ¿Cangunaca, ñuca ufiana vasomanda ufiai ushanachu canguichi? ¿Ñuca bautizarinashna bautizari ushanachu canguichi?— nircami. Shina tapujpimi paicunaca: —Ari, ushapashunllami— ninajurca.

²³Shina nijpimi Jesusca, cashna nirca: —Ñuca vasomandaca ufianguichipachami. Ñuca bautizarinashna bautizaritapash ushanguichimi. Shina rurajpipash, ñuca ali ladopi, lluqui ladopi tiarichunga, na ñuca cunachu cani. Ashtahuangarin maijangunaman ñuca Taita alichishcamanmi cunga— nircami.

²⁴Chai ishcai huauqui purahuanlla, Jesús chashna parlajujta uyashpami, caishuj chungapura yachajujcunaca ninanda fiñarirca.

²⁵Shinamandami Jesusca, paicunata cayashpa cashna nijurca: —Llactacunata jatun mandajcunami, shuj llactapi causajcunataca, ninanda mandashpa charin. Shinallata mandaj puracunapash, ashtahuan mandai ushajllami, caishujcunatapash mandanajun. Chaitaca, cangunallata yachanguichimi.

²⁶Canguna purapica, na chashna tucungachu. Ashtahuangarin maijambash mandaj tucungapaj munashpaca, canguna purapi servishpa causachun ninimi.

²⁷Canguna purapi maijambash punda cangapaj munashpaca, cangunata servishpa causachun ninimi.

²⁸Shinallatami Runa Aichayu tucushca ñucapash, ñucata servihuaichi ningapaca, na shamurcani. Ashtahuangarin shujcunata servishpa, ashtacacunata ñuca huañushpa quishpichingapajmi shamurcani— nijurcami.

²⁹Jericó shuti pueblomanda paipaj yachajujcunandi, Jesús llujshishpa rijujpica, ashtaca ashtaca gentecunami catishpa rinajurca.

³⁰Chai ñambica, ishcaipura ñausa runacunami tianajushca carca. Paicunaca: “Jesusmi shamujun” nijta uyashpami: —¡Ñaupa taita Davidpaj Churi, Apunchi Jesús, ñucanchitaca llaquihuayari!— nishpa ninanda caparinajurca.

³¹Shina caparinajujpimi: —¡Ama caparishpa, upalla caichi!— nishpa, gentecunaca jarcanajurca. Shina jarcajpipash: —¡Ñaupa taita Davidpaj Churi, Apunchi Jesús, ñucanchitaca llaquihuayari!— nishpami, ashtahuan caparinajurca.

³²Shina caparinajujpimi, Jesusca shayarishpa, paicunata cayarca. Shina cayashpami: —Cangunaca, ¿imagutata rurachun munanguichi?— nishpa tapurca.

³³Shina tapujpimi paicunaca: —Ñucanchi ñavigu ricuchun alichihuai, Apunchi Jesús— ninajurca.

³⁴Shina ninajujpimi, Jesusca ninanda llaquishpa, paicunapaj ñavipi tacarirca. Shina tacarijpica, chai ñausa runacunaca ñapash ali tucushpami, Jesusta catishpa rinajurca.