Read Imbabura Highland Quichua MATEO 23 Bible Online

MATEO 23 - Imbabura Highland Quichua bible

MATEO 23

¹Chai jipami Jesusca, chai uyanajuj gentecunatapash, paipaj yachajujcunatapash, cashna nijurca:

²“Mandashca shimita yachachijcunapash, fariseocunapash: ‘Moisés mandashca shimicunata yachachishpami tianajun.

³Shinamandami paicuna imata yachachijpipash, rurashpa pactachishpa causana canguichi. Ashtahuangarin paicunallata yachachishpapash, na pactachinajunlllu. Shina cajpimi, na paicunashna causana canguichi ninimi.

⁴Paicunaca, shuj jatun quipita huatashpa, shuj runaman apachinshnami, na pactachi ushanallata yachachinajun. Chashna yachachishpapash, chai quipita na tacarinshnami, paicunallata na pactachingapaj munan.

⁵Imata rurashpapash, gentecuna alicachishpa ricuchun yashpallami ruranajun. Paicunaca, Diospaj Shimitapash, shuj shimigutalla frentepi, maquipi huatarishpami purinajun. Shinallata jatun flecocunahuan jahualla churajunata rurashpami churajushpa purinajun.

⁶Shinallata boda huasicunapipash, alipilla tiarishpami purinajun. Shinallata tandanajuna huasicunapipash, paicunata alicachishpa ricunajuchunmi, ñaupajpi tiarinajun.

⁷Paicunata manllashpa, plazacunapipash tucuicuna alillachu capanguichi ninajuchunmi munan. Shinallata: ‘Yachachij, Yachachij’ nishpa rimachunmi munan.

⁸Ashtahuangarin cangunaca, gentecuna: ‘Yachachij’ nishpa rimachunga, na munanachu canguichi. Cangunata Quishpichij Cristo cajpimi, Yachachijtaca ñucatalla charinguichi. Cangunaca, tucuillami huauquicunalla canguichi.

⁹Cangunaca, jahua pachapi tiajuj shujlla Taitatallami charinguichi. Shina cajpimi, cai pachapi causajcunataca, na pitapash taita nina canguichi.

¹⁰Cangunata Quishpichij Cristo cajpimi, cangunata Yachachijtaca, ñucatalla charinguichi.

¹¹Maijambash cangunata mandaj cashpaca, cangunata servishpa causachun ninimi.

¹²Jatun tucushpa purijtaca, yangapimi churanga. Ashtahuangarin na jariyashpa purijca, jatunyachi tucungami.

¹³Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Cangunaca, jahua pachapi Dios mandajuj llactaguman gentecuna ama yaicuchunmi, punguta vichanshna jarcanajunguichi. Chashna cashpami, cangunapash na yaicushpa, yaicungapaj munajcunatapash jarcanajunguichi.

¹⁴Mandashca shimita yachachijcuna, fariseocuna, ¡aij imachari tucunguichi! Cangunaca, mishqui shimi, jayaj shungucunami canguichi. Canguna, sapalla huarmicunapaj huasicunatapash langanshna quichushpami puringuichi. Chashna rurashpaca, alipi ricuringapaj yashpami, Taita Diostaca unai unaita mañaj tucunajunguichi. Chashna cashcamandami cangunaca, ashtahuan ninanda llaquichi tucunguichi.

¹⁵Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Canguna yachachishcata shujllapash catichunmi, mama cuchatapash, alpatapash rinajunguichi. Canguna yachachishcata ña catijpica, ucu pachapi cangunatapash ashtahuan yali llaquichi tucuchunmi tigrachinguichi.

¹⁶Ñausashna causajcunata pushajcuna, ¡aij cangunaca, imachari tucunguichi! Cangunaca cashnami ninajunguichi: ‘Diospaj huasimandami nishpa juramentushpaca, na pactachishpa saquinallami. Ashtahuangarin Diospaj huasi ucupi tiajuj oromandami nishpa juramentushpaca, pactachinapachami’ ninajunguichimi.

¹⁷¡Juizu illaj, ñausashna causajcuna! ¿Maijanda ashtahuan yali canga? ¿Orochu yali canga, na cashpaca orotapash paipajlla cachun rurajuj Diospaj huasichu yali canga?

¹⁸Cangunaca, cashnatapashmi yachachinguichi: ‘Altarmandami nishpa juramentushpaca, na imapashchu. Ashtahuangarin Taita Diosman imaguta carashca, altar jahuapi tiajujmandami nishpa juramentushpaca, pactachinapachami’ ninguichimi.

¹⁹¡Juizu illaj, ñausashna causajcuna! ¿Maijanda ashtahuan yali canga? ¿Diosman carashcachu yali canga, na cashpaca Diosman carashcatapash, paipajlla cachun ruraj altarchu yali canga?

²⁰Altarmandami nishpa maijambash juramentushpaca altarmandapash, chai jahuapi Taita Diosman carashca tucui ima tiajcunamandapashmi juramentun.

²¹‘Diospaj huasimandami’ nishpa maijambash juramentushpaca, chai huasi ucupi causaj Taita Diosmandami juramentun.

²²Shinallata: ‘Jahua pachamandami’ nishpa maijambash juramentushpaca, Taita Dios tiajuj jatun tiarinamandapash, Taita Diosmandapashmi juramentun.

²³Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Cangunaca, mentatapash, anistapash, cominostapash, chungamanda shujgutami, Taita Diosman caranata yachanguichi. Mandashca shimipica: ‘Imatapash cashcatapacha rurashpa causangui, shujcunatapash llaquishpa juyangui, Diostapash ali cringui’ nishpami yachachijun. Ashtahuangarin chaitarami na rurashpa causanguichi. Chaita aliguta pactachishpami, Diosman caranatapash na saquishpa causana canguichi.

²⁴¡Cangunaca, shujcunata pushanajushpapash, ñausashnamari purinajunguichi! Micunapi jamzi chuspi huashajujpica, shushunatami yachanguichi. Chashna cashpapash, camello animalta langanshnami, imatapash nalita ruranajunguichi.

²⁵Mandashca shimita yachachijcuna, fariseocuna, ¡aij imachari tucunguchi! Cangunaca mishqui shimi, jayaj shungucunami canguichi. Cangunaca, vasotapash, platotapash huashatallami ali maillanguichi. Ashtahuangarin cangunapaj shungupica, shuhuana yuyaihuan imatapash cashcatapacha na rurana yuyaihuan jundami canguichi.

²⁶¡Ñausashna causaj fariseo! Vasota, platotaca ucutarami ali maillana cangui. Shina rurajpimi, huashandi tucuilla mapa illaj ricuringa.

²⁷Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Cangunaca, bovedata yurajyachishpa, juyailla alichishcashnami canguichi. Chashna cashpapash chai boveda ucupica, huañushcacuna ismushca tullucuna jundanshnami cajunguichi.

²⁸Chashnapash cangunaca, ali runashnami, canllamanga tucuicunaman ricuringuichi. Ashtahuangarin shungupica, nij tucushpalla, imatapash nalitallami yarinajunguichi.

²⁹Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Cangunaca, Profetacunata pambashca utujucunata cutin shayachijcunami canguichi. Imatapash cashcatapacha rurashpa causashca runacunataca, paitashnalla rurashpa yaringapajpash, pircashpa juyaillayachishpa alichijcunami canguichi.

³⁰Chashna alichishpaca, cashna ninatami yachanguichi: ‘Profetacunata ñucanchipaj ñaupa taitacuna huañuchijui punllacunapi ñucanchi causashpaca, nachari paicunahuan cumba tucushpa huañuchinchimanllu carca’ ninajunguichimi.

³¹Chashna nishpaca, Profetacunata huañuchij runacunapaj miraicuna cajtami, cangunallata ricuchinajunguichi.

³²¡Cangunapash, cangunapaj ñaupa taitacuna nalita rurashcashnallata rurangacaman, ashtahuan catishpa ruranajuichilla!

³³¡Culebrashna nalicuna, cangunaca culebrashna causaj nali gentecunapaj miraicunamari canguichi! Ucu pachapi ninanda llaquichi tucunamandaca, ¿imashnashi quishpiringuichi?

³⁴Shina cashcamanda ricuichi, Profetacunata, alipacha yachajushcacunata, yachachijcunatami cangunapajman cachamuni. Shina cachamujpimi, paicuna puramanda huaquingunataca huañuchinguichi. Shujcunataca chacatanguichimi. Huaquingunataca, canguna tandanajuna huasicunapimi astishpa, pueblon pueblon catiriashpa llaquichinguichi.

³⁵Imatapash cashcatapacha rurashpa causanajuj runacunata huañuchishcamandami, cangunaca ninanda llaquichi tucunguichi. Imatapash cashcatapacha rurashpa causashca Abel runata huañuchi callarishpaca, Berequías shuti runapaj churi Zacariastapashmi huañuchircanguichi. Paitaca, Diospaj huasihuan, altarhuan chaupipimi huañuchircanguichi.

³⁶Na llullashpami, cangunataca cashna nini: Chashna tucunaca, cunan cai viñaicunacamanmi shamunga.

³⁷¡Jerusalén, Jerusalén, cangunaca Dios ima nishcata villajcunata huañuchijcunamari canguichi! ¡Cangunaman villachun Diosllata cachamushca runacunatapash, rumicunahuan huañuchijcunamari canguichi! ¡Shuj atalpa paipaj pollo huahuacunata tandachishpa ugllanshnami, cangunataca cutin cutin tandachingapaj munarcani! ¡Ashtahuangarin na munashpami puringuichi!

³⁸Ricuichi, cangunapaj huasica jichushcamari.

³⁹Cangunataca, cashnami nini: ‘Jatun Diospaj shutipi shamujujtaca, Dios bendiciashca cachun’ ninajuna punllacamanmi, cunanmandapacha cangunaca ñucataca na ricuhuanguichi” nijurcami.