Read Imbabura Highland Quichua MATEO 21 Bible Online

MATEO 21 - Imbabura Highland Quichua bible

MATEO 21

¹Jerusalenman Jesús ña chayajushpaca, Olivos shuti loma ladopi tiajuj Betfagé shuti pueblomanmi chayamurca. Chai pueblomandami Jesusca, paipaj yachajuj puramanda ishcaita cacharca.

²Paicunataca, cashnami nijurca: —Chimba lado uchilla llactaguman ripaichi. Chaipimi, paya burroguta huatashcata, maltun burrogundi shayajujta taringuichi. Chai burrogucunataca cacharishpa apamupanguichilla.

³Canguna cacharijujpi, pipash imatapash nijpica: ‘Apunchi Jesús apamugrichi nijpimi apanajupanchi. Ñapash apamushunllami’ ninguichi— nishpami cacharca.

⁴Profeta rimashca pactachunmi, Jesusca chashna rurajurca. Chai villaj runaca, cashnami nishca carca:

⁵‘Sion pueblopi causajcunaman, cashna nishpa villapaichi: Ricuichi, cangunata jatun Mandajmi shamujun. Paica, ali shungutami charin. Shuj maltun burropi tiarishpami, cangunapajman shamujun. Paica, aparishpa purij burropaj huahua, maltun burropimi tiarishpa shamujun’ nishcami carca.

⁶Chai ishcai yachajujcuna rishpaca, Jesús mandashcashnami ruranajurca.

⁷Paya burrota, maltun burrondi apamushpaca, paicunapaj jahualla churajunacunatami, burrocunapaj lomopi churanajurca. Shina churajpimi Jesusca, maltun burrogupi tiarirca.

⁸Jesús ña rijujpica, ashtaca ashtaca gentecunami, paicunapaj churajunataca, ñambi mandanajurca. Huaquingunaca, quiru malquicunata cuchushpami, ñambi mandanajurca.

⁹Chai gentecunaca, Jesusta chaupipi churashpami, ñaupajtapash huashatapash rinajurca. Paicunaca, cashna nishpami ninanda caparinajurca: —¡Ñaupa taita Davidpaj Churica, alicachi tucushca cachun! ¡Taita Diospaj shutipi shamujujca, aligumari cangui ni tucushca cachun! ¡Jahua pachapi tiajuj Diosca, alicachi tucushca cachun!— ninajurcami.

¹⁰Jerusalenman Jesús yaicujpica: —¿Maijan runatayari?— nishpami, chai pueblopi causaj gentecunaca, tucuilla ninanda manllarishpa tapunajurca.

¹¹Shina tapunajujpimi: —Cai runaguca, profeta Jesusmari. Paica, Galilea llactapi tiaj Nazaret pueblomandami shamujun— nishpa, gentecunaca villanajurca.

¹²Jerusalenbi cashpami Jesusca, Taita Diospaj huasiman yaicurca. Chai ucumandaca, jatushpa tianajuj runacunatapash, randishpa purijcunatapash llujchishpami calpachijurca. Culquicunata randishpa jatushpa tiajcunapaj mezacunatapash, palomacunata jatujcuna tianajushcacunatapash urmachishpami saquirca.

¹³Shinallata Jesusca, cashnami nirca: —Escrbishcapica cashnami nijun: ‘Ñuca huasiguca, ñucata mañana huasigumi ni tucushcami canga’ nijunmi. Ashtahuangarin cangunaca, shuhuacuna pacajuj utujutashnami, cai huasitaca rurashcanguichi— nircami.

¹⁴Diospaj huasi ucupica, ñausacunapash, jangacunapash paipajman shamujpimi, Jesusca paicunataca alichijurca.

¹⁵Ashtahuangarin shina juyailla alichijujta ricushpami, curacunata mandajcunapash, mandashca shimita yachachijcunapash fiñarca. Shinallata: “¡Ñaupa taita Davidpaj Churica, alicachi tucushca cachun!” nishpami, uchilla huahuacuna caparinajurca. Shina caparinajujpimi, ashtahuan ninanda fiñarca.

¹⁶Chashna fiñashpami: —Cai uchillacuna cashna caparinajujtaca, ¿nachu uyangui?— ninajurca. Shina nijpimi Jesusca, cashna nirca: —Ari, uyajunimi. ‘Uchilla huahuacunamanda, chuchujuj huahuacunamandami, canda alicachinataca na pandashpa rimachishcangui’ nijujtaca, ¿nachu ima horapash leyishcanguichi?— nircami.

¹⁷Shina nishpallami, paita fiñajcunapajmanda anchurishpa, Jerusalenmandaca llujshishpa, Betania puebloman rirca. Chai pueblopimi, tutaca pacarirca.

¹⁸Jerusalén puebloman tutamanda tigramujushpami, Jesusca ninanda yarjachirca.

¹⁹Ñan ladopi jigos yura shayajujta ricushpami Jesusca, chai yuraman quimirirca. Chai yurapica, fangacunalla junda, imapash na fucushca cajpimi: —Cunanmandapacha ima horapash ama ashtahuan fucunguichu— nirca. Shina nijpimi, chai jigos yuraguca, ñapash chaquirca.

²⁰Shina chaquijta paipaj yachajujcuna ricushpaca, ninanda manllarishpami: —¿Imashpata chai yuraguca, ñapash chaquin?— nishpa tapunajurca.

²¹Shina tapujpimi Jesusca, paicunata cashna nijurca: —Na llullashpami, cangunataca cashna nini: Na ishcai shungu tucushpa aliguta crishpaca, cai jigos yurata ñuca chaquichishcatapash yalitami rurai ushanguichi. Canguna crishpa, cai urcuta: ‘Caimanda anchurishpa, mama cuchaman huashajui’ nijpica, huashajungallami.

²²Tucui shunguhuan crishpa, Taita Diosta mañashpaca, imagutapash japinguichipachami— nijurcami.

²³Diospaj huasiman yaicushpa Jesús yachachijujpimi, curacunata mandajcunapash, mandaj rucucunapash, paipajman ñapash quimirishpa Jesustaca, cashna nishpa tapurca: —¿Pipaj ushaihuanda caicunataca, chashna rurajungui? ¿Pita chashna rurachun, candaca mandarca?— ninajurcami.

²⁴Shina nijpimi Jesusca, paicunata cashna nishpa tigrachirca: —Ñucapashmi, cangunataca shujta tapugrini. Chaita ñucaman canguna tigrachijpica, ñucapash pipaj ushaihuan cashna rurajushcata villashallami.

²⁵Juan bautizachunga, ¿maimandata cachamushcanga? ¿Jahua pachamandachu cachamushcanga, na cashpaca runacunachu cachamushcanga?— nijurcami. Shina tapujpimi, paicunapura cashna parlarinajurca: “¿Ima nishunchita? ‘Juanga, jahua pachamanda cachamujpimi shamurca’ nijpica: ‘¿Imashpata pai villajujtaca, na crircanguichi?’ ningami.

²⁶‘Runacuna cachamujpillami shamurca’ ningapaca, gentecunata manllashpami, na ni ushanchi. Tucui gentecunami: ‘Juandaca, Profetami shamurca’ nishpa parlanajun” nirinajurcami.

²⁷Shina ninajushpami, Jesustaca: —Na yachapanchica— ninajurca. Shina nijpimi Jesusca, paicunatapash cashna nirca: —Ñucapash, maijambaj ushaihuan cashna rurajushcataca, na villashachu.

²⁸Caitami tapugrini: ¿Cangunaca imata yanguichi? Shuj runaguca, ishcai churicunatami charirca. Punda churitaca: ‘Cunanga, ri uvasta pallangui, huahua’ nishpami, taitaca mandarca.

²⁹Shina nijpica: ‘Na rinayanllu’ nircami. Shina nishpapash, jipaman llaquirishpaca, rircallami.

³⁰Chai taitaca, punda churita mandashcashnallatami, jipa churitapash mandarca. Shina mandajpica: ‘Ari ripashallami, taiticu’ nishpapash, chai churica na rircachu.

³¹Chai ishcai churicunamandaca, ¿maijanda taita munashcata rurarca?— nishpami, Jesusca tapurca. Shina tapujpica: —Punda churimi, taita munashcataca rurashca— ninajurcami. Shina nijpimi Jesusca, paicunataca cashna nijurca: —Na llullashpami, cangunataca cashna nini: Impuestota japijcuna, culquimanda huainayaj huarmicunarami, cangunata mishashpa, Taita Dios mandajujman yaicunajunga.

³²Ashtahuangarin imatapash cashcatapacha rurashpa causana ñanda ricuchishpa, Bautizaj Juan villangapaj shamujpipash na crishpami causarcanguichi. Shina cajpipash impuestota japijcuna, culquimanda huainayashpa causaj huarmicunarami crinajurca. Chashnata ricushpapash, canguna cringapaca, na llaquirishpami causarcanguichi.

³³Uyahuaichi, cutimbashmi cangunaman chimbapurashpa parlagrini: Shuj runaguca, paipaj alpapimi uvascunata tarpurca. Chai tarpushca alpataca, muyunditami jarcarca. Chaipillatami, uvasta cutana pushtutapash utujushpa rurarca. Shinallata shuj torretapashmi rurarca. Shina rurashpallami, alpata trabajaj shuj runacunaman chai alpata partido cushpa, caru llactaman rirca.

³⁴Ña fucuna punllacuna pactajpimi, chai alpayu runaca, chai runacunata uvas fucushcaguta, chaupiguta carai nishpa apamugrichun, paita servijcunata cacharca.

³⁵Ashtahuangarin chai runacunaca, chai servijcunata japishpami, shujtaca macarca, shujtaca huañuchirca, shujtaca rumicunahuanmi huañuchirca.

³⁶Chashna rurajpimi, punda cachashcatapash yali ashtahuan tauca servijcunata, alpayu runaca cacharca. Paicunatapash, chashnallatami chai runacunaca llaquichinajurca.

³⁷Chai alpayu runaca: ‘Ñuca churigutaca manllashpa, imatapash na ningachu’ yashpami, tucuicunapaj jipaca, paipaj churitapacha cacharca.

³⁸Ashtahuangarin alpata trabajaj chai runacunaca, chai churigu shamujujta ricushpaca, pai purami cashna ninajurca: ‘Paillamari, cai alpataca japinga. Cai alpataca, ñucanchi japingapaj, paita huañuchingapaj shamuichi’ ninajurcami.

³⁹Chai alpayu runapaj churigutacarin japishpami, uvas chagramanda llujchishpa huañuchinajurca.

⁴⁰Shina huañuchishcamanda alpayu runa shamushpaca, chai runacunataca, ¿imatashi ruranga?— nishpami tapurca.

⁴¹Shina tapujpimi paicunaca, cashna ninajurca: —Chai nali runacunataca, llaquitapash na llaquishpami huañuchinga. Chai jipaca, paipaj uvas chagrataca fucujpi chaupingapaj munaj shuj runacunamanmi, chai alpayu runaca minganga— ninajurcami.

⁴²Shina nijpimi Jesusca, cashna nijurca: —Dios escribichishca Shimipi imata nijujtaca, ¿ima horallapash nachu leyishcanguichi? Chaipica cashnami nijun: ‘Huasichij runacuna na munashpa shitashca rumillatami, huasichi callaringapaca, pirca tigranapi churana rumi tucushca. Chaitaca, Jatun Diosmi rurashca. Chaita ricushpaca, ninandami manllarinajunchi’ nijunmi.

⁴³Shinamandami cangunataca, cashna nini: Taita Dios mandajuj llactaguman canguna yaicunatapash quichushpami, ali fucunshna paita cazuj gentecunaman cunga.

⁴⁴Maijambash chai rumipi urmashpaca, faquirijtami urmanga. Shinallata maijambaj jahuapipash, chai rumi urmashpaca, ñutuitami ñutunga— nijurcami.

⁴⁵Jesús chashna chimbapurashpa parlajujpica, curacunata mandajcunapash, fariseocunapash, paicunata uyachishpami cashna parlajun ninajurcami.

⁴⁶Ashtahuangarin gentecuna Jesustaca: “Profeta runami” ninajurca. Shina ninajushcamandami paicunaca, Jesusta imashna japingapaj munanajushpapash, gentecunata manllashpa na japi ushanajurca.